Princeton | Auch | Chantilly, versione in versi | Chantilly, versione in prosa

 

Ms. di Princeton 

 

[f. 15v, col. a, r. 15] De l’arcemiza.

Ar vos dirai de l’arcemiza con a bona vertut que es appellada maire de las autras erbas.

Per femena que non pot aver son tems prenes l’arcemiza e fatz la coire en aigua e beva d’aquell’aigua cauda e perfum s’en la natura, et aura sas flors.

O prenna las [f. 16r] fueillas e trai ne lo suc e mesclas lo ab vin, et aquo beva lo matin e·l ser per quatre iorns o per cinc, et aura ne aitant com n’aura portat.

Per mort d’enfant. Per femna que a mort l’enfant dedins lo cors prin l’arcemiza pistada e pauza la li sus lo ventre. E demantenent gitara lo e moutas autras malautias que femena a dins lo cors.

Qui non pot pissar. Per home que non pot pissar prin l’arcemiza e pista la e beves la ab vin e la mange cruza e beva apres de vin, e fara pissar.

Per pissar la peira: per peira, qui l’a en la vergua del membre, prin l’arcemiza e beva la o la mange ab vin; e prin l’erba e pista la e del suc oigh ne la vergua e·l penchenil e fatz ho soven. E gitara la peira am Dieu.

Per mal de cors. Per alcun mal que hom a dins lo cors beva de l’arcemiza ab vin e garra ab Dieu.

Per mal desoz la golla. Per mal desotz la golla prin l’arcemiza e pista la ab sayn de porc e mit o tot sus lo mal e garra. E beva l’erba pistada ab vin en dejun e garra ab Dieu.

Per trop manjar. Per home que aia maniat trop o begut tant que trop dorm e que ne moron assas, donas li lo suc de l’arcemiza a beure ab vin e s’esveillara demantenent.

Per home que porta arcemiza. Si alcuns homs [f. 16v] porta l’arcemiza sobre si ia lo iorn non sera fachuratz, ni nulla mala bestia non li pot far mal en cel iorn, ni nuill mal verm non li pot far mal. E per veritat es bona a totz aquestz mals que son escritz desus ab Dieu.

L’arcemiza. Si tu prens l’arcemiza fresqua e la metes sus un vaissel plen de vin ia non aias paor que aicel vin si mude ni s’afolle, e qui met del suc el vin un pauc val en mais. E so es cauza proada.

 

[f. 17r, col. b, r. 17] Per l’alambroze.

Ara vos dirai de l’erba que s’apella alambroze.

Qui beura l’aigua en que sera cuecha mout profiecha a noirir los nervis, e null’home que la uze non pot aver tos ni mal el pietz, e qui la mania de matin es mout [f. 17v] bona cruza e fa gran profieg al cors, car mout fort lo monda. E profiecha mout per la gota de las anquas et a las femnas, a las esquinas et als nombels, e la natura de las femnas purgua, si la manion cruza ho coita enans.

Per l’alambroze. E si serpent la sent mantenent fuig e si alcuns homs er mors de serpent prenna lo suc d’aquella erba e beva la, et er garitz demantenent.

Per febre. E si alcuns homs a lo freg de febre beva d’aquell suc ab autra aigua cruza e mantenent lo freg lo dezampara.

Qui beu sol lo ssuc ausis los verms; si non la pot beure fassa la coire en oli d’oliva e d’aquell oli oinhes li lo ventre et ausis los verms atresi.

Per cremazon. Ad home quez a cremazon els uells prin d’aquella erba plen poin e de pan blanc et un codoin e fai o boillir tot ensemps; e quant sera cueit fai en un enplastre e mit aquel enpastre sus los uuls et ades er garitz senes dolor.

Per ponchura. E si alcuns homs er pung d’espina o de fust o d’alcuna ponchura prena d’aquella erba pistada e meta·n sus e demantenent er garitz.

Qui usara aquesta. E totz homs que uzara aquella erba soven ia denfra son cors non pot durar nulla enfladura ni nulla ponchura ab Dieu.

 

[f. 18r, col. b, r. 26] De l’eixens.

Ara vos dirai de l’eixens [f. 18v] cal vertut a.

Nulla erba tant non profiecha a l’estomac et a tot lo cors en calque maniera que la uzes, cuecha o cruza, pero mais profiecha qui la cos en aiga de plueia. Et apres la pauza a la cerena, e cant sera ben freia et om la beu e profiecha mout a tot lo cors et ausis los verms.

E fa mout pissar e rent a las femnas las flors.

Per recobrar maniar. Ad home cant a perdut lo maniar prin de l’erba blanca, so es l’eixens, et un pauc de cilmontan, so es erba, e del nardre [e] de vinaigre, et aias tant de l’una erba con de l’autra; e pistas las e faitz las fort coire. E d’aquella aiga das li a beure, et aqui mezeis aura voluntat de maniar.

Per purgar ventre. Qui pren l’eixens e la ruda, aitant de l’un con de l’autre, et un pauc de pebre e de sal e faitz o coire en bon vin; e cant sera coit donatz o a beure e purgara lo ventre e gitara foras las malas umors.

Oinnement ad home. Qui pren lo suc de l’eixens et atretant de vinaigre, oinhes ne home o bestia: ia no·l tocara pueissas.

Per mal d’uells. Ad home que a mals els uuls prin l’eixens e pista lo ab mel e tu lo mit sus los uuls e gitara foras lo mal.

Per mal d’aureillas. Ad home que a mal en las aureillas prin l’eixens e perfuma las aurellas per tres ves o per quatre lo matin e·l ser atressi con l’erba es cremada, mais avant vol esser [f. 19r] cueita en vin, et er garitz. Si per aventura [de] l’aureilla issia brax prin l’eixens e pista lo e mescla hi de mel e mit desus lo mal en l’aureilla seguramenz. E sera garitz breumenz.

Ad home que tem mar. Ad home que tem lo mar beva lo suc cant devra intrar en mar, e no·l temera.

Per roinha. Ad home que a roigha en las mans prin lo suc de l’erba o l’erba pistada e mit la sus lo mal.

Per dormir. Ad home que non pot dormir prin l’eixens e fai lo flairar soven e dormira.

Per dormir. Ad home malaute que non pot dormir prin l’eixens e mit lo en un bel drap sotil e mit lo sotz lo cap del malaute, mais el non o sapia.

Eisens. Qui metia de l’eixens dintre sa caissa non intraria verme.

Per mal soz la lenga. Ad home que a mal sotz la lengua prin lo suc de l’eixens e de mel tot ensemps, calfa o e mit desus lai on er lo mal.

E si la malautia es blaua o negra entorn prin lo suc e del fell del bueu e pauzas o sus lo mal e sera garitz.

Per mal d’aurellas. Si alcuns a mal en las aureillas mit de cesta medecina et auzira, et oinhes l’en las aureillas.

Per mal d’estomac. Ad home que a mal en l’estomac prin l’eixens et oli d’oliva e fai o boillir ensemps et oing l’en la boca del ventreill e tot lo ventre tro al penchenill. E sera ades garitz et aura voluntat de maniar e retenra ades sa vianda.

 

[f. 19v] Per ortigua.

Ara vos dirai de l’ortigua cantas vertutz a.

Qui a lo mal que hom apella grofeus mange la ortigua ab lo vin e sanara.

E prena la grana de l’ortiga e mescli la ab mel e mange la e sanara. Per budell. E qui a mal en lo budel maior uze soven la grana de l’ortigua: sanar[a] ab mel.

Home que a tos beva soven l’ortigua ab vin e sera garitz.

E tol lo freg del cor; per ventre enfle. Ad home que a totas enfermetatz sobre dichas es bona la grana ab lo mel mescla. Qui a lo ventre enfle prena la grana de l’ortiga e beva la soven ab mel, e garra.

Per floironcx. E qui a floironx prenna las fueillas de las ortigas e sal e pistas o ensemps e pauzas o ensemps e garra.

Per nafra purgar. E qui vol purgar nafra prenna de las fueillas de l’ortigua ab sal e fai en enplastre e pauzas lo sus la nafra e purgara mout ben.

Per morsura de can. E qui sera mors de can prenna d’aquel enplastre sobre dich e meta sus la morsura e garra mout ben.

Per cranc. Ad home que a mal que a nom cranc prenna d’aquell emplastre e de bon vinaigre e pauze o sobre·l mal et er garitz.

Per perdre sanc de nas. E si alcuns homs volra perdre sanc per lo nas prenna lo suc de l’ortigua e meta dedins lo nas e perdra sanc demantenent. Et si pistar non la potz prin la fueilla e mit la dins lo nas e perdra sanc demantenent.

E si·n pert trop pistas de las ortigas, e del suc tu li oinh lo front e non n’issira plus.

Per pissar. Ad home que non pot pissar prin las ortigas moutas e fai las boillir fort en olli d’oliva e prenna aquel oli et oinha tot lo penchenill e·l membre e fara lo suzar e pissar e repauzar.

Per los cabels del cap. E si home o femena pert los cabels de la testa e los vol retener prenna la grana de l’ortigua e meta la en una escudela bella, et aia hi fort vinaigre et estia i tres iorns. Apres prin la grana et esgota la del vinaigre e pueis la pista fort; e cant l’auras pistada tu la mit en un bell drap nou sotil e blanc et esquissa lo fort ab las mans, e de so que n’issira tu oin lo cap. E confermaran ti los cabels e non cairan plus.

 

Aiso es la vertut dels ails.

Ara vos dirai la vertut dels ails.

Si serpent o escorpion avia hom mors mangi l’aill e valra hi mout; e si non lo vol mangar pista lo e mit sus la mossura et er garitz demantenent.

E mot profiecha ad ausir los verms.

Per morsura. Ad home que a morsura de can prin l’ail e pista lo fort e mescla lo ab mel e pauza o sus la morsura e garra.

Per mors de can. Ad home que es mors de can o d’autra bestia prin lo rest dels ails et els aills mesclament e fai los fort coire en oli, e d’aquel oli mit sus la morsura e sera [f. 20v] garitz.

Per aquesta mezeissa medecina prenes de l’oli on son los ails cuetz e·l rest. E qui a enfle los coillons que·ls oinha d’aquest oli e garra am Dieu.

Per femena que non si pot [purgar]. E si femena non si pot purgar cant es desliura d’enfant prena los ails e meta los sus lo carbon e d’aquel fum que n’issira perfume si ben la natura e demantenent purguar fa. Et aiso comanda Ypocras.

Per mal de corada. Ad home que a mal en la corada prenna ganren d’ails e fassa los coire en laig de fedas, et aquel laig el beva e sera gariz. Et aiso ensegna Diocles.

A mals del coillons. Ad home que a mal els coillons que·ls a enflatz prin de als e de plantage e pista o tot ensemps e friges o en l’oli d’oliva. E cant sera ben frig faissas ne ben los coillons e l’enfladura aitan caut con sufrir o poira, e garra.

Per mal de cap. Item si alcuns homs aura mal en cap prin los aills que seran cullitz ab l’escorsa e pista los, e d’aquels ails tu li freta los pols la nueg cant s’ira iazer, et er li mout bon.

Per mal d’aureillas. Ad home que a mal en l’aureilla prin un’auqua grassa et imple la d’ails e fai la coire en raust; e d’aquel grais que n’issira vos li metes en l’aureilla al caut soleill. Et aiso fai soven et er garitz.

A rauquige. Ad home que es rauxs prin los ails e rautis los en la braza e mange los la nueg cant [f. 21r] s’ira iazer, et er garitz.

Per enfladura. Ad home que a enfladura pistas los aills ab sayn de porc fresc e pauzas o sus l’enfladura, e garra.

Per cauda natura. Ad home que es de cauda natura a mestier que si guarde que non mange ails gaire, mas ad home que es gras et es de freia natura, ad aquels son bons a maniar los ails et ad home que tem lo paralite, car paralite es gota que tol lo poder.

 

Aiso es la vertut de plantage.

Ara vos dirai de la plantage sa vertut, et an i de doas manieras: la una s’apella plantage maior e l’autra minor.

La maior es bona a plagua que es trop umoroza, car aquella erba es eisucha et eisugua la plagua que trop es umoroza, car las humors deissendon a las plagas. E si prennes de la plantage e la pistas e metes i un pauc de mel e pauzas la sus la plagua, et eissugara la e la sanara e gitara totas las malas humors.

Per corrensa. Ad home quez a corrensa prin la plantage e cozes la fort en aigua e metes i un pauc de sal e de lentillas frezadas e donas l’en a maniar. Et er garitz.

Per sanc. Ad home que pert trop de sanc prenes la plantage e pistas la ben e pauzas la sus lo sanc et estancara si.

Per cremadura. Per cremadura prenes lo plantage e trazes ne lo suc; et aias de clara [f. 21v] d’ou e mesclas o ben ab lo suc et oinhes lai on er cremat; et aias de l’erba pistada, e pauzas ne desus e garra.

Per morsura de can. Per morsura de can prin lo plantage e, pistada, mit la sus lo mal e garra. E si a enfladura oignes o del suc.

Per mal de dens. Per mal de dens o de gingivas prin la plantage e fai la li ben mastegar entre las dens e meta la aqui on aura lo mal et tenga lai mout, et apres lave la boca de vinaigre. E fassa o soven e garra ab Dieu.

---

 

Ms. di Auch 

 

[f. 2r] [De l’arcemisa].

Aquesta premieyra herba ha nom arsemiza, car aquel que premieyramen a trobat aquestas erbas avia nom Arssemis.

Flors. Sy voles ben purguar la flors de las donas, pren arsemisa e coy la ben en aygua, e beu d’aquelha aygua ben cuecha e begua ne soven.

Item, si la dita aygua no li valia, pren l’archimisa piquada, crusa e destrempada en vy, e que ne begua, e guera, quar proat es.

Item, picada tota verd ... sada fa aver la ... .

Cura lo ventre. Item, aquel ... de...

Mayre...

Huels...

Contra fachilas ...

[f. 2v] Humors. Item, arsimiza fresca picada e lo suc mesclat en most, e quant sera fagz ben clar, val a totz los mals desus digz, e qui la ussa, coforta lo ventrilh, e qui la terssa, val a las entremenas e las sana de totas malas humors.

A glandolhas. Item, a glandolhas, ajas la dita erba picada am say de porc e tot essemps paussa ho desus, he guera e fara cap.

.... Item, a home que aja epi begut et es causa que fa hom trop dormir, e dona li a beure del suc en bon vy o del vi desus digz.

.... Item, degun home que porte l’arsimysa sobre sy no li pot noser deguna bestia salvaga ni venser ni everanar.

 

[De la bretonia].

... bona erba es cauda e seca al tres gra.

