Testo di A

I.

1. Si·m destreignetz, dompna, vos et Amors,
2. c’amar no·us aus ni no m’en puosc estraire:
3. l’us m’encaussa, l’autre·m fai remaner,
4. l’us m’enardis e l’autre·m fai temer;
5. preiar no·us aus per enten de jauzir,
6. mas si cum cel q’es nafratz per morir,
7. que sap q’es mortz e pero si·s combat,
8. vos clam merce ab cor desesperat.

II.

9. Bona dompna, paratges e ricors,
10. cum plus aut es e de major afaire,
11. deu plus en si d’umilitat aver,
12. car ab orguoill non pot bos pretz caber,
13. qui gen no·l sap ab chausimen cobrir;
14. e pois no·m puosc de vos amar sofrir,
15. per merce·us prec e per humilitat,
16. c’ab vos trobes calacom pïetat.

III.

17. No mi nogues vostra fina valors,
18. c’anc no la puoc un jorn plus enan traire;
19. que pos vos vi aic lo sen e·l saber
20. el vostre pretz creisser a mon poder,
21. qu’e mains bos luocs l’ai dich e faich auzir;
22. e si·us plagues c’o deignassetz grazir,
23. no·us quisera plus de vostr’amistat
24. e gauzira per guizerdon lo grat.

IV.

25. Totz los forfaitz e totas las clamors
26. que·us mi podetz rancurar ni retraire,
27. es car m’ausetz abellir ni plazer
28. mas d’autra ren q’ieu anc pogues vezer;
29. autr’ochaison, dompna, no·m sabetz dir,
30. mas car vos sai conoisser e chausir
31. per la meillor et ab mais de beutat:
32. ve·us tot lo tort en que m’avetz trobat.

V.

33. Vostre beill huoill, vostra fresca colors
34. e·il doutz semblan plazen qe·m sabetz faire
35. vos mi fant tant desirar e voler,
36. que mais vos am on plus m’en desesper;
37. e fatz que fols car no m’en sai partir,
38. mas qand ieu pens cals etz qe·m faitz languir,
39. cossir l’onor et oblit la foudat
40. e fuich mo sen e sec ma voluntat.

VI.

41. De Mon Carbon no·us puosc ben sos laus dir,
42. mas qui·l marques mentau de Monferrat,
43. ja no·l laus plus, c’assatz l’a ben lauzat.

Testo di G

I.

1. Si·m destregneç, domna, vos et Amors,
2. c’amar no·s aus ni no m’en pos estraire:
3. l’us m’encauza, l’autre·m fai remaner,
4. l’us m’enardis e l’autre·m fai temer;
5. preiar no·us aus per enten de jauzir,
6. aissi com cel q’es naffrat a morir
7. sab que morç es e pero se combat,
8. vos clam merce ab cor desesperat.

II.

9. Bona dompna, parages e ricors,
10. on plus alz es e de major afaire,
11. deu mais en si d’umilitat aver,
12. car ab orguoil no pot bon prez caber
13. qi gen no·l sap a chausimen cobrir;
14. e pos no·m puosc de vos amar sofrir,
15. merce vos clam per vostra humilitat,
16. q’en vos trobes cal alcun pïetat.

III.

17. No me nogues vostra rica valors,
18. c’anc no la poc un jorn plus enan traire;
19. pos en vos vi aic lo sen e·l saber
20. de vostre prez creisser a mon poder,
21. q’en maint bon loc l’ai diz e faiz auzir;
22. e si·os plagues q’en deignisiez grazir,
23. non qeria plus de vostr’amistat,
24. mas jauziria per guierdon lo grat.

IV.

25. Toz los forfaiz e totas las clamors
26. qe·os mi podez rancurar ni retraire,
27. es car m’ausaz abelir e plazer .
28. mais d’altra re q’om anc podes vezer;
29. altr’ocaison, domna, non sabez dir,
30. mas car vos sai conoiser e grazir
31. per la meillor et ab mais de beutat:
32. ve·os tot lo tort en que m’avez trobat.

V.

33. Vostre gen cors e la fresca colors
34. e·l dolz esgart plaisenz qe·m sabes faire
35. vos mi fan tan desirar e voler,
36. q’ades vos am on plus m’en desesper;
37. e si folei car no m’en sai partir,
38. mas qan eu pens quals es qi·m fai languir,
39. conssir lo ver et obli la foldat
40. e fuc mon sen e sec ma voluntat.

VI.

41. Lo reis Amfos es fons de prez complir
42. e·l sobrenoms fai lo noms encazir,
43. c’ab lui troban chastel e seürtat
44. tut li bons aip per q’om a prez honrat.