Versione A

Raymun Jorda fo vescom[s] de Sant Antoni, senher d’un ric borc qu’es en Caersi; e fon avinens e larcs e bos d’armas, e saup trobar e ben entendre.

Et amet la molher d’En R. Amielh de Pena d’Albeges, qu’era onratz bars; e la dona era bela e joves e ensenhada, e volia mays de be al vescomte que a res del mon, et el ad ela.

Et avenc se que·l vescoms fon en guerra ab sos enemix e fon nafratz en una batalha e fon portatz a San[t] Antoni per mort. E la novela venc a la dona aytal que mort era; don ela ac tal dolor que s’en rendec als Patarics.

Lo vescom[s] gueri de sa nafra; e can saup que la dona s’era re[n]duda, ac tal dol que pueys no fe vers ni canso.

Et aysi a de sa obra.

Versione B

Lo vescoms de Saint Antoni si fo de l’evesquat de Caortz, seingner e vescoms de Saint Antoni.

Et amava una gentil domna qu’era moiller del seingnor de Pena d’Albeges, d’un ric castel e fort. La domna si era gentils e bella e vallenz e mot presiada e mot honrada; et el mout valenz et enseignatz e bons d’armas et avinenz e bons trobaire, et avia nom Raimonz Jordans. La domna era apellada la vescomtessa de pena. L’amors de lor dos si fo ses tota mesura, tan se volgren de ben l’us a l’autre.

Et avenc que·l vescoms anet com garnimen en una encontrada dels seus enemics; e si en fo una granz batailla, e·l vescoms si fo nafratz a mort. E fo dich per los enemics de lui qu’el era mortz; e la novella venc a la domna qu’el era mortz; et ela, de tristesa e de la dolor gran qu’ella ac de la novella, si s’en anet ades e si se rendet en l’orden dels ereges.

E si com Dieus volc, lo vescoms meilluret e gari de la nafra. E negus no·ill volc dire qu’ella fos renduda. E quant fo ben garitz, el venc a Saint Antoni, e fo li dit com ela s’era renduda per la tristessa qu’ella ac quant auzi dire qu’el era mortz. Dont, quant el auzi so, perdet solatz e ris e chan et alegressa, e cobret plains e plors e sospirs et esmais e dolors, e no cavalquet ni anet ni venc entre la bona gen.

Et enaisi estet plus d’un an en gran marrimen; don ma domna Elis de Monfort, moiller d’En Guillem de Gordon, filla del vescomte de Torena, on era jovenz e beutatz e cortesia e valors, li mandet pregan ab monz avinenz precs qu’el per la soa amor se degues alegrar e laissar la dolor e la tristessa qu’el fassia, disen ella qu’ella li fassia don de son cor e de son cors e de s’amor per esmenda del mal qu’el avia pres; e pregan lo e claman li merce qu’el la deingnes anar vezer; e se no, qu’ella vengues a lui per vezer lo. Quant lo vescoms auzi aquels honratz plazers que la gentils valenz domna li mandava, e si li comensa a venir una granz dousors d’amor al cor; si qu’el comensa a far alegressa et a esjauzir se, e comensa a venir en plasa e recobrar solatz entre la bona gen, e vestir se e sos compaingnos e cobrar se en arnes et en armas et en solatz. Et apareillet se ben et honradamen, et anet s’en a ma domna Elis de Monfort; et ella lo receup ab gran plaser et ab gran honor que.il fetz. Et el fo gais et alegres de la honor e dels plazers qu’ella li disia ni·l fasia, et ella molt alegra de la bontat e de la valor e del sen e del saber e de la cortesia qu’ela trobet en lui; e no fo pentida dels plazers ni de las amors qu’ella li avia mandadas. Et el la saup ben grazir e mercejar, e gen prejar qu’ella li fezes tant d’amor per qu’el crezes que per bon cor e per bona voluntat li avia mandaz los plazens plazers, dizen que·l[s] portava en l’armari de son cor escritz. Et ella o fetz ben, qu’ella lo pres per son cavallier e receup son homenatge, et ella det si a lui per domna, baisan et abrasan, e·ill det son anel de son det per fermanssa e per son segurtat.

Et enaissi se parti lo vescoms de leis molt alegres e molt gais, e cobret trobar e cantar e solatz. E fetz de lei adoncs aquella chanson que ditz:

Vas vos soplei, en cui ai mes m’entenssa

Et enanz qu’el fezes la chanson, una nuoit, quant dormia, li fo vis que Amors l’asaillis d’una cobla que dis:

Raimonz Jordanz, de vos eis voill aprendre

Co·us es laissatz de solatz e de chan.

Ja soliatz en dompnejar entendre

Molt leialmen, so fasiatz semblan,

E·us feiniatz, e·us en fasiatz gais;

Mas ara vei c’avetz fenit lo lais;

Encolpatz etz, se non es qu’i responda.

Maintas bonas chansos fetz, de las cals son asi escriptas altras, si com vos auziretz.