.... calor que ven es l’erba e qui la dita ..... los verms del ventre e lo denega.

 

[f. 3r] [De la ortigua].

Los pels. Item pren lo suc de la ortigua e·l gra vert e honcha·n lo cap a persona a qui cazo los pels, e retornaran ly.

Salir a cambra. Item, ad home que no pot issir a cambra, pren ortiguas e buelh las fuelhas en aygua e dona li a beure d’aquela aygua: essira a cambra.

Nafra. Item, a mors de ca e fa purguar brac de nafra: pren fuelhas d’ortigua picadas e met un pauc de sal e pausa desus lo mal, e guera.

 

[De la alh].

Raumas. Tessic. Alh: coy lo be en lait de cabra e dona lo a beure a home que a ..... a l’alen, e guera de tota flauma e d’estessic e de raumas.

Tos. Item, alh cuegz en aygua e soven begut es bo a tota tos de pietz e tol de sospira.

Aygua. Item, qui manga l’alh en degu, aygua que begua de tot lo ..... no li fara mal per caut que fassa.

Cap. Item, a tota dolor de cap, pren l’alh e coy lo be am favas e ..... aygua; oncha·n los polses la nuegz, e guera.

Ufladura. Vere. Item, a tota ufladura de serpen o d’escorpiho per fissadura, pren say de porc am las catre partz d’oly ho de la ..... e pausa lo sus la fisadura, que valra mays ..... ho plus fort sera l’alh e melhor.

Ufladura. Item, a tota ufladura, pren l’alh am say de porc mesclat ..... ho tot, e pausa ho desus, e guera.

Mors de ca. Item, a tot mors de ca fol, pica l’alh e mel tot mesclat e pausa ho desus e guera.

Vermes. Item, a home que a verms el ventre, coy l’alh moaut am vinagre fort cueit, beu ne e saliran foras del ventre, ho mes so l’estomac.

Fistolhas. Item, a mal de fistolas, soen pausat desus es bo l’alh a guerir .....

Fistolas. E per morenas fay so coma de las fistolas. Item, a fistolas, fay bolir l’alh am senres de visses que sian fort cuechas e apres, quant so sera fort bolit, lava lo ..... am aquelha aygua; apres met aco desus am una lia que se tengua, e que i aga un pauc d’oli d’oliva, e guera, mas que ho contunias de ser e de mati.

[f. 3v] Sanc. Item, a home que escupa sanc, dona li suc d’alh am vinagre, e guera.

Issir a cambra. Item, a home que aja mal de isir, pren alh picat e hon ne los pasturolhs. Guera.

 

[De la plantague].

Plantage, el n’i a de doas manieyras, major e menor, [qu’]es apelhada lansolada, mas ambidoas son de frejor en lo tres gra; emperho la major a may de vertut.

Nafras. Plantage picata e mesclada am mel es bona a tota nafra que braguege ho sia humoroza.

.... Item, a tot mal [d]e issyr, coy la plantage, dona li·n a manjar. Guera.

Cremadura. Item, plantage es bona a tota cremadura de fuoc, picada am glayra d’uau pausada desus, e guera.

... Item, home que sia nafrat e per la nafra muda de color, pausa desus la plantage picada, tantost li tornara sa color.

.... Item, picada, desobre pausada, gueris tota morsura de ca.

.... Item, masteguada entre las dens, tol tota dolor de dens e ufladura.

.... Item, a dona que pert sanc per la natura, pren suc de plantage en luna prima e pren lana surga, e banha la hon lo suc es e met la per la natura, e begua del suc am vinagre hon sia coyta la plantage, e guera, quar proat es.

.... Item, si hom beu del suc de la plantage, tol tota dolor de ronhos e de la vissigua.

Febre. Item, a febre tersana, pren tres raysitz de plantage que sian be picadas e mescladas am tres enaps de vy ho d’aygua, e que sia tot colat, e dona li·n a beure premier que lo fregz li vengua, e ayso meteys fay a febre cartana, mas que prenguas catre rassitz e catre enaps de bon vy ho d’aygua, e guera.

 

[f. 4r] [Del claul].

Vista. Lagz. Caul ha mot gran vertut e poder. Qui la ussa, val a la vista e dona mot a las donas de layt. Qui la usa, fa aver las flors a las donas e so [es] bos al ventre.

Item, caul ben cueyt, estren, e mal cueyt, alargua lo ventre.

Anca e costat. Item, la semen del caul, cremada e picada, tol tota dolor de hanca e de costat, mes sus lo mal, que sia caut, am un drap.

Embriayc. Item, qui manga caul cru en degu, purgua lo cap e·l denega, e tol que hon no se embriaygue.

 

[De la pastenagua].

Fege. Melsa. Pastenagua: la razitz e la semen an gran vertut. La pastenagua cueyta en ayga e d’aquela ayga beguda, gueris mal de fege e de melsa, que sia mauta quant bolhira.

Prensas. Item, la desus gueris mal de yssir e es bona al mals de ..... lombles, qui la ussa picada e cueyta coma d.....

Dens. Item, pastenagua, qui s’en fregua las dens, tol la dolor.

Vere. Ufladura. Item, la grana picada, beguda am vy, gueris de fissadura d..... e de escorpiho, e dona que sia uflada per lo mal de lo ....., que semble que sia prens, gueris, begua en degu l’aygua.

Cranc e fistolas. Item, la grana gueris lo cranc e las fistolas picada .....da am mel, e que sia en porvera premieyramen.

 

[De la salvia].

Flors. Salvia: qui la coy am mel, val trop a mal de fege .....

...enfant mort del cors de las donas e fa venir las flors a las donas e fa ben horinar.

Contra vere. Costat. Item, la salvia picada val a tota causa verenossa, e beguda, tol la dolor de costat, coyta am vy blanc ho aygua.

Palaticat. Lo menbre. Item, a tota manjadura de menbre d’ome o de natura de femna, la salvia en vy et am aquel vy lava ho soven. E guera de palaticamen.

[f. 4v] A restancar sanc. Item, se vols stancar sanc de plagua trenguada, pren la salvia e fay ne polvera e pausa la desus, estanquara se.

Floronc. Item, salvia picada am mel gueris floronc e·n geta lo brac e la fay essugar, la nafra.

..... Item, en la misma manieyra desus, es bona al mal que s’apelha buba negra ho lo mal de Sant Antoni.

 

[De l’amaviscle].

Amalviscle es bona erba, e qui li tol la flor, en mosa picada e [...]sobre la nafra, osta tota dolor.

..... Item, la raistz de la dita erba cuecha en bon vy, dona ne a beure a tot home que aja mal de yssir a cambra.

..... Item, gueris tot home que escupa lo sanc e fa gitar lo lach del cors de las donas que n’an abondansia.

..... Item, la grana e la raistz cueyta am bon vy gueris e fa gitar las peyras de la vissygua, de gravelha.

 

[De la anet].

Anet es caut e sec.

Qui l’anet coyra ben en aygua e d’aquela ayga beura, dona mot layt a las donas.

..... Item, picada e beguda en vy caut, val mot a fayre coyre la vianda, emperho qui trop la usa, tol poder de engenrar efans.

..... Item, l’anet picat e begut en vy o amb aygua, tol tota dolor de ventre e de budels, quant bengisso.

Glandolas. Item, a glandolas ufladas, pren la grana cremada e de solpre e, pausada, geris las glandolhas e las fa sequar.

Per los nervis ruatz. Item, la flor de l’anet picada, en holy mesclada, e qui aquel holy garda, gueris tot mal pres am fregz, e qui aura dolor al cap, guerira, e tota frejor. E ablandis de nervis ruatz a grozes per frejor, que dolho.

 

[f. 5r] [De la bretonica].

La vergua. Bretonica: qui la beu fa ben horinar e fa las peyras de la vissigua gitar foras del menbre, qui soen ne beu.

Uels. Item, las fuelhas picadas e desobre pausadas, sano tota dolor de uelh e tot cop.

Item, lo suc begut soven am vy gueris tota tos que apar que ecupa sanc ho .....

Nafra. Item, la dita erba gueris tota nafra de cap, picada e desobre pausada.

Per vista d’uel. Lengua. Item, la dita erba e ruda per engals partz picadas ensems, destrempadas en aygua cauda e d’aquela aygua soven beguda e las erbas maginadas entre las dens, queris tota la lengua e als huelhs esclarsis la vista e geta tot sanc macat de l’uelh.

Homit. Item, qui la bretonica beu en aygua cauda, gueris home de gitar e gueris tot mal de pietz e de fege e de melsa.

Ronhos. Item, pren tres on. de bretonica e quinze gras del pebre que sia tot picat ....., e destrempa ho am tres enaps de vy, que sia colat, e soven begut tol tota dolor de ronhos.

Ventre. Item, pren una autra onsa de bretonica que sia picada e destrempada am tres enaps d’aygua e beu ho tot caut: gueris dolor de ventre.

Febre. Item, a tota febre quartana e tersana ho cotidiana que vengua am ....., pren una onsa de plantage e doas onsas de bretonica que sian e... picadas en un pauc d’aygua destrempat, que sia colat, e que ..... begut dabans que li vengua lo fregz, tantotz sesa guerit.

Aganos. Item, una onsa de la bretonica picada en aygua e destrempada... e soven beguda gueris de tot aguanos quant an lo ventre .....

Umors. Item, la rayistz fort picada e destrempada am aygua bulida fort tot esems, fa gitar totas malas humors, beguda que sia.

Gitar foras. Item, tres pessas de la raystz que sian bulidas e destrempadas en bon vy e d’aquel vy begut, geta enfan mort ho viu del cors de la femna.

 

[De la vihola].

Emissit. De la vihola beguda gueris tot crebat, mas que sia en polvera e despendut a tot quant mangara, e tota pura ayta be.

Item, qui la porte no pot esser enverenat per degun vere ni per neguna bestia verenossa.

 

[De la bordolaygua].

[f. 5v] Sanc e menasso. Bordolaygua: qui la manja e bueu lo suc, estanca escoremen de sanc e tota menasso de ventre, quant j sal trop.

Uels. Item, picada, desobre pausada, tol tota ufladura d’uelhs.

..... Item, qui la manja d’estieu, no li fara mal lo solhel.

Ventre. Item, manjada am sal e am vi[n]agre, amolenca lo ventre, empero qui trop la usa, fa mal a la vissigua, que faria gravelha venir.

Escupy sanc. Item, manjada e lo suc begut, gueris tot home qui escupa lo sanc per la boqua quant a de marfondemen.

 

[De laytugua].

Lachuga es frega e humida, e qui la ussa, tol gran calor.

..... Item, sus lo ventre pausada, tol tota dolor cauda e refregura lo ventre e fa ben dormir.

..... Item, lo gra picat et am vy begut, tol mal de yssir a cambra.

..... Item, dona qui alache ni mange laytuguas aura pro layt.

 

[De l’ermoll].

Ermol es fregz el premier gra e humit el segon.

E qui la usa, amolenqua lo ventre e fa salhir a cambra.

 

[Del lire].

Cremadura. Lyry: pren la razitz ben cueyta e pica la e met hi d’oly rozat. Es bos a tota cremadura de fuoc ho d’aygua cauda.

..... Item, qui lo suc de la flor se honchara, tot lo cors li susara.

Nafras. Item, a tota nafra vielha o fresca a sanar, pren cinc partz de las fuelas del suc del liry e doas partz del mel e doas partz de vinagre, e coy ho tot essems, e garda ho be que res no val tan a sanar nafras ni a creyser carn de tota nafra.

 

[Del bollet].

Bolet es caut e sec el ters gra.

Fa gitar enfan mort. E picat am vi, begut, fa gitar enfan mort del ventre de las donas quant no·l podon aver. Las fuelhas.

[f. 6r] Raumas, flauma. Corpols. Item, pols de bolet manjat am mel e begut fa getar tot raumas e tota flauma e totas malas umors del pietz, escupir de corpols.

Prensas. Item, begut am vi caut, tol tota dolor del ventre e gueris tot mal de issir quant a cormen de ventre.

 

[Del nassitort].

Buba. Nasitort fayssat sus lo malh gueris floroncz e lo fa ubrir, e gueris tota dolor e tota mala buba ho carboncle.

De ca fol. Item, lo gra picat am bon vinagre begut, fa gitar los verms e gueris morsedura de serp e d’escorpio e de iranegz e de ca enrabios.

Serp. Item, la grana cremada sobre las brasas fa issir serp de qualque loc on sia quant sentira lo fum, a la boqua de la cava.

Anca. Item, tota dolor d’anca. L’erba e lo gra picat e mesclat am farina de froment e destrempat am vinagre e pausat sobre la dolor.

Pietz. Corpols. Item, a tota dolor de pietz, pren lo gra de la dita erba e pica la be, destrempa lo am layt de cabras tebezet e usa ho soven de beure, e gueras de corpols.

Ventre. Per issir a cambra. Item, per emolessir lo ventre, pren catre d. pessans del gra del nassitort e pica lo e destrempa lo en aygua cauda e beu, e fara te issir a cambra.

Tos. Item, lo gra picat am mel mesclat e soven manjatz gueris tota tos, per mala que sia.

 

[De la erugua].

Estomac. Tos. Aurugua es cauda e qui la usa de manjar, fa ben coire la vianda, e gueris tota tos.

Rompedura. Item, la raytz de la erugua ben cueyta e picada e pausada sobre lo mal hon a os romput, fa getar las esquirdas dels hoses trencatz se issir ne devo.

Rompedura. Item, qui aura res trencat en calque loc que ssia sus son cors, pren lo gra de la erugua mesclat am mel e trusat e am vy, e pausa ho desus, e guera. Tot caut.

[f. 6v] Lo sen. Item, la erugua picata e soven beguda ret son sen e lo ret ad home que l’aja perdut son sen per malautia.

Mangar. Item, lo suc de la erugua begut am vinagre mesclat, dona sabor de manjar e de beure.

 

[De lengua boyna].

Colera. Lengua boyna: qui soven la usa de beure, purga tota colera cremada en lo cors.

Malautia. Item, beguda am vy, purgua tota malautia del cors.

..... Item, beguda e manjada, purgua e cura las coradas e malas umors del cors de l’ome ho de la femna.

..... Item, la dicha erba serva lo sen e la memoria, solamen que la bevatz picada am bon vy, e se la usas, auras ton sen complit tostems.

Gaug. Item, l’erba cueyta mest autras viandas dona gran gaug.

Febre. Item, a tota febre que sia contuniada o tersana o cartana es mot bo lo suc de l’erba dita desus, beguda davan que avengua lo fregz.

 

[De la mostarda].

Mostarda es cauda e seca en lo cart gra.

Qui la usa de manjar, fa issir totas malas umors del cors de las gens e fa ben horinar.

