I.

1. Lan qan cor la doussa bisa, [R]
2. e·l gens terminis m’aonda,
3. vuoill que mos chans no s’esconda
4. et auia·l om loing e pres;
5. e teing m’a gran meravilla,
6. si que chant ar en confes,
7. si nuills fals motz i roïlla.

II.

8. L’uoill mostron al cor la via
9. per que lur sens es cumfonda;
10. e, ma·l crims del fol sobronda,
11. fora·il mieills ja non nasques,
12. que mas ab trichar bercilla,
13. espera pieitz enapres
14. que qi·l cremav’en grazilha.

III.

15. Qui de l’autrui no·is chastia,
16. ben es c’om del sieu refonda.
17. Qand amars faill, amors loinda
18. al ric recrezen engres;
19. e pois tant cant viu perilla,
20. e·l blasmes sec l’en ades,
21. c’ar viu d’autrui remasilla.

IV.

22. Cill que per marit no·is fiza, [R]
23. vol c’om de lieis parl’e bonda;
24. on plus mer, mais i aonda:
25. cais cortesia sembles.
26. Mas de dos en sus grondill a,
27. la putia l’es apres,
28. que la sec e la bresilla.

V.

29. E mentr’estai d’aital guisa [R]
30. fai don no–fes s’aprionda,
31. e·l gaichos es latz l’esponda
32. qe·il recrezens [no]’scampes;
33. e vas nuill latz no·is gancilla
34. q’el aqui no·il sia ades,
35. pois que a son drut frezilha.

VI.

36. Aqest pareills fai paria
37. don nais semenssa no–monda,
38. per que dreitz e fes esfronda
39. e mout home·n son envers. [R]
40. Cill an ab lor la corilla
41. don engans estai en pes,
42. e leials fes contrabilla.

VII.

43. Vas la fenida s’embria
44. lo vers, s’es qui·l chant ni·l gronda.
45. Ditz c’amors es desironda
46. que tost fai son par confes.
47. Qand ve a la sofrachilla,
48. tals compains l’estai de pres,
49. per que sovens s’estendilla.

VIII.

50. Lo mal que sovens l’estrilla
51. non agra ja si·m crezes,
52. tort aura si m’en corilla.