I.

1. Chantarai, pus vey qu’a far m’er,
2. d’un chant nou que·m gronh dins lo cays:
3. chantars m’a tengut en pantays,
4. cum si chantes d’aital guiza
5. qu’autruy chantar non ressembles; 
6. qu’anc chans no fo valens ni bos
7. que ressembles autruy chansos.

II.

8. Belh m’es quan l’alauza se fer
9. en l’ayr per on dissen lo rays
10. e monta tro l’es bel que·s bays 
11. sobre·l fuelh que branda·l biza,
12. e·l dous temps (qu’anc bona nasques!)
13. entruebre·ls becx dels auzelhos 
14. don retin lur chan sus e ios.

III.

15. Qui a doncx amor e l’enquier
16. et amors brot’e bruelh’e nays,
17. e qui l’es humils e verays
18. en breu d’ora l’a conquiza,
19. q’umilitatz la vens ades
20. e belh semblant ab gent respos; 
21. qu’estiers no·n es hom poderos.

IV.

22. Mas de mi, las! qu’enaisi l’er
23. e re non ai mas quan lo fays:
24. aiso meteys m’es lo grans iays,
25. maier que qui·m dava Piza
26. e si·l plagues que a sos pes
27. vengues ves lieis de ginolhos
28. e li disses un mot amoros.

V.

29. Amors, saber volgra quon er
30. de nos dos, si·us plaz ia hueymais
31. que per re engrayssar no·m lays
32. mas quar no sai ma deviza;
33. e podetz aver cor engres 
34. ves mi qu’ieu non l’aurai ves vos,
35. tro que·l cors rest de l’arma blos.

VI.

36. Ab sol qu’ilh ayso non esfer,
37. non reblan gelos ni savais
38. que ia nulh dan, si be·s n’irays,
39. lo pretz d’una pauca briza 
40. m’en puesca tener, luenh ni pres,
41. sia lauzengiers o gilos,
42. sol qu’ela·m sia a mos pros;

VII.

43. Sol que sia que mos cors s’esmer
44. que vas autra part no·s biays,
45. q’un’amors ad autr’enquier plays
46. si·n sabia esser auciza:
47. e sapchatz, s’ieu tant non l’ames,
48. ia non saupra far vers ni sos,
49. ni non o feira s’ilh no fos.

VIII.

50. Peire d’Alvernhe l’er cofes
51. tant de servir e d’orazos,
52. tro que li·n vengna guizardos.