Lo segon vers d’en Gr. Riquier, l’an MCCLXIIII.

I.

1. Be·m volgra d’amor partir,
2. endreg midons dezirar,
3. pus nulh secors no·m vol far,
4. mas no puesc. Per que m’albir?
5. Que folhs es qui s’abandona
6. a dezirar nulla re,
7. ses esperansa de be
8. aver, e·l bes sia tals
9. que totz temps sia vidals.

II.

10. Quar hom no viu ses dezir,
11. ni pot son cor desviar
12. de lai on fort vol anar.
13. Per que deuria chauzir
14. tal dezir, don sa persona
15. agues honor, e per que?
16. Quar honors ab bona fe
17. es fons dels bes temporals
18. e portz dels esperitals.

III.

19. En honor pot avenir
20. qui sap son dever guardar
21. en far, en dir, en pessar
22. ez en semblan perseguir;
23. no·m cal qu’estiers o espona,
24. qu’entendre·m pot hom de se;
25. mas cobetatz vey que te
26. tant lo mon entr’un ez als,
27. per que·l perils es mortals.

IV.

28. Cobetatz fai abelhir
29. al pus aver ajustar,
30. e manda enjan menar
31. e liautat relenquir;
32. aisso nueg e jorn sermona
33. e fa son dan qui la cre,
34. quar no pot aver ab se
35. compliment, ans viu sers fals,
36. guerriers de pretz, ab totz mals.

V. 

37. Qui pot a bon pretz falhir?
38. Quar elh ja fa tant honrar
39. selh que·s sap gent capdellar,
40. que per tot lo fa grazir.
41. Dieus als conoyssens lo dona
42. quar hom conoyssens mante
43. pretz e tot so que·l cove,
44. don vius e mortz es lials:
45. aitals dezirs es cabals!

VI.

46. Ses conoyssensa seguir,
47. lunhs hom no pot gazanhar
48. veray pretz, ni governar,
49. quar qui ben sap elegir
50. ez al contrari s’adona,
51. sa conoyssensa mescre
52. e ses son pro au e ve
53. qu’a dobla mort va venals,
54. don es sos viures mal sals.

VII. 

55. Donc ieu pes de mi delir
56. ab dezir que·m fa tremblar,
57. qu’amors fa mon cor estar
58. en liey, don no·m pot venir
59. bes; pero mos sens tensona
60. ab totz, e nul pro no·m te,
61. que·l cor a seguir m’ave:
62. per que no·m cal dire quals
63. es mos viures terrenals.

VIII. 

64. Tal dezir amors me dona,
65. don ja no auray nulh be,
66. ni puesc far a mon cor fre
67. ab que·l vir: tant m’es corals
68. qu’a penas puesc pessar d’als.

IX. 

69. L’onrat senhor de Narbona
70. n’Amalric, que pretz mante,
71. prec que·l guar si quo·s cove,
72. e viura plazens, lials,
73. estranhatz de totz ditz mals.