I.

1. Dieus et amors et merce
2. e chauzimenz e sufrenza,
3. ara·us qier, si·us platz, valenza,
4. q’anc tant destregz, per ma fe,
5. no·us qis mais neguna re.
6. Mas amors no sap qe s’es
7. mals plus q’ieu sai qe s’es bes.
8. Dieus li don mal, s’amors pot mal aver,
9. et a mi forz’e poder,
10. q’encontra leis posca trobar guirenza,
11. tant q’il m’oblit del tot o q’ieu la venza.

II.

12. Mas ben tost ac vencut me
13. qant vi sa bella parvenza
14. e sa gaia captenenza:
15. aissi m’ac vencut dese
16. q’ieu non aic poder e me.
17. A sol aizo par qe volpilla es
18. amors: car antz non conqes
19. leis q’es tan fortz qe non la·l cal temer.
20. Mas tant a mes son poder
21. e mi amors q’ieu non ai mai crezenza
22. c’autr’amador ni autr’amairitz venza.

III.

23. E pos de mi no·il sove,
24. ni mos preiars non l’agenza,
25. nul’aus qerre covinenza;
26. e·il platz q’enaissi·m malme
27. qe·m vede·l solatz de se.
28. Ar n’auran gaug lauzenjador plaides
29. s’ieu non son gais ni cortes;
30. e si tan perc, ben deu mos dantz parer
31. e mos solatz remaner
32. s’en leis non hai respiec ni entendenza,
33. ni autr’amors non a poder qe·m venza.

IV.

34. Amors non sai don si·ns ve,
35. car, segon autra naiscenza,
36. no fenis ni no comenza;
37. c’us esperitz q’om no ve
38. es e cel qe plus la cre
39. es enganatz e trahitz e mespres.
40. Car, se conoiscenz’agues,
41. ja no·il plagra tan del meu dechaer.
42. Mas ieu en dirai lo ver:
43. ren mas los sieus non torn’en dechaenza
44. qan dels autres non a poder qe venza.