I.

1. Meravill me cum pot nuills hom chantar
2. si cum ieu fatz per lieis que·m fai doler,
3. qu’e ma chansso non puosc apareillar
4. dos motz qu’al tertz no·m lais marritz chaser,
5. car non sui lai on estai sos cors gens,
6. doutz e plazens,
7. que m’auci desiran
8. e non pot far morir tant fin aman.

II.

9. E car non puosc nuilla ren tant amar,
10. ella, si·l platz, non deu ma mort voler,
11. c’anc, puois la vi, non puoc d’alre pensar
12. mas cum pogues far e dir son plazer;
13. et es ben dreitz, qu’al laus dels conoissens
14. es plus valens:
15. per qu’ieu n’am mais l’afan
16. de lieis servir que d’autra aver joi gran.

III.

17. Las! ieu non l’aus mon messatge enviar,
18. ni tant d’ardit non ai qu’ieu l’an vezer;
19. e non o lais mas car vuoill far cuidar
20. als fals devins qu’aillors ai mon esper:
21. pero·l desirs m’es ades plus cozens
22. e·l pessamens,
23. car ieu no·il sui denan
24. mas jongz, aclis, per far tot son coman.

IV.

25. Lo mals qu’ieu trac no·m pot desconortar
26. tant la fai pretz sobre totas valer,
27. ni negus hom no la pot trop lauzar;
28. Dieus don qu’il vuoilla humilitat aver,
29. si cum en lieis es proeza e jovens,
30. beutatz e sens,
31. c’anc dompna no·n ac tan:
32. doncs, cal tort n’ai s’ieu nuill’autra non blan?

V.

33. Bella dompna, tant vos am e·us tenc car
34. que maintas vetz lo jorn no·m puosc tener
35. c’az una part no m’an totz sols plorar,
36. si qu’ieu no·m puosc d’una pessa mover,
37. tal paor ai no·m vailla chausimens;
38. car plus me vens
39. vostr’amors sospiran
40. qu’eu no sai dir ni retraire en chantan.

VI.

41. Qu’ie·us sui gairens
42. plus vos am ses engan
43. no fetz Yseutz son bon amic Tristan.