I.

1. A mon vers dirai chanso
2. ab leus motz et ab leu so
3. et en rima vil e plana,
4. puois aissi son encolpatz
5. qan fatz avols motz als fatz;
6. e dirai so qe·en cossir,
7. qui qe·m n’am mais o·m n’azir.

II.

8. D’amar tornon en tenso
9. cill on anc amors non fo
10. plus q’en mi obra vilana,
11. e ditz qecs: «ie·n teing los datz
12. e·n sai mais que nuills hom natz»;
13. per qe·m platz a devezir
14. d’aco que a moutz n’aug dir.

III.

15. E si torn en ocaizo
16. cel dig qe·m fai plus felo,
17. no m’o tengatz ad ufana:
18. car per trops es autreiatz,
19. q’al mais aug dir, e no·m platz,
20. que domna se vol aucir
21. que ric home deigna auzir.

IV.

22. Qecs a dreig qe s’arazo,
23. mas vers venz qui be·l despo
24. et ieu dic paraula sana:
25. que mieills deu esser amatz
26. rics hom francs et enseignatz,
27. qu’il pot pro e bel chausir
28. per dompna q’aus precs soffrir.

V.

29. Mas dompna c’ama a lairo
30. ab semblan de tracio,
31. non deu ges esser autana:
32. mas en bas luoc s’asolatz,
33. si que sia [a]coindatz
34. e qe·i puosca endevenir
35. la nuoich e·l jorn ses dezir.

VI.

36. Anc dompna, qui q’en sermo,
37. per nuill ric home non fo
38. ni tornet de pretz sotana;
39. et ieu sai et es vertatz
40. que pros cavalliers privatz
41. vist a[i] tals dompnas delir,
42. c’om s’en degra sepeillir

VII.

43. E dirai en mais? ieu no,
44. ara en aqesta sazo!
45. mas si negus hom si vana
46. c’ab me se·n contrast’iratz,
47. adoncs n’auziretz viatz
48. tals motz per me ses mentir
49. c’om non poiria cobrir.

VIII.

50. Dieus retenc lo cel e·l tro
51. a sos ops ses compaigno,
52. et es paraula certana
53. c’a midonz laisset en patz
54. c’aseignoriu vas totz latz,
55. qe·l mons totz li deu servir
56. e sos volers obezir.

IX.

57. Ja de mort ni de preiso
58. no·m gart Dieus ni gaug no·m do,
59. si midonz qe·m te ses cana
60. no val pro mais c’autra assatz,
61. segon qu’eu cre, e sapchatz
62. que totz hom que la remir
63. s’enten en lieis al partir.

X.

64. Dompna, ieu vos dei grazir
65. so q’ieu sai ben far e dir.

XI.

66. E si·m datz ab lonc desir
67. lo ben qe·m degratz offrir.