Vere. Item, mostarda picada e desobre pausada am vinagre cura tot vere de serp e d’escorpio e morsedura de fol ca.

Sanc. Item, a dona que perda sanc per la natura, pren lo suc et ajas de lana surgua banhada en lo dig suc, e pueys met ho per la natura, e restanquara lo sanc. Proat es.

Ronhos. Item, lo suc begut tol dolor de ronhos e de vissigua. Item, de l’erba s’enten so desus.

[f. 7r] Febre. Item, a febre tersana o cartana que ve am freg, a la tersana, pren tres rassitz que sian ben picadas e mescladas en tres enaps de bon vy o am tres enaps d’aygua e dona li·n a beure dabans que lo freg li vengua. Et a la cartana, pren catre enaps de vi o d’aygua, et tres veguadas sera guerit.

Nas. Uelhs. Item, lo suc d’aque[s]ta erba gueris tot floronc que sia al nas ho a l’huelh, mas que sia pausat en la na e refescat quada dia.

Ufladura. Item, picada l’erba am say vielh de porc e desobre pausada, fa desuflar glandolhas e de tota autra ufladura.

Vissigua. Item, la grana picada en vi destrempada e pueys colat e tot caut begut, tol dolor de vissigua e cura home trop be.

 

[De papaveris].

Papaveris es sec e humit et a n’i de tres manieyras: [una a la] flor blanca e l’autra cay rosa e l’autra gruegua e blanca mesclat, e aquesta es la melhor de tot; es apelat salflor, empero la plus aprofechable es aque[lla que] a la flor blanqua.

Sanc. De sancflor pren las fuelhas, pausa desus, e guera.

Rauquieyra. Item, per tota rauquieyra que vengua per freg o per caut ..... o per trop cantar o per set o per fam o per massa manjar ho per massa beure, pren un d. pezan de papaveris e non plus, car sy trop ne prenias seria perilh de mort, da li·n a manjar ho a beure, e guera.

Dormi. Item, pren los caps dels papaveris quant son tenres e ples de layt en una hola nova, fay los bulir en aygua am la terssa part de mel, e garda o, quar aysso es mot bo.

Tos. Qui·n dona lo pes de un d., que fa hom dormir, e gueris tota tos e tot mal de issir, e garda te que non prenguas mas lo pessan de un d. totas veguadas, per morir.

 

[f. 7v] [De ruda].

Vista. Ruda es mot bona e cauda, e qui soven la beu, fa bona vista.

Luxuria. Item, qui la usa de mangar e de beure, tol tota volontat de femna.

Ventre. Item, ruda cueyta en ayga am un pauc de vinagre tol dolor de ventre.

Parlar. Piecht. Item, de l’alen. Et ayssy meteys beguda es contra plevazi que ve per estrenhement de piecht e tol que no pot hom parlar claramen, e gueris tot ajustamen de costat que se fassa en las costas per la cal hom escup sanc, e beguda, gueris de totz mals desus.

..... Item, la ruda es bo ans una malautia que a nom artizica.

..... Item, ruda bhanhada en holy caut e desobre pausada tol dolor d’anca.

..... Item, lo suc de ruda colat e begut tol tota febre, mas que am lo dig suc hom li honcha tot lo cors.

..... Item, qui la dita erba picata beura en vy, aprofiecha fort el cors.

..... Item, coyta en oli, picada, e sia tot begut e mangat, ausi los verms.

..... Item, contra aguanos, pren figuas secas e ruda verda, coy la am bon vy e faysa·n te lo ventre, e gueriras.

..... Item, si vols melhurar la vista, esclarssy, pren un fel de pol e suc de fenolh e suc de ruda per engals partz, e met d’aquo sus los huelhs, e auras los ben clars e bo vista.

..... cap ho autre bembre. Item, a dolor de cap, pren suc de ruda e d’oli rossat e vinagre per engals partz, e de tot aysso hon ne lo cap lay hon li dol. Ayso meteis es bo a tota dolor hon que sia.

Aurelha. Item, a dolor d’aurelha, pren suc de ruda e met lo en una closca d’amelha dossa, e pausa la sobre senres caudas, e tot caudet met ne en las aurelhas, e gueras de la dolor, quar proat es.

[f. 8r] Vere. Poysos. Item, un mege que avia a nom Mathides e sanava la causas desus digas e trobava que davant totas aquestas erbas es bona la ruda contra tot vere e poyzos.

Poysos. Sapias que lo digz Mathides, que era rey, el prenia vint fuelhas de ruda e metia un pauc de sal e mesclava y doas nozes e tres e catre figuas blanquas secas, e d’aysso mangava cascun mati en degu, e pueys no ly calia aver paor de poyzos de vere, ni nosa ad home que enaysy ne usse.

 

[Del mialhfuelh].

Mialfuelh es caut e sec.

Cranc. Picat e mesclat am mel e soven pausat desobre, gueris tot mal de cranc on que sia.

Costat. Item, lo suc begut premier e l’erba picata e desus pausada, gueris de tota dolor de costat. Item, lo suc begut fa ben horinar.

Boca. Item, es bo a tot mal de boca, qui lo porta sobre si, lo myalhfuelh.

Carboncle. Item, metes lo sobre lo carboncle o lo mal apelhat de Sant Antoni soven picat.

 

[Del fenolh].

Ronhos. Fenolh. La raistz ben cueyta en aygua o en vy e d’aquel vy soven begut, tol dolor de ronhos e fa be horinar.

Costat. Item, lo fenolh picat e begut am vy caut es bo a dolor de costat.

Item, la serp muda cad’ans l’escrirlhe per so quar lo contuni... mangar, si fara home se·l manga contuniadamen.

 

[De la seba].

Dormi. Cap. Seba: qui la ussa, ufla lo ventre e fa ben dormir e fa set e fa dolor al cap.

Dolor. Item, digz Galia que tot hom que mange seba en deju tostemps, tos tems deu vieure ses dolor.

Ca. Vere. Item, seba picata am vinagre meclada e desobre pausada, gueris tot mors de ca foal ho autre vere.

[f. 8v] Parlar. Item, si hom a perdut lo parlar, suc de seba begut am vinagre, tantot lo fa cobrar, e parlara. Proat es.

Umors. Item, se hom a massa de humors en la testa, pren suc de seba e met lo per lo nas, e fara ne issir totas las umors. Proat es.

Dens. Item, si cada mati te freguas las dens am suc de seba, non i aur[a]s dolor.

..... Item, si om a perdutz los pels de calque loc que sia, honcha s’en am lo suc de la seba, e metra pro pel. Proat es.

 

[Del pore].

..... Por es mot bo, so ditz Galia. Ad home que escupa sanc, que ne begua soven de suc del por, e guera.

..... Item, escalfamen de fege. Pren grana de por que sia ben picada e am vi begut, e guera.

..... Item, por picat e desobre pausat tol tota dolor de costat.

..... Item, si hom a perduda la calor natural, use soven lo por a manjar, e cobrara la. Proat es.

..... Item, suc de por en vy mesclat tol dolor de cors de ventre, begut.

..... Item, si home ho femna a re trincat dins lo cors, pren lo suc del por e da li·n a beure, e tantost fara lo penre e seudar.

..... Item, dona que velha enprenha, mange contuniadamen de pors e aga a far am home: enprenhara.

..... Item, fuelhas de por picadas e desus pausadas fan hobar totz floroncz.

Flauma. Tos. Item, suc de por soven begut am aygua d’ordi fa ben purguar lo piegz e·l denega de tota flauma que ve del cap, e gueris tos.

Dur ventre. Item, lo blanc del por perbolhit e pueis colat d’aquela permieyra aygua, e pueis coy los am autra aygua e la dita aygua darieyra fa gran be, qui la beu, ad home que a dur lo ventre.

Cors de ventre. Item, aquela meteyssa aygua beguda en vy restanca mal de issir.

[f. 9r] Tos. Item, suc de por colat e mesclat am lag de dona es mot bo a tota tos, per vielha que sia, e cura fort l’alen e tota flauma.

Aurelha. Item, a dolor d’aurelhas, pren suc de por mesclat en un fel de cabra e d’ayso met li·n dins las aurelhas, e guera tantot.

Ronhos. Item, a tota dolor de ronhos, pren suc de pors que sia soven begut en vinagre, e guera. Proat es.

Trencat. Item, a bras trencat ho as autra trencadura, pausa desus pors picatz, e faras tantot penre.

Poder. Femna. Item, qui soven manjara pors aura gran poder de tornar am femna.

 

[De creyssas].

Huels. Creysses picadas e desobre pausadas tol tota duressa e ufladura de ulhs.

Cremadura. Florons. Item, picada e desobre pausada gueris tota cremadura dels uelhs e los flourons.

 

[Del caul salvage].

Caul salvage es apelhat calmela, es cauda e seca.

Ventre. E la rassitz picada e soven beguda en vy gueris tota menasso de ventre.

Gravelha. Item, la dita erba manjada cueyta o cruza e lo suc begut ..... soven am vy corop e trenca e fa issir peyra de la vissigua.

Lebrozia. Item, lo suc de la dita erba colat e mesclat am farina de froment fa abaysar lebrozia, qui ne honcha tot lo cors.

Golha. Item, lo suc destrempat am farina d’ordi e fagz enplaustre gueris tot mal de golha, mas que i ssia soven paussat sus la hon aura lo mal.

 

[De la sedrieyga].

Sedriega es cauda e seca.

Fa getar enfant mort. Picada e mesclada en mel, cueyta, fa issir l’enfant mort del ventre de la mayre.

Horinar. Item, qui la dita erba usa de manjar ho de beure, fa ben horinar.

[f. 9v] Umors. Item, beguda o manjada, fa getar [e] ecupir totas malas humors e tot mal ajustamen que sia ajustat en cors d’ombre o de femna.

Tota dolor. Item, aquesta herba soven beguda en vy caut gueris tota dolor que se fassa en lo cors de home o de femna. Proat es.

..... prens. Et aquesta herba ha aytal vertut que dona que sia prens non deu manjar ni tener per so que faria mal al prenhat.

Vomir. Item, picada en vi, beguda, gueris mal de gitar per vomit.

 

[De la nepda].

Nepta es caut e sec.

..... Et es trop bo contra tota gotassa nepta picada, et enfayssan lo loc la hon es la gota, e fara la secar e gitar dels osses e de las messolhas.

..... Item, contra mors de bestia verenossa, la dita erba desus pausada, no li fara mal la nafra. Proat es.

.... Item, beguda en vy, geta del cors tot vere e ausis los verms.

..... Item, qui la rayssiz porta liada al col, val mot al mal de tera, mas que beva soven del suc de la nepta.

..... Item, son doas manieyras d’aquesta erba, lo mascle e·l feme. E conoys hom lo mascle per so quar no fa mas una raysitz tota drecha e la femelha ha motas rassitz escampadas.

 

[De la mellissa].

..... Melissa es erba de la cal la abelhas se asauto fort, e qui vol aver motz bornhos, pice d’aquesta herba mesclada am lag e honcha nne los bornhos, e jamays la abelhas no s’en partiran d’aqui.

Vere. Item, si abelha o serp o escorpio t’a fissat, pausa desus l’erba, e gueras.

Lopia. Item, a mal de lopia, pren d’aquesta erba picada am sal e soven desus paussada entro que la lopia sia fonduda, e a tota persona e a tota bestia fay o, e guera.

Malautis. Item, a home malautis, pren la rassitz de la melissa e coy la en vy e daver mati begua dal dig vy, e guera.

Gotassa. Item, coyta la melissa en mel mesclada e d’ayso mangatz un plen qulier lo mati, apres estia de manjar gran tems, e guera de tot mal e may de gotassa.

 

[f. 10r] [Del coliandre].

Coliandre es mot caut e sec he a un pauc de fregor.

Verms. Dis Gualias: qui aquesta erba beura picada en bon vy et en vinagre, ausis los verms may que res que sia.

Sant Antoni. Ronha. Item, contra foc salvage que es apelhat fuoc de Sant Antoni, fay aytal enguen: pren escuma d’argen e de farina de fromen e de suc de coliandre et de vinagre e d’oli rossat. Tot aysso tu mescla e pica ho tot essems be fort en guiza que sia ben espes, e amb ayso tu hon lo mal al solhel o al fuoc, e guera. Aquest enguen es bo a tota ronha hon que sia.

Esclafolhas. Item, contra sclonas, pren farina de favas destrempadas am suc de coliandre et aysso tu li pauza soven desus, e guera.

Febre. Contra febres cotidiana, pren coliandre que sia ben cueyt en aygua e met hi de sal, e d’aquelha aygua tu li dona a beure per tres dias, e guera.

 

[De la gensana].

Gensana, segon que ditz Papiens, es fortmen cauda.

Ronhos. Fege. Aganos. La rassitz cueyta en vy tol dolor de fege et de ronhos, e tot home qui la use non aura mala tos ni aguanos, beguda, ho lo vy en que es cueyta.

De costat. Item, gueris mal de plevesy e si home escup sanc, e tol dolor de pietz e tota manieyra de sospirar, e tol dolor de costat e del cor. Es bona la rayssitz picada en bon vinagre, mangada, e beut lo vinagre.

Vere. Item, fa getar tot vere de serps o autre del cors e malas umors d’ohme.

Uelhs. Item, qui la coy en bon lissieu e s’en lava soven lo cap e la cara, gueris home que aga ploran los huelhs ni los parpels del huelhs reverssatz enfora.

Gensana. Ufladura. Item, la razitz picada e cueyta en bon vy e desobre pausada, es mot bona ad un mal que hom apelha paracge, que es mal que fa los brasses e la[s] campas desuflar d’ome.

Mal de tera. Item, lo suc d’aquesta herba es mot bona a l’ore mal et al mal de plevesy et a tota dolor hon que sia.

Contra lo demoni. Item, ad home que sia endemoniat, perfuma lo en guyessa que lo fum de la dita erba li entre dedins lo cors, e tantot issira ne, que la hon la dita erba sia lo demoni no demora.

Enfan mort. Item, lo suc begut e de l’erba fayssada sus lo ventre, fay l’efant mort del cors de las donas salir foras.

Uflat lo membre. Item, la rayzitz picada e desobre pausada es mot bo al menbre quant es uflat.

Umors. Item, dona que aja la mayre enpachada d’umors, lo suc mesclat am mira e soven begut caut purgua totas malas umors del cors.

 

[De l’emperador].

Grandoni que foc enperador mostret la vertut de las set herbas e cascuna d’aquelas a sa vertut de sa planeta.

 

[f. 10v] [De afrodillus].

Affreodillus es la premieyra de las set herbas desus ditas; es de la planeta que a nom Saturnus.

