I.

1. En chantan m’aven a membrar
2. so qu’eu cug chantan oblidar,
3. mas per so chan, c’oblides la dolor
4. e·l mal d’amor;
5. et on plus chan plus m’en sove, 
6. ni ma boca en alre no m’ave
7. mas en: merce! 
8. Per qu’es vertatz e sembla be
9. qu’inz el cor port, domna, vostra faisson
10. que·m chastia qu’eu non vir ma rason.

II.

11. E pois Amors mi vol honrar
12. tan qu’el cor vos mi fai portar, 
13. per merce·us prec que·us gardes de l’ardor,
14. qu’eu ai paor
15. de vos mout major que de me; 
16. e pois mos cors, domna, vos a dinz se, 
17. si mals l’en ve, 
18. puois dinz es, sofrir lo·us cove: 
19. e per so faitz del cors so que·us er bon
20. e·l cor gardatz si com vostra maison.

III.

21. Qu’el garda vos e·us ten tan car
22. que·l cors en fai nesci semblar
23. que·l sen i met, l’engien e la valor,
24. si qu’en error
25. laissa·l cors pel sen qu’el rete; 
26. c’om me parla, mantas ves s’esdeve,
27. qu’eu non sai que, 
28. e·m saluda hom qu’eu non aug re: 
29. e ja per so nuls hom no m’ochason
30. si·m saluda et eu mot non li son.

IV.

31. E ja·l cors non si deu clamar
32. de re que·l cor li puosca far, 
33. que tornat l’a al plus onrat seingnor
34. e tolt d’aillor
35. on trobav’enjan e non-fe; 
36. mas drez torna a son seingnor ancse;
37. pero non cre
38. que·m deing, si Merces no·m mante
39. que·ill intr’el cor tan qu’en loc d’un ric don
40. deing escoutar ma veraia chanson!

V.

41. E si la deingnas escoutar, 
42. domna, merce·i deuria trobar; 
43. pero obs m’es c’oblides la ricor
44. e la lausor
45. qu’eu n’ai dig e dirai jase, 
46. mas autre pro mos lauzars noqua·m te:
47. com que·m malme
48. la dolors m’engraiss’e·m reve, 
49. e·l focs, qui·l mou, creis ades de randon,
50. e qui no·l mou, mor en pauc de sason.

VI.

51. Morir puesc be, 
52. N’Azimanz, qu’eu no·m clam de re, 
53. neis si·m doblava·l mals d’aital faisson
54. com dobla·l ponz del taulier per raison.

VII.

55. [Chanssos, desse
56. vas Monpeslier vai de part me
57. a don Guillem dir, sitot no·il sap bo,
58. sos pretz, car creis, li·m fai querre perdo.]