I.

1. Cui bon vers agrada auzir
2. de mi cosselh be qu’el escout
3. aquest qu’ara comens a dir,
4. que, pus li er sos cors assis
5. en ben entendre·ls sos e·ls motz,
6. ia non dira qu’el anc auzis 
7. melhors ditz trobatz luenh ni prop.

II.

8. De ben no fai az escarnir,
9. qui l’au, ans deu agradar mout,
10. si tot l’outracujat d’albir,
11. ab lur nesci feble fat ris,
12. tornon so qu’es d’amon de sotz;
13. e·l ben vezem que s’enantis
14. e l’esquerns resta de galop.

III.

15. E per tal fai s’en bon gequir,
16. qu’anc esquern ni coratge estout,
17. si broillet, no sai vim florir;
18. e par d’avol respeit iardis
19. quan vei que la sima ni·l brotz
20. non gieta frucha ni techis,
21. e l’intrador n’eison tug clop.

IV.

22. Aras vuelh alres devezir:
23. qui d’aver say a gran comout,
24. ben s’en deuria far servir,
25. qu’en mil muegz de marabotis
26. non donaria doas notz,
27. pus a la boca venra·l fis
28. ni·l pestres secodra l’izop.

V.

29. A quec deuria sovenir
30. que non agues coratg’estout
31. del be don nos devem iauzir,
32. qu’en petit d’ora es hom conquis;
33. e quan ven als derriers sanglotz,
34. no li val oncles ni cozis
35. ni metges ab son yssarop.

VI.

36. Ben deuria, pessan, morir
37. qui dregz huelhs guarda sus lo vout,
38. cossi Dieus per nos a guerir
39. receup mort, e pus mort aucis
40. selhuy que per nos venc en crotz:
41. tug morrem, qu’avers non gueris 
42. negun al temps plus que fes Iop.

VII.

43. Mout son intrat en lonc cossir
44. sil que son al derrier escout,
45. qu’a la mort no·s pot escrimir
46. coms ni reis ni ducx ni marquis,
47. e, s’enans no·s nedeia totz
48. que la mortz li serre lo vis,
49. ben si pot, si·s vol, triguar trop.

VIII.

50. Totz iorns vos poiria legir,
51. mas Dieu prec que sa grans mercis,
52. si de peccadors es sauvotz,
53. que·ns meta el sieu paradis,
54. lai on mes Ysac e Iacob.