Cambas e genols. Lo suc d’aquesta herba es mot bona a tot home que a mal en los ginolhs o en las cambas.

Demoniat. Item, la sua razits un pauc cueyta en aygua es bona a tot home que sia endomiat ho folh.

Malenconic. Item, tot home que sia malenconic que la porte envolopada en un pauc de drap de ly, lo resta e li decassa tota malenconia.

Demoni. Item, hostal hon aquesta erba sia non i pot abitar demoni, ni ad home que la porte nosser.

 

[De la peligonia].

Peligonia es la segonda erba desus dita, es erba del solhel.

Totals malautias. Aquesta erba sana totas las malautias del cors, aco ve que aga la vertut de sa planeta.

Frenatitz. Item, qui porta la razitz de la peligonia sobre son pietz gueris mal de frenetic e de guitardia, que es mal de dormir, e de plevesy, et a persona a qui pudysca l’alhe, que lo li fa bo.

Dona. Sanc. Item, qui porta la razitz, tol mal d’uelh; es bona a dona que perda sanc per la natura.

 

[De squinasbatos].

Squinasbatos es la terssa erba, es de la Luna.

Melsa. La fuelhas picadas e desobre paussadas guerisso mal de melsa.

Dostat. Del rey. Item, lo suc d’aquesta erba es mot bona a cofortar lo ventre, e far coyre la vianda, et bona ad esclonas e a mal de colica pazio.

 

[Penthaphilon].

Penthaphilon es la quinta erba et es de Mercury.

Nafras. E la razitz picada e fagz enplautre sana tota nafra e tot mal ajustamen, e sy soven es beguda, gueris esclonas.

Ardimen de parlar. Lo mal del rey. Item, qui aquesta herba am sy portara aura gran ardiment de parlar davant tot home; tot so que demandara, sia rey [fol.11r] ho enperayre o qualque sia, grassia li sera donada ses condisio.

 

[De la jusquiamus].

Jusquiamus es la seizena erba, es de Jovis.

Buba. La razitz picada e desus pausada gueris tota mala buba ho carblonchels.

No aura buba. Item, qui la dita razitz sobre sy portara, jamay la mala buba non aura.

Alegrier. Item, lo suc mesclat am safra o am mel begut, es mot bo, que dona gauch e alegrier al cors, qui·n beu un pauc. Proat es.

 

[De la colombina].

Colombina es la setena erba, es de Venus.

Mal del rey. La razitz picada e paussada sobre lo col gueris de esclonas.

Len. Item, gueris e sana tot home que aja mal a l’alen, mas que ne sia fag emplaustre e pausat sus lo ventre.

Len. Item, lo suc mesclat am mel et en aigua gueris tot mal de len, e fa gran be a la dita len.

Demoni. Item, en loc hon la dita erba sia non i pot demorar demoni.

Horina. Item, gueris tot home que no po tener la horina.

 

[De l’apit].

Apit es caut e sec al tres gra.

Huelh. Lo suc es mot bo a tot mal de huelh, que ne sia fag enplaut e pausat desus, e tol tota dolor e tota malha que sia dedins los huelhs.

Ventre. Tos. Horinar. Item, lo suc begut soven ajuda fort al ventre e·n geta totas malas humors e fa trop be horinar.

Gitar. Tos. Item, lo suc soven begut gueris tota tos e gueris hom de mal de getar.

Febre. Item, ad home que aja febre, dona li del suc a beure en aygua dabans que li venga lo freg, e guera.

Apit. Febre. Item, pren lo suc de l’apit ad home que aja febre continua, honcha lo cap am lo suc desus mesclat en oli et am vinagre.

Gavar. Item, a home que aja guavars, pren apit e fenolh e per engals partz, e sia begut lo suc, e fara lo guerir e de tot desuflar, e fa gran be al fege.

Loms. Ronhos. Item, apit cueit en oli et en vy es mot bo a dolor de ronhos, mas que sia desus pausat.

Nafra. Item, lo suc mesclat am farina et am bojols d’uaus cura tota nafra e li fa metre belha carn.

 

[f. 11v] [De la ala].

Ala es freja al miech del segon gra.

Issir. A conceparatio de ventre, begua lo suc de la ala e fara hom issir a cambra.

De frenetic. Item, a mal de frenesi, pren las fuelhas de la ala ben cueytas en bon vy et evolopa li·n lo cap e·ls polses, e fara li abaysar la malautia.

Silhas. Tos. ltem, contra mal de silhas, pren ala e fuelhas de laury e sia ben picat e desobre pausat, e tolra la dolor. Item, contra la tos.

Dolor de pieg. Fege. Item, ala picada be fort am de pebre et am safra et am comi et un pauc de ruda, mas primieyramen lo comi sia en lo vi e tot molhat, que sia ben cueyt am de mel. El mon non a tan bona medessina de dolor de pietz e de dolor de fege.

 

[De la flumina].

Tos. Flamina sequada e polverissada et aquela polvera beguda en vy, tol tota tos.

Colera. Item, picada e desobre pausada e beguda, fa getar mala corelha del ventre d’ome.

Nafras. Item, la razitz picada e polverissada e mesclada am mel, gueris tota nafra hon que sia.

Uelhs. Item, contra tota escurdat d’uelhs, que es a vejayre ad home que una pauca causa sia gran, pren flamina, eris e blanladre blanc e de tot fay polvera, e pueys sia cueyt en mel, e d’aysso tu pausa sus lo ulhs, e tolra li tota escurdat, fara los ulhs tot clars per regardar lo solhel.

 

[De la camamilha].

Camamilha es cauda e seca al tres gra et a n’i de tres manieyras, la una ha flor blanca e l’autra negra e l’autra peperiala, [qu’]es la melhor de totas tres.

Dormi. Item, aquesta erba beguda am vy, fa ben dormi e fa ben yssir las peyras de la vissigua.

Ventossitat. Item, beguda am vy caut, tol tota ventossitat.

[f. 12r] Fege. Item, contra aviama. Aquesta erba cueyta en ayga gueris ses topte mal de fege.

Costat. Item, contra ufladura de costat, pren la camamilha bulida en holi e d’aquel oli honcha·n am lo ma, e gueryras del mal.

Huels. Item, contra una malautia d’uelh qu’a nom gillopia, pren la dita erba mesclada entre las dens, desus pausada: aura los uelhs clars e gueritz.

 

[De ortigua].

Ortigua es cauda e seca al mieh del segon gra.

Estomac. Aquesta erba cueyta es bona a far coyre la vianda del ventre de l’estomac.

Estropiayc. Item, lo suc d’aquesta soven begut es bo a tot home itropic e a tot home que aja mangat bossi entoysseguat.

Colera. Item, fa issir tota colera del ventre hon que lay n’aga.

Tos. Item, secada e poverissada en mel mesclada e manjada, tol tos.

Uelhs. Item, lo vy am que l’erba sera ben cueyta, es bo a lavar los uelhs.

Malautias. Item, dis l’actor que lo suc soven begut es bo a totas malautias del cors.

 

[Del jolvert].

Golvert es sec e laxatieu.

Umors. Ventre. Qui usa lo jorvert de beure e de manjar, geta totas grosas umors del cors e coforta lo ventre e dona volontat de manjar e fa getar las peyras de la vissigua.

Sanc. Item, lo suc soven begut restanca sanc que jeta de cors.

Gitar. Item, lo suc mesclat am mel et am vy begut tol de gytar.

Item, las fuelhas picadas sobre pausadas val a dolor de cor.

Aurelha. Item, contra dolor d’aurelhas. En oli lo suc colat e mesclat am oli rossat, met ne en las aurelhas, e tol la dolor.

Tos. Ventre. Item, lo suc soven begut es bo a tos, es bo a dolor de ventre.

Pietz. Item, contra tot mal de piech, cuytz en aygua lo golvert, beguda l’ayga, e guera, mas que ne beguas soven.

De foc. Item, la razit del golvert cueyta en holi desobre pausada gueris tota cremadura de fuoc hon que sia.

Artisiqua. Item, la dita erba ben picada e soven beguda es bona en una malautia que a nom artizica.

Pissar. Item, la razitz del golvert bez ras e netas, bolidas am vy blanc ho am aygua, e beguda l’aygua ho·l vy, fara pissar fort.

 

[f. 12v] [Del ysop].

Yssop es caut e sec en lo ters gra.

Tessic. Per alenar. Corpols. Qui pren isop e figuas cequas e mel, e sia tot ensems cueit en bon vy, e d’ayso sia donat a beure as ome que aja tessic e lo use soven, e guera, e alargua fort lo pietz e l’alena.

Raumas. Item, contra lo raumas, ysop ben calfat en un test al fuoc, e d’aquel ysop tot caut evolopa t’en lo cap e vay t’en gazer, evolopa te be que suses fort, e seras guerit.

Jnsivas. Dens. Item, las jnzivas descausadas. Pren de l’yssop e coy lo ben en vynagre e lava t’en las jnzivas mati e ser. Gueriras.

 

[Del aristologio].

Aristologia es herba freja e seca al premier gra.

Poyridura de cors. Lo suc begut purgua poyridura de tot empachamen que sia dedins lo cors.

Sanc ecupir. Item, lo suc begut soven gueris tot plevesy, que es un mal que hom escup lo sanc.

Per gitar fors fer. Item, si hom a espina o fer en loc ficat, la dita herba picada e desobre pausada la·n geta tantot prestamen.

Ventre. Item, lo suc soven begut dessufla tota dureza de ventre, tol la dolor.

 

[f. 13r] [Del serpol].

Serpol es caut e sec.

De cap. Lo suc mesclat en oli rossat, uncha·n lo fron e·ls polses, e ostara la dolor del cap.

Per tota dolor. Item, contra dolor de la melsa, pren lo suc e mescla hi un pauc de vy e d’ayso begua soven, e purgua la melsa de tot mal e tol tota dolor.

Fege. Item, la dita erba picada am vy soven beguda, tol tota dolor de fege e lo denega e lo purgua.

 

[Del marog].

Malrog es sec e caut al segon gra.

Tessic. E que tot home que aja tessic prengua lo malrot picat am mira e tot essems sia begut soven, e purgua fort e tol dolor de costat.

Costat. Febre. Item, lo suc es mot bo contra febre terssana, begut davan que vengua lo freg.

Nafra. Item, contra nafra, frenca la erba del marog picat, desobre pausat fa sanar meravilhosament e metre carn.

Malautias. Item, dis Galias que lo suc ben colat, secat al solhel en una molha e ben estugat, quant n’auras beson, destrempa am de vy, e val a totas las malautias del cors desus ditas ses falir, despendut en degu.

 

[f. 13v] [De la vize de vinha].

Vyse de vinha es medessinal segon que dis Ysac.

Uelhs. E dis que quant la vinha se poda que la vit geta ayga, e fa la mot bon culir: es mot bona a tot mal d’uelh e agusa mot be la vista e tol tota laganha e restrenh tot hom qui la beu.

Cap. Ufla[d]ura. Item, a tota dolor de cap, pren las fuelhas de la vit e coy las e faysan lo cap, e tolra te la dolor e tota ufladura.

Sentery. Item, las fuelhas de la vit picadas e lo suc begut, es bo a mal de ssentery.

Fistolas e vere. Ca fol. Item, contra fistolas, pausa sus senres de vizes, e las ditas senres mescladas en oli; es mot bo [a] veri enduressit, e aysi meteis es bona a fissadura d’escorpio e de ca enrabios.

Pels. Item, lo suc de las fuelhas mesclat en oli, perhonchar lo loc hon volras que hom meta pels, e metran n’i. Proat es.

 

[Del vinagre].

Vinagre es freg el premier gra e sec el ters.

Mangar. So dis Isac, que es mot bo a tota dieta e dona apetimen de mangar.

Ventre. Sanc. Item, dis Plenis que vinagre es mot bo a descoremen de sanc e de ventre.

Ventre. Item, dis que qui usa vinagre, si troba lo ventre empachat, que lo dessempacha e lo denega, e si lo troba bueg, que l’omplis.

Boqua. Dens. Item, a dolor de gingivas e de boca, qui soven las lava, que li tol de las g[i]nsivas, quar poroat es.

 

[De gantaria].

Gantaria es cauda e seca al tres gra, e·ls autres apelon la fel de seyra. Es fort amarguan e a n’i de tres manieyras segon al cors, mas per sert non a mas de doas, major e menor; e a may de vertut en las fuelhas [e] en las flors que non a en l’al ras de l’erba.

Dens. Item, lo suc es bo ad home que aja las dens descausadas.

Verms. Item, lo suc mangat am mel ausis los verms.

 

[f. 14r] [De la scabiosa].

Scabioza es mot bona a mal de polmo.

Lo pietz. Joventut. E qui la usa, purgua lo piech e coserva joventut.

Postema. Item, es bona a tota postema que sia dins lo cors, qui la fa beure o mangar.

Per guerir encastre. Item, es bona ad un mal que a nom encastre, l’erba picada e sobre pausada, tantost sera guerit.

 

[De la] menta.

Estomac. Item, la menta, qui la ussa, conforta mot l’estomac quant es febles, que no pot degerir la vianda.

 

[De la fava].

Fava es frega e seca, si don non es mangada verda.

Mezol de fava es fort modifficativa.

Uels. Item, mesclada e pausada sus los polses trenqua totas malas humors que se fason els huelhs.

Nafra. Sanc. Item, trenquada e pausada sus una nafra ont esta massa sanc, que la restrenh e la estanca que no sanne; sia en polvera.

 

[De l’aygua ardent].

Ayga ardent ha aytal vertut que fa coyre huous estant dins l’ayga freja.

Vi torbat. Item, restaura vy torbat e coromput que lo fa tornar bo.

Postema. Item, si hom la beu, corromp tota postema que hom aja dedins lo cors e defora.

Per gitar foras. Item, ayga ardent geta tot fer que hom aja ficat al cors ho en calque loc que sia, mas que hom ne meta desus.

Uelhes. Item, cura tota rogor d’uelh e restrenh la lagremas.

Melsa. Fege. Item, es bona a tot home que aja mala melsa o mal fege.

Cranc. Item, es bona a tot hom que aja cranc o fistola, meten ne desus.

Paralesis. Item, beguda, cura mal que ha nom paralesi.

Memoria. Joventut. Item, aguza l’entendemen e fa bona memoria e conserva joven e dona gauch e alegrier.

Cremadura. Item, a cremadura de fuoc en la cara, molhatz ho fort am l’aygua arden, e sera prestamen escantit lo fuoc e non i parera, mas que sia fag holi am d’uohus de galinas e sia honchat tot jorn.

[f. 14v] Flauma. Tos. Item, l’aygua arden cura tota tos e la flauma, qui la usa.

