I.

1. Comtor d’Apchier rebuzat,
2. pos del chan vos es laissat,
3. recrezut vos lais e mat,
4. loing de tota benanansa,
5. vencut de guerr’e sobrat,
6. comtor mal encompanhat,
7. ab pauc de vi e de blat,
8. plen d’enoi e de carn ransa.

II.

9. Aisi prenc de vos comjat,
10. pos mai de mi no chantat,
11. e del vostre vielh barat,
12. e de vostra vielha pansa,
13. e del nas tort, mal talhat,
14. e del vezer biaisat,
15. que tal vos a Dieus tornat
16. c’anas co escut e lansa.

III.

17. Be·us a breviat lo corril
18. Monlaurs, que tenias vil,
19. que de mai tro en abril
20. vos fai estar en balansa;
21. e non aves senhoril
22. tant aut so dur cor apil,
23. que ja·us trobon en planil,
24. per que·m pren de vos pezansa.

IV.

25. Et an vos claus lo cortil
26. sil que·us son deus lo capil,
27. e tornat de brau humil
28. e tout chan et alegransa;
29. e s’anc raubes loc mongil
30. ara·us faitz dire a mil
31. que Dieus e l’orde clergil
32. vos an tout pretz et onransa.

V.

33. Pos del chantar em al som
34. aisie·us desampar lo nom;
35. totz vostr’argens torn’en plom
36. e vostr’afars desenansa.
37. Vilhetz pus blancs d’un colom,
38. be·us menon de tom en tom,
39. e no sabetz qui ni com.
40. Tart seres mais reis de Fransa!