I.

1. Pus la fuelha revirola
2. qe vey d’entre·ls cims cazer,
3. que·l vens deromp e degola
4. que no·is pot plus sostener,
5. mot pres l’ivern temporau
6. pus q’estieu plen de gandilh,
7. on creys puti’es enveia.

II.

8. Graisans ni serps que·s amola
9. no·m fay espaven ni mau,
10. mosca ni tavas que vola;
11. escaravat ni bertau
12. no sen brugir ni oler,
13. aquel malvatz volatilh
14. que·l francs yverns nos deneia.

III.

15. [L’a]lauzet’e l’auriola
16. tornon lur chan en tazer,
17. lo jays e la rossinhola,
18. qu’iverns en fay son plazer,
19. e torna orguelh en chanau
20. de guarsos ples de grondilh
21. qu’en estieu·s contradenteia.

IV.

22. Jes n’Acropit–Bec–d’Aysola
23. non pert son loc al fogal,
24. qu’el porta pic e massola,
25. et en croza don a jau
26. cest tol si dons al jazer
27. la dolor del penchenilh,
28. pel femeniu don se breia.

V.

29. Sest trai del meils la brïola
30. plen’al mati et al ser;
31. e sobrefotre faysola,
32. car sap la coa mover,
33. e fay de nueg son jornal,
34. per que·l frug torn’embecylh,
35. e jovens girbaudoneia.

VI.

36. Aisi com la segunhola
37. baysa, leva, torn’avau,
38. cazen levan trebaiola
39. lo segles et no·n pueis au.
40. Uelhs [a] e no sap vezer,
41. ni no·n conoys lo rovilh
42. per que domneys ar puteia.

VII.

43. Jes del tot non badaiola
44. Marcebrus de so saber,
45. car sel es de bon’escola
46. que joy quera ssomover;
47. e pus jauzimens l’abau,
48. a cada vetz s’estendilh
49. un petit pus que·n ondeia.

VIII.

50. Dieus prec c’a·n Guiscart non tola
51. lo regne celestiau,
52. qu’el fes so per que s’adola
53. lo mielhs d’est segle carnau;
54. et a·n say laisat un her,
55. e jamay non creyray filh
56. s’aquest no·n contrapareia,

IX.

57. n’acovid’ar n’eviola
58. lo Malvat ab desesper,
59. qu’es om de natura fola,
60. que·s bayz’on mays pot valer.
61. No sai si so ditz per mal:
62. que·l cor [a] sotz l’emborilh,
63. bar que per aver sordeya.

X.

64. Que·l cor a sotz l’emborilh
65. bar que per aver sordeya.