Dolor. Item, cura squinancia e la dolor; ausitz moscas et autras bobas.

Vy. Item, si·n mesclas en vy novel, lo fara tornar coma vielh.

Pudor de las dens. Item, qui la usa, tol dolor de dens e pudor de nas e de insivas.

Item, [qui] la usa, trenqua las peyras de sas vissiguas.

Febre. Item, qui soven la usa, tol dolor de febre cartana.

Item, es bona e malha a lebrossia, que no pot esser lebros qui la usa.

Coseubre. Item, aparelha las mayres a las donas per coseubre enfan.

Raumas. Item, qui la te en la boca, cura de tot raumas.

Cap. Item, a dolor de cap, per frejor. Qui ne molha lo cap, pert la dolor.

Tremolamen. Item, qui la usa, fa home ardit e tol tremolamen de membres.

Prusor. Item, osta la prusor dels pes.

Malenconix. Item, es bona als endemoniatz e malenconix.

Uelhes. Item, es bona a tot home que aja los uelhs reverpelhatz, qui s’en lava soen, tornaran e[n] lor vertut.

 

[De la flor de romani].

Per tota malautia. Pren la folreta del romani e lia la en un drap e fay la coyre en aygua entro que sia mermat per meytat, e pueys estuga aquelha aygua; e, beguda, val a totas malautias del cors del home o de femna, mas que la use.

Dens. Item, carbo de romani liat en un drap vert e s’en fregua las dens, las tenra bonas e sanas tostems.

Pes fort. Item, pren d’escorsa de romani e fuelhas de laurier e de tot essems perfuma t’en, e guera te del raumas.

Pes fortz. Item, las razitz de romani bulhidas en vinagre, sian ne lavatz los pes, e auras lo fortz e fermens tostems.

Somy. Item, fuelhas de romani pausadas jos lo lieg, e gardara te de far mal somi.

Los menbres. Item may, fay cremar lo romani e fay ne estuba, estuba t’en be, e aquelha estuba coforta totz los menbres.

---

 

Ms. di Chantilly, versione in versi 

 

 

I.

[f. 46r] De l’artimiza.

1. De l’artimiza vos diray  
2. tot sen que say.    
3. A las donas plus que aut val
4. [.....]
5. aquesta herba lur fa ben,    
6. en lur camiza ben aven,
7. si beven l’ayga [.....]
8. [.....]
9. o d’autra guiza o poden fayre,
10. si ben [s’en] enfuman la mayre.
11. O si la pican am pur vin,
12. [e la beven ser e matin],
13. o tota fresqua ben pizada 
14. sobre lo ventre sie liada. 
15. L’enfant mort gieta e mot val 
16. si la femna la met daval:
17. la mayre amolega si es dura
18. e li tol tota enfladura.
19. E qui la beu fa orinar
20. e atrencar la peyra, e si n’a  
21. que aura lo gruoch may
22. beva la am vin que mot y val.
23. Si on a goytio en gergezon
24. ambe sage fresch la meta on
25. e sia dessus [tota] pauzada  
26. e beva l’erba am vin pizada.
27. Si alcun a opi begut
28. per [que] motz homes son perdus
29. que dorman tant troque son mors,
30. beva la am vin e valra mot.  
31. Qui l’artimiza portara
32. lo iorn fraytiras non sia;
33. ad el non ven per far dammage
34. ni alcuna bestia salvage
35. ni ocexar ni autre non
36. li fara mal en nulh [.....]
37. a tot aysso es bon [.....]
38. e si lo suc beves am vin.
39. Qui l’erba fresca pizera 
40. e en vayssel la pauzara
41. lo vin valra ses contradir 
42. a tot aysso qu’es dessus dit, 
43. e aura mot plazent sabor,
44. e si a de bona flayror; 
45. [e] lo ventrel confortera       
46. e la corada sanara.
47. De l’artimiza am tant dir lays.

II.

De la brona.

48. De la brona diray huemays.
49. Qui l’ayga on cos la brona beu 
50. mays en valon los nervis sieu 
51. ni pot avol pies aver 
52. ni tos ni estomac per ver. 
53. E si tu as mal en l’esquina 
54. aysso ti es bona medicina 
55. pero may ton pron en faras  
56. cant am vin cruza la beuras:
57. e ensi fa ben orinar
58. e la cara fa fort mondar,
59. e val a la gota de l’ancha,
60. vermelha fa camiza blanca.  
61. [E] si [lo] serp[en] la sent fuch, 
62. [ays]so es cert mantenent, cug,
63. e si serp[en] home mordia 
64. begues del suc [e] guerit sia.
65. E si alcun home es afebrit   
66. [.....]
67. e beu lo suc ambe ayga clara
68. lo frech de tot [lo] dezampara.
69. E si la cos en oli pur 
70. e s’en hon tot sia segur:
71. los lombrix aussis fermament 
72. [f. 46v] qui ambe vin la beu soven.
73. Pren d’aquest’ herba ton plen ponh 
74. e de pan blan e de codonh 
75. tot ensemps, e tot sia cueyt;    
76. emplastre fay sol un miech  
77. si as dolor ni cremazon 
78. dintre los huelhs, car tro es bon. 
79. Si intra en cara tronq ni espina 
80. aquest[a] herba [es] tre fina  
81. si dessus la metes pizada 
82. per si, o ambe sagi mesclada. 
83. [E] qui la vol sovent uzar 
84. davant maniar ni pueis seguentar.

III.

La vertut de l’enssens.

85. Ayssi parleray de l’enssens    
86. que es bon congut a tota gent  
87. e diray te de sa vertut. 
88. Non es herba que plus aiut 
89. al ventrelh ni plus lo mantenga 
90. en qualque guiza on lo prenga,   
91. pero may val si es cueit ben  
92. en ayga que de plueia ven  
93. e pueys sie al fre pauzada,  
94. e cant sia ben refreiada  
95. e on en beva asses e pron     
96. al ventrelh [li] fara grant pron  
97. e may que los lombrix aussis  
98. e l[o] ventre amolezis. 
99. Orinar fa de bona guiza  
100. e rent a femna sa camiza.      
101. Pren de l[o] nart que ven de Franssa  
102. e d’enssens per egal balanssa,  
103. [e] cant o auras tot pizat  
104. ambe molsa sie destrempat;  
105. aysso beva femna soven,     
106. sa camiza aura sobremen.
107. Pren un pauc de silermotan  
108. e del nar [picat] pren aytant,  
109. de vinaygre e del suc d’enssens  
110. pren atressi tot egalment,      
111. pren aquo que fa apizar  
112. e met tot en l’altra temprar;  
113. pueys o bolh fort e cola o ben:  
114. aysso val sobre tota ren
115. a hom que es descalentas     
116. si el en beu en dejun assas. 
117. Pren d’enssens e de ruda egal 
118. e un pauc de pebre e de sal
119. e [met] dintre tot egalment  
120. e sie tot pizat ben e gent      
121. e sie tot pizat en bon vin,  
122. e d’aysso beva lo matin:
123. lo ventre [fort] ti purgara   
124. e las humors t’en caussara,
125. que cruzas son e del mal ayre
126. [.....]
127. Piza enssens ambe ayga fort  
128. e d’aysso te fay onher fort:  
129. ja [.....] noyre non ti poyra
130. ni la flayror non soffrira.      
131. Pren de l’enssens e d’api egal  
132. e beu lo suc per lo gruoch mal:  
133. lo fege gueris sen duptanssa  
134. si on lo pren am lo nart de Franssa. 
135. [Lo suc] al ventre aiuda fort 
136. si on lo pren am vinaygre fort. 
137. Si serp[en] mort subitament  
138. ambe lo vin beva d’enssens. 
139. Mescla lo suc ambe mel cueyt  
140. e met en en los huelhs de nuech       
141. car [bels e] clars los ti fara  
142. e l’escurdat t’en caussara. 
143. Si las aurelhas te clauzen  
144. de l’enssens las perfuma ben  
145. dos jorns o tres ser e matin     
146. cueyt en ayga o en bon vin.  
147. Si brach t’en yeis sia pizat
148. l’enssens an mel dessus pauzat.
149. A nafra fresqua fa grant ben  
150. enssens pizat sens autra ren.   
151. Si on lo met dessus ambe un drap,  
152. el tol los flaironx del cap. 
153. Si en l’ayga on cos se banha on  
154. gratigi tol e mermason. 
155. Si tu tem d[ormir] sobre mar   
156. cant en lo lin volras intrar 
157. beu de l’enssens ambe vin pur  
158. pueys potz anar [f. 47r] per mar segur. 
159. Si as la lenga dura trop  
160. met sus d’enssens e guerra tost.       
161. Qui de nueyt dormir non poyra  
162. trenque enssens e dormira. 
163. Si malade non pot dormir  
164. fay enssens tot fresc culhir  
165. e met lo li dessus lo cap       
166. que el non o veia, en un prin drap:  
167. al cap li fara mot grant pron  
168. e dormira suau e pron. 
169. L’enssens sie cremat tot sol  
170. e mescla o am la sera la pols   
171. e onh ton cap ben [e] soven:  
172. los pels fa negres ben e gent. 
173. Ja en l’arca on enssens sia  
174. arna denguna no·s faria. 
175. Si on [a] enflazon sos la lenga   
176. de suc d’enssens e de mel prenga  
177. e mescle o al fuec azaut,  
178. e pueys ten o en la bocha caut. 
179. Si as li huelh detorn negre ne blau  
180. aysso ti gueyra e suau:
181. mescla ennsens an fel de buou
182. si que pells sie entre tot un huou.
183. E d’aysso met dins l’aurelha
184. si ella ti torna o ti rondelha.
185. Pren enssens fresch e cos lo ben       
186. en oli pur sens autra ren,
187. e d’aysso onh lo ventrelh: 
188. a tot mal ti dara conselh. 
189. Si vols far carta per durar  
190. fay te tencha destemprar    
191. ambe vin en que bolha enssens. 
192. pueys n’escrieu segurament  
193. que may rata no·l roygara  
194. ni arna non la tocara.

IV.

De l’ortiga.

195. Mantenent diray de l’ortiga   
196. que·ls sieus tocadors castiga. 
197. Si on la pren ambe vin soven  
198. lo mal gruoch cassa ben e gent. 
199. La grana ambe mel mesclada ben  
200. a los colerincs val ganren:    
201. so son aquels que an dolor  
202. dedins lo budel maior; 
203. si la lur fas soven uzar  
204. en pauc de temps lur pot aydar. 
205. A la tos vielha fa grant pron     
206. si on en beu soven e pron. 
207. Lo frech de la corada tol  
208. e·l ventre desenfla e fa mol  
209. si on pizada ambe mel la dona.
210. [.....] 
211. e l’erba y es bona aussi ben  
212. si on beu lo suc am vin soven. 
213. De fuelhas d’ortigas e sal
214. fay t’en emplastre que mot val  
215. car [los] floronx fa abragar  
216. e brach de naffra [fa] purgar.
217. E sobre morsura de cha  
218. la met e fara ne tot sa  
219. aquest emplastre e a ganren  
220. a cranch e l[o] gueris mot ben.  
221. E fa ben penre sen falhida  
222. la carn cant es de l’os partida. 
223. En tos los lox ont pauzas sia  
224. la humor seca ont que sie. 
225. La rais piza ambe ayga pur     
226. e met la sobre lebre dur;  
227. la dura encausa e·l mal  
228. e podraga fa aytal,
229. so es gota qu’en los pes ven:  
230. met la dessus e guerra ben.    
231. Si voles perdre sanc del nas  
232. met dins del suc pron e·n auras  
233. e la fuelha aytal fara  
234. que dins lo nas la pausara. 
235. Si tu perdes per lo nas sanch   
236. e lo voles far ben estanch  
237. de l’ortigua lo suc penras
238. e ton front [te] n’en fretaras. 
239. [f. 47v] Ajusta la grana ambe mel:  
240. no es tan bona cauza sos·l cel   
241. a la postema, ni tant sana
242. [.....]. 
243. Si la beves ambe molsa es fina  
244. a far que [tu] soven orina. 
245. D’ ortigas trissas pren grant ren        
246. e fay las coyre en ayga ben  
247. e dona a beure a qui ti plas  
248. e ira a cambra assas. 
249. Si prenes ortigas grant ren 
250. cos las en oli longament     
251. e d’aquel oli t’en onh ben:  
252. suzar te fara plus que ren.
253. De las ortigas pren la grana  
254. e tempra las mieia semana 
255. dintre vinaygre pur e fort    
256. e pueys las piza ben e fort  
257. e cola o per un prin drap  
258. e onh d’aquo soven ton cap: 
259. los capels ti conformara  
260. si que lai non te cayra.       
261. Qui la semenssa secara  
262. ni la pren e la culhira  
263. e la gardara ben e car  
264. trop de ben ne poyra far.

V.

La vertut de l’alh.

