I.

1. En Maenard Ros, a saubuda
2. sai dos cavalers preisanz,
3. don largeza no·s remuda;
4. mas l’us a terra doz tanz
5. ez es ben senes raubar garniz,
6. l’autre es per raubaria aiziz:
7. chausez al qal fai grazir mais!

II.

8. Mester vos aura ajuda,
9. Guionet, al meu senblanç;
10. ço es paraula saubuda
11. qe·l graz val mais e·l talanz
12. d’aqel qe n’es de Deu partiz,
13. e cel qui o tol, es faidiz,
14. don a soven paor e fais.

III.

15. Maenard, cel qe s’esvertuda
16. de dar e no·n va clamanz
17. es ben rason conoguda
18. qe·l graz val mais e·l talanz.
19. Si l’autre n’a dos enriqiz,
20. per aqel n’a cinc cenz deliz,
21. ez anc de mal bos prez no·l tais.

IV.

22. Gui, de chausida tolguda .
23. ai vist rics mainz malananz;
24. es Charles n’intret en bruda
25. per tolre et en bobanz.
26. Tolre mou dels plus afortiz,
27. e per tolre es hom plus ardiz,
28. e tolent es hom druz e gais.

V.

29. En Maenard, duncs es prez deliz,
30. si tolres era plus graziz
31. qe donars, don proeza nais.

VI.

33. Gui, Alixandres fo aisiz
34. per tolre e de sos conqis
35. fez doze reis, per qe valc mais.