1 Peire Rotgiers si fo d’Alvernge e fo canorges de Clarmon; e fo gentils hom e bels e avinens, e savis de letras e de sen natural; e cantava ben. 2 E laisset la canorga e fetz se ioglars, et anet per cortz e foron grazit li sieu chantar. 3 E venc s’en a Narbona, en la cort de ma dompna N’Esmengarda, que era adoncs de gran valor e de gran pretz. 4 Et ella l’acoillic fort ben e·l honret, e·ill fetz grans bens. 5 Et el s’enamoret d’ella e·n fetz sos vers e sas chanssons d’ella. 6 Et ella lo receup e·ls pres en grat. 7 Et apellava la «Tort-m’avetz». 8 Lonc temps estet ab ella en cort e si fon crezut q’el agues ioi d’amor d’ella; don ella en fo blasmada per las gens. 9 E det li comiat e partit lo de si, 10 et el s’en anet a·N Raembaut d’Aurenga, si cum el dis el sirventes q’el fetz de lui que ditz: «Seign’En Raembaut, per vezer de vos lo conort e·l solatz, sui sai vengutz tost e viatz, mai que non sui per vostr’aver; que saber voill, qan m’en irai, s’es tals lo gabs cum hom lo fai, si n’i a tant o meins o mai, cum aug dir ni comtar de vos». 11 E·l estet lonc temps ab En Raembaut d’Aurenga, e puois s’en partic de lui et anet s’en en Espaigna estar ab lo rei Amfos d’Aragon. 12 E pois estet ab lo bon comte Raimon de Tolosa, tant qant li plac et el volc. 13 Mout ac gran honor el mon tant cum el i estet. E pois se rendet en l’orden de Granmon, e lai el fenic.