265. Aras diray, si yeu non falh,    
266. la forssa e la vertut de l’alh. 
267. Si serp o [e]scorpion ti mort  
268. mania l’alh e valra [ti] mot;     
269. e si dessus en fretas ben  
270. lo loc mordut, valra ganren.   
271. A cassar tota [la] vermina  
272. es la fierror de l’alh ben fina. 
273. Tot luec que sie mordut de can
274. [.....]  
275. fay l’ailh trissar ben [e] fort.    
276. E coze l’alh ben e fort  
277. e beu asses e pron
278. que tos los lombrix aussira  
279. e per aval los gitara. 
280. Pren los alhs ambe tot lur rest  
281. e cos·ls ambe oli dins un test:  
282. aquel oli totas sazons  
283. a tota avol morsura es bon, 
284. e tota mala cassadura 
285. sanaras ambe aquesta cura.    
286. Si en la veziga as enflazon  
287. ni dolor, aysso si es bon:
288. sie onch ben lo pencenilh  
289. e non o tenga en denil. 
290. Cant femna se deslieurara     
291. d’enfant e non se purgara  
292. ansi com razon o demanda,  
293. Ipocras nos dis e comanda,  
294. dels alhs que sien pizas ben  
295. sus los carbons mezes ganren  
296. e prenda lo fum [per] daval 
297. la femna [aytal], car trop y val. 
298. Qui aura mal en la corada     
299. prena d[e l’]alh una ponhada  
300. e coza o an lach ben e fort     
301. e beva o, e es escort.  
302. Diocles [dis] que fon mot sanat  
303. cant comandet que fos donat 
304. l’alh am l’ancentaurea egal  
305. contra aganos, que mot y val,   
306. e gieta las malas humors 
307. que per lo ventre fan lur cors. 
308. E qui a mal a los ronhons  
309. l’alh cueyt en ayga li es bon,  
310. si en mania pron e assas     
311. e s’en frete ben las costas. 
312. Si vols creire Pithagoras  
313. de coliandre e d’alh penras  
314. e piza e destrempa am pur vin  
315. e fau ti saber que sia fin;     
316. e on que l[o] mal gruoch aura  
317. en pauc de temps [el] guerira. 
318. Si borssas t’enflan [de] lunh temps
319. pren d’alh e [de] plantage ensemps,  
320. [e] piza los fort ben e gent, 
321. e pueys fregis lo ambe oli longament  
322. e pueys d’aquo ben los faysseras  
323. tant cant [tu] o sufrir poyras. 
324. Si tu as en lo cap dolor
325.   [f. 48r] que ti fassa mal e paor    
326. cant ti volras colcar la nueyt  
327. pren d’alh que sie an favas cueyt  
328. e sens alre los pizaras  
329. e los polsses t’en fretaras. 
330. Si tu as dolor en l’aurelha     
331. la razon dis e nos conselha  
332. que un’ auca ymplia d’als    
333. pisas, e lo sayn qu’en degota  
334. gieta dintre al ray del solelh  
335. e trobaras fort bon conselh.    
336. Si manias l’alh cueyt e bolhit,
337. [.....]
338. tot [lo] sospirar ti tolra  
339. e la vos ti esclarsira. 
340. Si l[o] manias en braza cueyt       
341. cant ti volras colcar la nueyt  
342. la rauqueza ti tolra ben,  
343. may mays y val bolhit grant ren. 
344. Si tu as grant desiu de yssir  
345. e non y pos esdevenir
346. dins lo broet l’alh bolhiras  
347. e ben en pron e yssiras. 
348. Pren d’alh e quant pizat l’auras  
349. am sagi fresc lo mesclaras  
350. e met lo sus ta enfladura:      
351. non y po[de]s far melhor cura. 
352. Qui de cauda fayssa sia 
353. si l’alh uza mal li fara  
354. car humors caudas atray fort
355. que donan a home la mort     
356. e l[o] meton en lebrozia  
357. o en [un’] autra maladie  
358. may qui a de fleuma trop  
359. [e] es trop gras, lo tenga prop. 
360. E aquella uzen totavie
361. que an paor de paralezia,  
362. que es una gota en ver  
363. que tol a l’ome lo poder  
364. o en lo tot o en la part.  
365. Aquel non vol que ja s’en gart:   
366. l’alh tota ventozitat tol  
367. e tot luec dur de frech fa mol. 
368. Si en dejun beus alh[a]da fort  
369. los lombrix tos sian mors  
370. e ti fara ben orinar   
371. e fleuma per aval gitar. 
372. Si en la dent as grant dolor  
373. sol que non sie de calor  
374. l’alh mastega ambe aquela dent  
375. e guerras tantost ben e gent.   
376. Tota avol ronha qu’el cors sie  
377. freta.t de l’alh e t’en va via, 
378. si prenes dels alhs pron e assas  
379. e los cos en ayga e trissas,  
380. may qui soven l’alh uzara     
381. am femna ja ben non jayra. 
382. Si vera razon non [me] falh,  
383. qui en dejun mania d[e l’]alh,  
384. non beva tant aygas diverssas
385. ni tant avols ni tant diversas    
386. ni tant non si sabra mudar
387. que nulh mal [non] li puesca far. 
388. De l’alh ambe aytant me lays.

VI.

La vertut de·l plantage.

389. De·l plantage diray hueymays  
390. vertus que a grans e planieras.  
391. Plantage es de doas manieras:  
392. la una es appellada maior  
393. e l’autra plantage menor.  
394. De la maior primierament  
395. diray tot so que ay entent.     
396. Aquesta herba es trop ponderoza  
397. a nafra que es mot humoroza  
398. car seca ben e gent  
399. tota humor que y dessent
400. si es meza dessus picada,   
401. confida ambe mel e ben mesclada.  
402. Cos la plantage en aygua fort
403. [.....]
404. e met dins un petit de sal:  
405. [ays]so es cert que mot y val 
406. a tot home que a la correnssa,
407. [.....] 
408. si lentilhas y vols mesclar  
409. contra corenssa non a par.
410. De [la] plantage pren ganren  
411. e piza la per si fort [f. 48v] ben 
412. e tost sanc restanqua[ra] gent.
413. Si on la met desobre soven
414. tota taca qu’el cors sie,  
415. e sie negra, totavia  
416. la torna a dreyta color,  
417. si on la s’en freta a grans legor. 
418. La plantage sie pizada  
419. e ambe clara d’uou mesclada  
420. e meza sus [la] cremadura:  
421. non y po[de]s far milhor [cura]. 
422. Si can en alcun luoc ti mort  
423. sol la plantage piza fort  
424. e met la dessus e guerra  
425. e [tota] enflazon s’en ira.    
426. La plantage piza am de sal:  
427. so es medicina que trop val  
428. a destruyre las escrofolas  
429. e a largar totas glandolas,  
430. sol sie y sobre liada  
431. e en lo jorn tres ves mudada. 
432. Si alcun d’aganos [.....]
433. anssi com cauls coz la plantage  
434. e fay la li uzar soven:  
435. grant pron li fara verament.   
436. E qui [soven] la uzara
437. ja mal estomach non aura.  
438. E si on la uza en aquel mal  
439. de que on cas, mot y val. 
440. Cant dolor en l’aurelha auras     
441. met del suc dins e tost guerras. 
442. [E] si on trega lo sanc pur   
443. beva del suc e es segur.    
444. E obrara uuels e plus fort  
445. si el lo beu ambe aygre fort.   
446. [E] ensi [lo suc] es pretios  
447. e a tot hom[e] defetios, 
448. si on lo met al cors per aval  
449. a home que a aquel mal  
450. que on appella [la] correnssa,  
451. [e] guerit sia sens falhenssa.  
452. Met dins del suc de l[a] plantage:  
453. so es medicina ben veraya. 
454. Si as las gingivas enfladas
455. [.....] 
456. mastega aquest’herba soven
457. e sias guerit ben e gent.  
458. E qui en dent dolor aura  
459. aysso tot sol la li tolra. 
460. Pren de lana ben carpenada    
461. [e] en lo suc sie mulhada,  
462. e meta la si ambe grant cura  
463. femna daval per sa natura:  
464. si ella pert per aval sanc  
465. aque mezeis sia estanch.    
466. Si beu l’ayga ambe vin pizada  
467. non ti poyra aver durada  
468. dolor en l’esquina ni mal,
469. car so es cauza que trop y val
470. e cauza bona e certaine     
471. a far la veziga ben sana. 
472. La razis tan grant vertut a:  
473. quel [que] al col la portara  
474. non li pot naysser escroula
475. ni engun’avol glandola.
476. Tres rais sens autra ren  
477. de [la] plantage piza ben  
478. e met y d’ayga tres culhiers  
479. e de vin pur trastot entier. 
480. Qui febre tersana aura 
481. beva aysso tot e guerra,  
482. mays en aysso ti deus gardar  
483. que non [la] li deves donar  
484. si non lo jorn que aura mal,  
485. car en autre terme non val,   
486. pero ans que aia frech ni caut  
487. ni ans que la febre dasaut  
488. una hora o doas li dona  
489. [.....]  
490. E si la febre es quartana,    
491. so comanda la razon plana  
492. d’aquel que fes aquest [e]scrich,  
493. con en penra catre rais 
494. e catre culhiers d’ayga e sal  
495. e catre de vin atretal,
496. e sie li tot donat,  
497. ansi con dessus es contat  
498. segont l’actoritat veraya. 
499. Seca e freia es tota plantage:  
500. de la gran plantage dit t’ay.  

VII.

[f. 49r] Consolada menor.

501. Aras so qu’es [e]scrich diray 
502. d’aquella que appella menor 
503. o lansolada li plezor. 
504. Lo suc d’aquesta maiorment
505. gueris e sana ben e gent     
506. tot [los] floronx que tu veyras 
507. o vista l’uelhs o vista·l nas, 
508. sol que on la meta sus lo mal 
509. am lana mola: mot y val. 
510. Aquest’emplastre deus mudar 
511. per nou jorns e renovar. 
512. Si on a alcuna sazon
513. a grant dolor ni trencazo 
514. dintre ventre e s’en esmayia 
515. pren lo suc de la plantage   
516. e fay a li estubezar 
517. e pueys l’en fay·l ventre fretar 
518. ambe un prin drap o ambe alre: 
519. aqui mezeys guerra fort ben. 
520. Qui beu lo suc bos es e rix  
521. per aussir tos los lombrix. 
522. D’aquest’herba e vielh sagi 
523. pos far emplastre bon e fin 
524. a tolre tota enfladura, 
525. ja cant non ven, mala ne dura.  
526. A nafre fresca val ganren 
527. aquest emplastre e fa grant ben. 
528. E si las venas yeysson trop 
529. que son daval del seti prop 
530. ambe aquesta sola cura     
531. las pos tornar ben en mezura. 
532. Doas horas tot per egal 
533. enans que l[o] prenna lo mal
534. hom que febre cartana aura 
535. beva del suc e guerira.
536. Tota femna que lo suc beu 
537. tost e suau a lo temps sieu, 
538. mays plus fort obro e val
539. si ella lo met per aval. 
540. Si tu as lonc camin tengut   
541. e tos pes son adolit 
542. piza aquest’herba ambe ayga fort 
543. e [la] met dessus: valra fort. 
544. Contra tota avol malautia 
545. que dintre la veziga sia
546. val lo suc, qui lo mesclara 
547. ambe vin temprat e·l beura. 
548. E dizon li nostre dottor 
549. que lo suc es de grant valor 
550. a cranch aussir e cassa[r] via  
551. en cal[que] luoc del cors que sie. 
552. Dit ay de las doas plantages 
553. medicinas bonas e verayas.

VIII.

De la ruda.

554. Aras diray de·l ruda aprop
555. trastot aquo qu[e] en a trop,  
556. segon aquels que son sanatz;  
557. cauda e seca es al ters grat. 
558. Bona es al ventrelh fermament  
559. si on en beu pron e soven.
560. Qui a la tos en beva pron:   
561. fort l’amelhoyra e li fa pron.
562. Si cos la ruda ben e gent  
563. en ayga e en aygre mesclament,
564. so es bevenda que non a par  
565. a cremazon del ventre ostar.
566. E es al piech bona e proada  
567. e fort aiuda a la corada,  
568. e la postema gueris ben  
569. si en alcuns dels costas ven. 
570. E val, so mostre [la] feziqua,  
571. a tolre tota [la] reticha.
572. Contra ruda non si estanca
573. gota que sol venir en anca.
574. Encontra tota febre es bona 
575. si on lo suc a beure dona;    
576. pren de [la] ruda vert grant ren
577. e cos en oli fort [e] ben,  
578. e onh lo malaut al foch caut  
579. ans que la febre li desaut.  
580. Aquest enguent es bon e bel   
581. a tota enfladura de budel
582. sol que on la giete per daval
583. ambe cusali [f. 49v] trop y val. 
584. Si on beu ruda ambe vin clar
585. a tot aysso pot profitar.     
586. Si es alcun que lonbric aia
587. medicina·n pot auzir veraya:  
588. coza la ruda en oli fort
589. [beva] d’aysso e son tug mort, 
590. e si la cos en aygre ben     
591. e faysse·n e valra ganren. 
592. Pren de figas blancas trissadas  
593. e sien ambe ruda pizadas  
594. e tot ensemps sien en vin cueyt 
595. de l[o] matin tro[que] la nuech
596. e aquel [qu’] aganos aura 
597. beva d’aysso, pron li fara;
598. e d’aysso qu[e] es el vin cueyt  
599. se faysse lo ventre la nueyt. 
600. Qui ruda fresqua uza per ver    
601. non pot la vista avol aver,  
602. car ella tol tota escurdat,
603. [.....]
604. may plus fort es e may [y] val 
605. si voles penre per egal    
606. suc de ruda e de fenolh  
607. e met o tot en un pauc d’alh  
608. e mescla y d’un gal lo fel  
609. e mezura y egal de mel
610. e layssa o tot estar ensemps 
611. un jorn o dos o plus lonc temps  
612. e pueys ne met soven e pron
613. dintre [lo]s huelhs, e fara pron.
614. De la ruda sie mesclat
615. lo suc ambe oli rozat 
616. e ambe agre tot egalment:  
617. aysso sia trop fi enguent     
618. a tolre tost e sens tot gap  
619. tota dolor qu[e] es en cap. 
620. Lo suc de la ruda penras,   
621. e metras en dintre lo nas
622. a tot home que perda sanch:
623. aqui mezeis sia estanch. 
624. De la ruda·l suc ben colat
625. sie un pauc estebezat 
626. dins una rusca de milgrana,  
627. e es medicina ben vertana  
628. a tolre tost e cassar via
629. dolor que dins aurelha sia.
630. Pren blaceo a ta voluntat   
631. e d’ayga e d’oli rozat  
632. e de suc de ruda egalment,  
633. e puey en fay un ric enguent
634. a cassar via de tos lox  
635. lo mal que a nom salvage fox,
636. ni berbeza non durara  
637. qui d’aquest enguent la onhera.
638. [E] si [los] floronx  al cap nays,  
639. que gieta humors e brac punays,
640. aquest enguent y val ganren 
641. sol qu[e] on n’en onhe fort ben.
642. E tot [los] flaronx dins lo nas  
643. am sol aquest enguent guerras.
644. Ia de verm paor non aura  
645. on que del suc begut aura,   
646. ni de la ruda aura maniat  
647. non sia leu engayssegat,  
648. e si o era manies ne pro
649. [.....] 
650. Ung rey que ac nom Mitridates
651. uzava fort la ruda ades    
652. cant tos los jorns que lavat era  
653. las res que fazia primiera  
654. de ruda vint fuelhas prenia 
655. e un pauc de sal y metia.    
656. Pueys prenia nos de noguier 
657. iiij. e doas d’avienlier  
658. e aquestas causas mescladas
659. [.....]
660. maniava tot jorn en dejun   
661. e pueys el non temia dengun   
662. que entoyssegar lo pogues,
663. ni verin que mal li fezes.  
664. Las mostelas ensenhon ben  
665. que aquesta herba val granren
666. a tot verin tolre e abatre,       
667. que cant elas volon conbatre  
668. am serps que son malas e duras  
669. manian de ruda e son seguras. 
670. Si los bossos a on enflatz    
671. prenga de ruda vert assas       
672. e de fuelhas de baguier,
673. e o pize tot [f. 50r] dins un mortier,  
674. e cant sia menut trissat 
675. sobre las borssas sie fayssat,
676. e val a tota maladia  
677. qu’en los budels veng[ud]a sia.
678. La ruda sia pizada  
679. menut e ben sie mesclada  
680. ambe polvera de comi
681. [........]     
682. e mesclat d’ung huou lo ros:  
683. no.es emplastre plus mervilhos  
684. a qui tost amena conselh
685. a tota dolor de ventrelh    
686. e a huelh cant on l’a trop vermelh.     
687. Pren de ruda e de menta egal
688. e si alcun cas d’aquel mal
689. piza las ben e dintre·l nas,
690. lo suc d’ambedos y metras,  
691. de ruda sie una punhada    
692. en suc d’autra ruda temprada
693. nou jorns e nou nuechs egalment,
694. e d’aquo mania soven.
695. Aquel que cas d[e l’]avol gota
696. en pauc de temps la perdra tota:
697. lo suc de [la] ruda penras  
698. e met ne per dintre ton nas:
699. la cervela ti purgara,  
700. l’avol fleuma t’en gitara.    
701. Pren un petit de mitridata,   
702. so es una bona apreta  
703. que fan los espatiadors
704. per lo conselh dels bon actors,  
705. e destempra [la] ben e gent  
706. am suc de ruda solament:
707. si d’aquo on beu cant mesclat sia  
708. ni cant la cartana aura,  
709. un pauc davant l’acassio,
710. [.....] 
711. may dic te e te coman
712. que·l cors sie purgat davan.      
713. Qui la ruda ben uzara  
714. non aia paor de orinar
715. ni de trop grant ventozitat
716. don son budel sie enflat:  
717. un lectuari bel e bon 
718. que draperegamos a nom  
719. de la ruda los meges fan  
720. e a vertut e forssa grant.    
721. Aquel si fa de guiza tal:  
722. pren [.....] e de pebre per egal
723. e de comi tot egalment
724. que sie temprat longament
725. en aygre, e apres secat
726. e pueys sobtilment picat,  
727. e de ruda munda[ta] ben    
728. pren eytant com de tot l’alre. 
729. Tot sie enssemps caut e pizat  
730. mesclat am mel e ben gardat:
731. ia qui d’aquest soven penra  
732. en lo pieys dolor non aura,    
733. ni en dengun dels costas seus,  
734. ni l[o] fege non sia greus,
735. e es causa certane e fina    
736. a tolre tota dolor d’esquina;
737. labrer aprima e fa mol   
738. e tota avol grugueza tol  
739. e fa ben mot; sens trencazon  
740. lo ventre tras tota sazon,    
741. e lo ventrelh conforta fort
742. e li dona aiuda e confort                          
743. a cuy el condug tost leu  
744. calque sie o prin o greu.

