I.

1. Tostemps, si vos sabetz d’amor,
2. triatz de doas cal val mays:
3. s’es drutz de tal que no·s biays
4. vas vos ni sofr’autr’amador
5. empero no·us fay veiayre
6. que·us am ni que s’azaut de vos,
7. o d’autra que·us am atrestan,
8. et a d’autres drutz un o dos,
9. e que·us fassa de plazers tan
10. com fin’amia deu faire.

II.

11. Folquetz, mes m’avetz en error,
12. que trop m’avetz partit greus plays,
13. qu’en cascun a trebalh e fays;
14. pero si·n penray la melhor:
15. be us dic qu’ieu no pretz gaire
16. dona pos hi ay companhos,
17. sitot mi fai d’amor semblan;
18. mays vuelh que m’o tenh’a rescos
19. leys que non aya cor truan
20. c’ab bels plazers me cug trayre.

III.

21. Tostemps, pauc avetz de valor
22. si per aital amor es gays
23. que, pus dona·us fay col e cays
24. par qe so tengu’a deshonor:
25. be·us dic, s’era·l reys sos paire,
26. no·us es sos plaitz onratz ni bos;
27. mays val sela que·us tem e·us blan
28. e·us mostra semblan amoros,
29. sitot se vay pueys percassan,
30. cant vos non es e·l repayre.

IV.

31. Folquetz, vos razonatz folor,
32. quez anc dona pus son drut trays
33. sos pretz no fon fis ni verays,
34. ni·l sieu semblan gualiador
35. no·l podon per ren refayre
36. l’anta qu’ilh fay totas sazos;
37. mas de bona dona prezan
38. say qu’en es pus ondratz sos dos:
39. sitot no·m fay d’amar semblan
40. no·m cal, sol m’am ses cor vaire.

V.

41. Tostemps, li nessi donador
42. fan tornar los bos dos savays,
43. e par a lor semblan malvays
44. que·l dar non lor aia sabor;
45. doncx, com pot dona ben fayre
46. que·m mostre semblan ergulhos?
47. Mielhs es c’om suefra·l bel enjan,
48. c’aisso ja es bes trassios
49. qu’aven a motz e sofrir l’an:
50. yeu cug que vos n’es cofraire.

VI.

51. Folquetz, tals m’ac a servidor
52. qes anc companhon no m’atrais,
53. ara·m par qu’ad autre s’eslays,
54. per qu’ieu m’en part e·m vir alhor;
55. mas vos qi es fis amayre
56. cug que, si ab estas razos
57. cujatz aisi cobrir lo dan
58. e s’aisi perdes las chansos
59. quez autre vos parta l’afan,
60. no say per que·us es chantayre.

VII.

61. Tostemps, de tort say dreg fayre,
62. per c’a mi platz esta razos;
63. e s’ie·us en vens, joi n’ayatz gran,
64. car vos sofretz los companhos,
65. mas eu n’am tal que·m fay semblan
66. d’amor, e no·y ay cofraire.

VIII.

67. Folquetz, tostemps fos gabayre!
68. jutjada si’esta razos:
69. a Na Gaucelma vuelh que·s n’an,
70. e si ieu am ab companhos,
71. ja per so no·y ira duptan,
72. que be crey n’er fis jutjaire.