[54] Sanch Apollinari

/87d/Sanh Apollinari fonc discipol de sanh Peyre l’apostol. E sanh Peyre trames lo de Roma a Rrevenna. E quant fonc aqui, el converti e batejet una nobla dona, molher del prebost, et tot son¹ ostal. E quant lo princip mager ho ausi, mandet ha sanh Apollinari e dis li que tantost adores las ydolas del temple. E quant fonc el temple, et el dis als capelas de las ydolas que mielhs fora que l’aur e·l argen per Dieu fos donatz que davant² los demonis ins rescondutz³, e tantost lo princip fes lo batre fortmen tro a la mort, e rremas coma mort. E vengro los crestias e portero l’en en hun ostal de una sancta⁴ dona veva, ont estet ·vj· mes.

Et apres el se parti d’aqui et anet se·n en una cieutat, ont avia hun noble hom mut que·l redet lo parlar. E quant fonc en l’ostal d’aquel noble home, ac dins una nobla donsela endemoniada, e cridet: «Hieus foras /88a/de sains, sirven de Dieu, quar se non ho fas, ieu ti faray gitar de la viela, los pes e las mas liadas». E tantost sanh Apollinari mes li las mas sus el cap e gitet li lo⁵ demoni del cors, ayssi que quant lo poble vi lo miracle, convertiro se ·iiij^c· homes. E quant los paguas ho viro, feyro lo estar⁶ pes nutz sobres carbos ardens. E quant fonc aqui, el prediquet fortmen lo nom de Jesu Christ. E quant los paguas ho ausiro, gitero lo foras de la viela.

⁷Endevenc si que·l duc avia una filha molt malauta, e mandet per sanh Apollinari⁸. E tantost coma fonc⁹ vengutz en son ostal sanh Apollinari, e la donsela mori. Et adonc lo princip dis a sanh Apollinari: «Ja per mon vol non foras intratz en mon ostal». Et adonc sanh Apollinari li dis: «Princip¹⁰, non ajas temor, quar ieu ti ressucitaray ta filha se·m juras que tu no la·m tolras se vol creyre en Dieu, que /88b/non ho fassas», e juret l’o. E tantost sanh Apollinari mes se en oratio, e la donsela ressucitet. E quant sa mayre ho vi, converti se e·s batejet, es ela e ssa filha am mols d’autres; e vodet a Dieu virginitat per tostemps.

E quant Cesar lo payre ausi aysso, mandet al prebost que·l feses adorar las ydolas e que·l gites de tota la terra. E quant lo prebost vi que non volia adorar las ydolas, fes lo batre e nafrar cruselment [...]¹¹. E quant fonc sus ni predicava lo nom de Dieu fortmen, fes li gitar aygua bolhen en las nafras frescas, en tant que [quant] los crestias viro que·ls paguas, que tormentavo tant fort sanh Apollinari, irasquero se fort et auciro¹² dels pagas ben ·ij^c·. E quant lo prebost ho ausi, fes lo batre fortment e·l fes metre en mala carcer. Et apres fes lo liar am cadenas, e fes lo metre en una nau, am tres clerx que ero am luy, e fes los gitar de la terra. E quant foro en la mar, et el converti los clerx que ero am luy et ·ij· cavaliers que ero am luy, /88c/e quant fonc arribatz, vengro¹³ los paguas, e preyro lo, e menero lo el temple per so que sacrifies a las ydolas. E quant fonc aqui, maldis los ydolas, e totz tost tombero en terra. E quant els ho viro, menero lo al jutge; es aluminet li lo filh que era orbs. En tal que·l jutge se converti a Dieu e tenc sanh Apollinari en son ostal ·iiij· ans.

Es apres los pagas acusero lo davan N’Espasia emperador, e N’Espasia dis que totz hom que no volgues adorar las ydolas, que hom lo gites de la viela. E adonc sanh Apollinari fonc baylat en garda ad hun crestia que era a Dieu convertitz. E aquel crestia preguet lo caramen que s’anes rescondre aqui ont estavo los lebros, per so que·ls paguas no·lh trobesso, e quant ley anava, los paguas seguero lo e batero lo tro a la mort, ayssi que visquet ·vij· dias e prediquet fortmen als crestias lo nom de Dieu. Et apres ·vij· dias, reddet l’arma a Dieu, e·ls crestias sebelhiro lo onradamen.