IX.

La vertut del api.

745. A api son, Dieu lau, vengut  
746. e diray la sieua vertut:
747. cauda e seca es entro tres gras,    
748. d’aysso son·l meges acordas. 
749. Mezola de pan blanc penras  
750. [e] en suc d’api la metras,   
751. e cant sia ben ebeguda,
752. sie ben pista[da] e moluda,       
753. e sobre tota enflazion  
754. [d’huelhs] met aquo: trop y es bon.  
755. E dizon ben las gens letradas 
756. que aysso val a bossas enfladas.  
757. L’api tol tota cremazon     
758. del ventrelh e tota enflazon 
759. e tota aura [f. 50v] que dintr’el sie
760. gieta suau e cassa via.
761. Si [tu] d’api manias ganren
762. orinar ti fara fort ben 
763. e si beves del suc de l’ap
764. orinaras a tot ton grat, 
765. may mays y val e es plus fort 
766. si tu cozes la rays fort
767. en ayga e·n beves soven.   
768. Pero la grana verament
769. es plus fort que autra ren; 
770. si on la beu pizada ben
771. tota l’erba es bona e ben proada  
772. contra morssura verniada.   
773. May la grana plus y fara
774. an l’ayga en que cueyta sia, 
775. si on en beu assas e pron;   
776. e a la tos fara li pron,  
777. lo ventre [.....]ben fort   
778. e tot home que ris es scort  
779. si on la beu cueyta ben e gent  
780. en ayga o en aygre mesclamen.   
781. Tot hom que a sa color perduda,  
782. per so car a grant [.....] aguda,
783. manie en dejun d’api soven
784. e cobrara la ben e gent. 
785. Si on a febre cotidiana
786. aquest’herba li es bona e sana,
787. sol que ambe ayga la beva e·n prenga
788. avant que la febre lo tenga.
789. L’api sie caut pizat,  
790. am suc de fenolh ben mesclat,
791. e si alcun labrier de trop dur
792. es trop enflat, beva segur;   
793. e contra tot aganos val,  
794. e al fege cant y a mal. 
795. Si femna a sa cara pavoza 
796. e per luecs tacada e picoza,  
797. lo ser cant se volra colcar   
798. de l’api fassa un pauc pizar
799. e frete s’en la cara:  
800. aquo la fara ben clara,
801. pero cant la volra ostar 
802. d’ayga de bren la deu lavar.  
803. Lo suc d’api sie mesclat,  
804. am brenda nova sie espurat,  
805. e meta y d’un huou la clara: 
806. so es medicina veraya
807. a purgar nafra ben e gent   
808. si on la met [de]sus soven. 
809. [E] a [los] floronx val ganren  
810. e·ls purgar non layssa gent.  
811. Tot hom que cas soven o tart 
812. de l’avol gota, ben se gart   
813. que d’api manie sa bocha,
814. ni la tenga ni lo tocha,  
815. e femna pren tot per egal,    
816. car a cascun fara mal;
817. e tota femna que alache    
818. d’api maniar e beure garde
819. e qui son enfant amara  
820. tan cant es pauc l’en gardera.
821. Un mege que ac nom Olmiazo,  
822. savi hom e de grant valor,   
823. en son libre dis verament
824. que si alcun a boche pudent
825. e la sieu alena mal flayre,   
826. qu’autre hom n’auze prop de si trayre,  
827. l’api lo guerra ben e gent    
828. sol que manie en dejun soven.
829. De l’api voli aytant parlar.

X.

Del malviscle.

830. Del malviscle volray parlar: 
831. so es una herba coneguda
832. e que a motz [mals] fa aiuda.
833. Cant nafra [ti] volras purgar 
834. en aytal guiza o poyras far:
835. la flor del malviscle penras   
836. e am molssa la cozeras 
837. e pueys met la sus·l nafra estreyt      
838. e obrara a grant espleyt.
839. E val aytant si es liada 
840. la flor desobre am vin pizada.
841. Aquesta es meyssa medicina
842. contra [f. 51r] estrolas bona e fina.     
843. E tol meravilhozament 
844. dolor cant a e en fundament.
845. Es trop bona aquesta cura   
846. a guerir tota cassadura.     
847. La rais cueyta longament       
848. en ayga sie ben e gent
849. e piza la ambe sayn mesclada
850. [e am goma terebengada]   
851. que on appella trementina 
852. que ven de terra otra marina:   
853. aquest emplastre non a par
854. a tota enflazon bayssar 
855. e amolegar los nervis plus que ren,   
856. e aquels relaxa ben; 
857. e tota postema que es dura    
858. abraga ben e fa madura. 
859. A tot aysso certanament 
860. l’ayga sol val egal[ment]     
861. on la rays mulhada [sia]
862. sos los locs de la malautia,  
863. e sien ben banhas soven  
864. [e] aprop tengut caudament. 
865. Si la rays cueyta en vin
866. [tu] beves, es bon e es fin; 
867. [e] si tu as mal de correnssa 
868. el l’estancara sens falhenssa. 
869. Aquesta bevenda es bona
870. a femna si on la li dona
871. cant si sia de part deslieurada 
872. e non si sia ben purgada.       
873. E qui lo sanc estrenhera
874. d’aysso beva: gueris sia. 
875. E qui a peyra beva·n pron
876. [e] soven e fara li pron. 
877. [E] per mos mals de la veziga    
878. es bon e tos los destaziga. 
879. La semenssa piza ben fort   
880. ambe oli e ambe aygue fort,  
881. e aysso es a tot avol taca: 
882. ja non ti cal demandar blaca  
883. que ben lago fa de la cara 
884. e la fa bella e clara. 
885. E de tot loc casa ben via  
886. tota taca ont[e] que sie. 
887. Qui beu la grana an vin trempat 
888. non sia leu entoyssegat. 
889. Si vols bona cara menar 
890. en nafra que vezes trop car  
891. co[ze]s la rais ben e gent 
892. e trissa la am mel longament: 
893. [...] sie enfayssada,
894. en doas ves lo jorn mudada,  
895. e aysso pos metre segur    
896. sobre [lo] loc cant trop es dur.
897. Las fuelhas cos en oli fort:   
898. so es emplastre bon e fort 
899. contra tota avol morssura 
900. e contra tota cremadura.    

XI.

De la bretonega

901. De la bretonega diray
902. de tot aquo qu’en trobat ay. 
903. Qui la beu fa ben orinar
904. e las peyras del cors pissar.  
905. E am vin temprat la donaras 
906. a tot home que tu veyras  
907. qu[e] el sanch pur estrassara:     
908. aqui mezeis guerit sia. 
909. De l’aganos pot guerir leu  
910. qui an mel e en vin la beu.  
911. Si colp t’a fait dintre l’huelh mal  
912. fa un emplastre que mot y val
913. sol de las fuelhas esteradas
914. de la bretonega trissadas.
915. Lo suc d’est[a] erba colat  
916. mesclaras ambe oli rozat, 
917. e d’aquo metra en l’aurelha      
918. si ella ti dol ni ti rondelha. 
919. D’aquest’herba polvra faras
920. e am mel cueyt la mesclaras, 
921. e d’aysso doneras soven 
922. a home que tos malament      
923. ni qui escup e es cays bragos 
924. ni fa soppir trop doloyros. 
925. E aysso dona bon conselh  
926. a tota dolor de ventrelh.
927. Pero si on la febre avia        
928. e ambe ayga aysso bevia, 
929. si non be la li [f. 51v] pos donar
930. am[be] vin pur rosset e clar. 
931. Qui beu la pols am molssa pura 
932. yssir fa ambe grant mezura.  
933. Si nafra fresqua vols sanar 
934. am sal fay las fuelhas trissar 
935. e sobre la nafra las met:     
936. tost sias guerit, yeu t’o promet. 
937. Sol que aquesta herba ben pizada     
938. sobre lo cap sie liada,
939. sie [de cap] colp ni cassadura 
940. tost la gueris e la madura.   
941. De la fuelhas bolhidas ben 
942. pos far emplastre que pron ten  
943. als huelhs per mota malautia 
944. sol que desus pauzadas sia. 
945. Qui la bretonega uzara
946. ja huelhs lagremos non aura 
947. e to[lra] be per veritat
948. de los huelhs tota escurdat.
949. Si ella es egal mesclada 
950. am ruda vert e ben pizada  
951. e ambe cauda ayga beguda
952. ensi fa als huelhs aiuda
953. e los fa clars e sens tot mal 
954. e lo sanc gieta per aval. 
955. Beva aquest’ayga que es res fort    
956. ambe ayga cauda e es scort. 
957. E a los piechs faran grant pron  
958. si [on] en beu soven e pron. 
959. Qui l’ayga on cos soven beura 
960. ja en labrer mal non aura.   
961. D’est’herba catre onz. penras 
962. e de pebre y aiustaras
963. vint e set grans tot egalment 
964. e trissa o tot ben e gent 
965. e met y tres enaps de vin:  
966. aysso sia trop bon e fin
967. car l’esquina ben purgara:       
968. tota dolor en gitara. 
969. E als ronhons fara grant pron 
970. si on en beu soven e pron.   
971. una onz sola ben pizada 
972. ambe ayga cauda destrempada         
973. car tossiment tol ben e leu 
974. dolor de ventre si on la beu.
975. Aquest’herba dolor de ventre guerra  
976. qui ambe mel trissa la penra. 
977. E·l ventre amolezira ben    
978. e al yssir [fa] mot grant ben.
979. Qui febre cascun jorn aura 
980. de plantage una onz penra 
981. e doas onz tot egalment 
982. d’aquest’herba tot yssament 
983. pizat en ayga cauda o prenga
984. ans que la febre venga.
985. D’aquest’herba una onz pizada     
986. ambe ayga cauda destrempada 
987. qui mal d[els] aganos aura  
988. beva soven: guerit sia.
989. Los pols e la rais pizada 
990. e beguda ambe ayga mulhada
991. purga tantost humors nozens 
992. com fa garayre veramens.   
993. E qui vol ensi purgar
994. catre dragmas en deu donar, 
995. so es mieia onz egalment    
996. e pos la donar yssament 
997. ambe vin cueyt e val atresi     
998. car Plunis o dis ansi, 
999. e quant si la penra
1000. de fleuma lo purgara. 
1001. De las fuelhas la pols dada
1002. [ambe ayga que sie mesclada]
1003. val a hom[e] que es crebas 
1004. si [e]l n’en beu pron e assas. 
1005. La bretonega am vin beguda 
1006. contra verin val e ajuda 
1007. may la semenssa y eys plus bona;       
1008. si non la as, l’erba li dona. 
1009. Aquel que l[o] mal gruoc aura
1010. [.....] 
1011. am vin que aia pauc de calor 
1012. e tornara en sa color.
1013. La pols subtils am mel mesclada 
1014. a pes d’una fava donada 
1015. apres maniar dona conselh 
1016. de cozer condut al ventrelh. 
1017. Si d’aquest’herba [f. 52r] un capel fas 
1018. en luoc ont serps trobaras 
1019. si d’aquella herba entort sia, 
1020. per hung trah per garentia,  
1021. que ja las serps non auzaran
1022. passar l’erba cant la veyran  
1023. mays que mordran e·s conbatron
1024. fort am las cohas tro la mort.
1025. Menemacquol [dis] totavie,  
1026. que tot consig, que fort bon sie 
1027. aquest’herba meza y sia    
1028. e dis ansi apertament
1029. qu’ aquest’herba sobre tot’autra fa ben
1030. al ventrelh e lo manten.    
1031. Plinius [dis]: qui portara 
1032. d’aquest’herba ja non sia afolat
1033.  per encantament ni mal at.

XII.

Me[rven].

1034. Aprop la bretonega ven    
1035. la razon que dis de merven. 
1036. Caut e sec es so, say ben. 
1037. Si·l merven es am mel mesclat  
1038. floronc e nafra on ve brac
1039. asseca fort e purga ben
1040. [.....] 
1041. e aquels aiuda ben val
1042. quar an aquels que son mal.  
1043. A tot aysso qui vol ben far,
1044. dessus tantost la deu pausar. 
1045. [E] si as en lo cap verten    
1046. fay bolhir lo morven 
1047. en ayga o en vin:    
1048. aysso sia trop bon e fin. 
1049. Lava ton cap ser e matin.   
1050. E als ronhons fara grant pron  
1051. si on en beu soven e pron   
1052. una onz sola ben pizada
1053. ambe ayga cauda.
1054. Pero qui plus tost guerir vol  
1055. en lo front, ella non li dol:   
1056. fassa liar lo morvent cueyt       
1057. e tenga li tota una nueyt.

XIII.

[Por]. 

1058. Ypocras, que mot fon sabent, 
1059. so dis la letra veramens,    
1060. fes ambe sen so, quar avia  
1061. de los pors mota maystria,  
1062. car nos saben que el donava
1063. lo suc a beure can trobava 
1064. home que [lo] sanc escupia  
1065. ni per lo sanc el lo rendia.   
1066. E que quels meges que sonavan
1067. am galas lo donaven encara
1068. o ambe farina d’ensens 
1069. e fan o beure tot ensemps.  
1070. De gran de pors penras     
1071. e de mirra y aiustaras
1072. la mitat may fay o pizar 
1073. ambe vin franc bien destrempat:
1074. si beven d’aysso soven e pron
1075. [.....] que sanc fara li pron.  
1076. Lo sanc del nas estancaras    
1077. si d’aquo metes dins lo nas. 
1078. Si voles floronx leu sanar
1079. los pors am mel y fay pausar.
1080. Si humors corens contraval  
1081. de cap que fassa al piech mal  
1082. e on ne sie tot ranquilhos
1083. [e] en raumas e cossilhos, 
1084. lo suc del por [tu] li daras   
1085. ambe ayga en ordi lo coyras, 
1086. o si per si tot sol lo beu 
1087. [e] d’aysso pot guerir leu. 
1088. Hom qu’es constubas
1089. beva l’ayga dels pors colas,  
1090. d’aquest’ayga trenpe lo vi:  
1091. per costubat es bon e fin.     
1092. Aquel que es ponh de serpen
1093. o d’autre bestia nozen 
1094. si beu del suc del pore pron 
1095. mesclat an vin fara li pron.   
1096. Los pors ambe mel pizaras      
1097. e sus lo loc los pauzaras. 
1098. E si as dolor en l’aurelha, 
1099. Macer ti dis e te conselha   
1100. que un fel de cabra sie pres 
1101. e ambe suc de por [sie] mes     
1102. e [de]dins l’aurelha gitat:        
1103. la dolor tol per veritat. 
1104. E si non pos aver lo fel     
1105. pren un pauc d’ayga [f. 52v] de mel:  
1106. lo suc del pore ambe aysso met    
1107. [de]dins l’aurelha tot tebezet. 
1108. [E] aquel qui pors maniera
1109. ja voley mal non li fara.     
1110. La terssa part del mel metras 
1111. am suc de pore e per lo nas   
1112. e per l’aurelha o met caudet; 
1113. e yeu dic te e te promet 
1114. que [grant] dolor de cap tolras
1115. ad aquel a qui aysso [.....]   
1116. On que sia desconbulas
1117. de suc de pors beva assas. 
1118. [E] sobre tota cassadura 
1119. e sobre ca[r]n que sie dura  
1120. fay los pors pizas liar 
1121. ensi las fuelhas ambe sal pizar
1122. e los pauzas sus fresca plaga:
1123. tost la clau e lo mal appaga. 
1124. Si on es trop per vin vensut  
1125. fay li maniar los pors crus.  
1126. E qui a lo ventre dur     
1127. manie los pors e es segur, 
1128. e si els se met per aval 
1129. lo blanc de lo por mot y val. 

XIV.

La vertut de l’anet.

1130. De l’anet vos diray  
1131. e al libre si [fin] faray.
1132. Tota bayla que layt non aura  
1133. beva de l’ayga on cueyt sia: 
1134. so es la res que plus ne dona 
1135. e es al ventrelh bona, 
1136. si aquel que l’ayga ne beu   
1137. tres enaps per egal [.....].
1138. Aquesta mezeyssa medicina
1139. a home, que trop y es fina.  
1140. Qui l’anet soven uzara 
1141. tostems ben orinara   
1142. e los pes lays a la mayre, 
1143. si·l femna vol estuba fayre 
1144. cant l’aura ben en pur vin cueyt.    
1145. En fazent son ventre la nueyt 
1146. cant dolor al ventre auras   
1147. ayga tebeza d’anet beuras. 
1148. E es bon a condug plen o greu
1149. e fa yssir suau e leu. 
1150. Pero qui·l uza trop soven   
1151. a la vista nos fermament.    
1152. E tol volontat e poder
1153. de far a femna son plazer.
1154. Si alcun a lo ventre enflat   
1155. de tropas humors agremat   
1156. la grana de l’anet penras        
1157. [e] en un test la cremaras; 
1158. cant l’auras ben polverizada
1159. destrempa la am ayga salada 
1160. e gieta en lo cors per aval  
1161. [.....] 
1162. Pero plus fors son, segon dis, 
1163. son las senres de las rays:
1164. aquesta cenre fort cos ben  
1165. tol avol carn qu’en naffra ven.
1166. Si on a mal el membre sieu  
1167. aquesta senre·l gueris leu. 
1168. [E] si trop grant sanglot auras
1169. la semenssa d’aquesta raustiras.     
1170. Si en los huells as cremazon 
1171. o grant calor ni menazon    
1172. la rais piza ben e gent
1173. e dessus met ben e soven. 
1174. Si las morenas vols sanar   
1175. la grana d’anet fay picar    
1176. e la polvera met soven
1177. dessus e guerra ben. 
1178. Fay la flor coyre en oli clar: 
1179. aquel oli non aura par
1180. a tolre tota maladia  
1181. o a febre que de freyt sie.   
1182. Qui sos polsses s’en fretara
1183. suau e leu s’adormira.

---

 

Ms. di Chantilly, versione in prosa 

 

[f. 53v] [Artimiza].

Artimiza vert picada e sobre lo ventre pauzada fa a dona aver sa flor, o si beu l’ayga on l’artimiza es cueyta, o si s’en affuma la mayre.

O sy picada es, ambe pur vi mesclada, la beu ser e matin.

Ysament beguda o meza daval per la natura li gieta l’enfant mort del ventre e amolezis la mayre e tol tota enfladura.

Aissy ben beguda ambe vin soven fa y orinar e val mot a la peyra de la pyssa.

Yssament artimiza picada e mesclada ambe sayn de porc fresc val mot a home que a glandola en la gola, sy on lo pauza aytal dessus lo mal e que o beva aqui mezeys.

L’erba picada ambe bon vi val mot a home que [a] begut opi.

Yssament nulh home que porte l’artimiza non poyra esser faytilhas ni lunlha bestia salvage no li poyra far mal: a tot aysso es bon lo suc begut ambe vin.

Yssament artimiza picada e meza en vayssel plen de vin, [f. 54r] e fa aquel vin d’aquel vayssel que val a tot aquo que avem dit dessus. E aquel vin es mot plazent e bon flayrant, atressi conforta tot ventre e sana la corada.

 

La vertut de la eruga.

Eruga es cauda verament, la qual eruga cos la vianda el ventre e fa orinar.

E maniada soven ambe cozinna es bona vera[ment], e·l suc de la eruga mesclada ambe mel es bona a tota cauza de fassar e tener la cara bella e la pel, sol que on ne frete aquella taca o la cara yssament.

La rais de la eruga cueyta e picada e emplastrada fort sobre os trenquat aiuda y fort yssament tot colp o morsura.

Cura la grana de l’eruga beguda ambe fel mesclada de buou, tota taca negra tol sol que on la frete.

Yssament l’erba o lo gran mes en los cauls rent los saborozes.

Eruga soven maniada creys luxuria e creys beguda, e es plus sana e atrempada cueyta ambe laytugas contra diverssas maladias.

 

Papaver.

 Papaver es sec e frech, mays on troba papaver de tres colors: la una es blanca, l’autra es pilhua, l’autra es rozeta. Plus val lo papaver ambe la flor blanca, car d’aquel fa on opi enayssi.

Pren on lo papaver ambe flor blanca e pica on: e·l suc que·n yeys, blanquet, escriva·l ben car mot val a motas maladias.

Yssament pren on lo cap d’aquest papaver e pica lo ambe mel, e [del] suc que·n yeys te on tant al solhel tro que sie sec.

E aysso es la segonda vertut del papaver ambe la flor paluia: fa on de la semenssa picada de lux oli bon flayran e ambe grant vertut acels que non podon dormir.

Lo ters papaver que a la flor rosseta e ambe la semenssa negra tol lo velhar ad home vielh.

E si l’ome malaute lava sos polsses o beu de l’ayga on sia cueyt alcun dels papavers dessus dis, el dormira tost e leu.

Si la mort non li deu tost venir, la grana negra del papaver beguda ambe bon vin restanca tota menazon e val contra flors de donas e fa dormir e tol tota tos ambe vin beguda, may on non [deu] penre may lo pes de un denier, que si on en prenna plus litargia o mort l’en auria.

Emplastre fayt de fuelhas picadas e pauzadas sobre gautas enfladas las desenfla tost, e ambe aysso es tost curada lo foch salvage e fa clara vos qui beu d’aquel beurage.

Autre papaver y a: segont quant dic [f. 54v] dessus, nulh papaver non val tant com aquel que a blanca flor, per que on lo deu culhir cant a los caps pels de layt e deu les on far bolhir tro que es spes en ayga ambe lo ters de mel, e deu bolhir tro que sie spes ayssi com es e non plus, e aysso deu on ben gardar, car d’aysso mania leu fa dorm[ir] e fa fugir totas tos tantost e estrenh tota menaza e seca tota rauma e val a la vena vocal.

Yssament lo suc del papaver blanc croayt dels pels del caps de lur cant son pels de layt e mesclat ambe oli rozat tol dolor de cap si on lo·n onh e fa dormir suau e get.

Yssamen aytal suc mesclat ambe safran tebe, mes en l’aurelha que dol, osta tota dolor d’aqui, empero si y mesclas layt de femna mays ne val.

 

La vertut del caul.

Caul picat en loch d’emplastre pauzat sobre floronx fresch o vielh o sobre cranc los gueris mot tost, may primierament tot jorn deu esser ambe orina o ambe vin tebe lavas lo loch malaute.

Yssament farina d’ordi ambe fuelhas de caul e sal e coriandre per egal, tot aysso essemps picat sana aretica e podraga si on pauza aysso en loc d’emplastre sus lo pere.

Aquest mezeis emplastre tol e sana siragia e festola e enflandura; fas que o pauze sus e[l] mal.

Yssament sana los ner[v]is enferns e malaus si on los lava soven ambe orina cauda d’ome que aia maniat cauls.

Yssament los enfantos son plus sans si en aquesta orina son soven banhas.

E caul fresc maniat fa la vista clara e tol tota escurdat d’uelhs e fa a femna mot layt e ten pron a las flors de las donas que amolhezisson lo ventre si an manias caul cuechs.

E fan gitar l’enfant mort del ventre si beu la grana del caul.

Yssament los cauls ben cueytz e ben picas ambe mel e ambe sayn de porc mesclas e ambe oli rozat per razon e mes sus lo ventrelh e sus los locs enflas amerma la color de tota febre.

O si beu caul picat ambe alun, mesclat ambe vinaygre, gueris tota lebrozia que on onha d’aquo son cors, e tol tota tacas.

Si d’aquest enguen pauza on dessus reten los pels que non cazen, si e[s] onh ton cap, e atressi melhoyra los colhons enflas, may plus y val fava cueyta meza dessus.

Yssamen cauls picas ambe fenolh e mesclas ambe vinaygre tol tota dolor d’aretica e sana podraga e melhora si on aysso en loc d’emplastre pausa dessus lo mal.

Ysamen cauls picas ambe sagi e mesclas ambe mel tol la dolor del costat, si aysso on pauza dessus.

Yssamen si on beu la grana picada del caul, e trempada ambe [f. 55r] vinaygre, fa yssir los verms del ventre.

Yssament las sendres de la rais dels cauls secas fan ben yssir a cambra si on ne pauza dessus lo ventre coma emplastre.

Yssamen lo caul val contra la vous rauca si on mastega lo caul vert e beu lo suc que yssira.

Yssament lo suc del caul mes per las narras purga lo cap.

Aqui mezeis qui porta a son col la rais del caul que non aia tocat terra de pus que fon acabat, ja may non aura mal en son ventre.

 

La menta.

 Menta es el quart gra humida e seca.

Maiorament cant es fresca conforta lo ventre e reten lo condug que on y met, sol que on la bega ambe bon vin picada.

Yssamen fa gitar los verms del ventre ayssi beguda.

Yssamen menta ayssi ben picada e cueyta en ayga es bona a motas enfirmetas dels colhons, sol que on los lave ambe aytal ayga.

Yssamen fresqua picada e liada sobre la mamelha endurizida per layt fa tornar la mamelha molla e·l layt aquel es can par.

Yssamen menta tol aspreza de la lenga sol que on la suque.

E cueyta picada o beguda ambe bon vin aiuda tost a enfantar.

E val a morssura de can sol que on la meta pelada ambe sal dessus lo mal.

E tot home que escup sanc gueris leu sol quel la bega picada ambe vinaygre.

Dona que non vol emprenhar pique la menta ben e d’aquel suc onhe se·n la mayre e tot son cors.

Yssament formage fach de layt on sia menta meza non poyrira.

 

La enna.

La enna es sequa e cauda el segon gra.

Dona que soven beura de l’ayga on la enna sia cueyta tenra sa camiza nedeza.

E fa orinar e l’enfant mort del cors gitar e ventre constubat fa amolezir: ad estas cauzas val lo dit beurage.

Yssamen la rais de l’enna picada e pauzada sobre loch ont es la gota soven la tol e tocada tras la gota d’aquel loc.

Yssament las fuelhas de l’enna cueytas en pument tol tost lo mal de las rins sol que ben picadas en loc d’emplastre sien sus lo mal mezas.

Yssamen lo suc de l’enna mesclat ambe suc de ruda egalment ten grant pron ad home trebalhas, sol que d’aquest suc beva cascun jorn.

Yssamen l’enna cueyta en oli e en boder e pueys ben picada, colada, tol la enfladura de la mayre si tebezada es meza per lo persay en la natura de la femna, e aysso val al maior budel del cul si es enflat e constubat, sol que an lo cresteri tebezet sia mes per la natura.

Yssamen l’enna maniada e beguda rent [.....] totas las ventrelhas, e es medicina contra fel e fege esclafat e dezenfla los colhons enflas [f. 55v], sol que sie desus pauzada e picada.

 

La vertut de la salvia.

Salvia cueyta en layt val mot a diverssas malautias que solon venir al fege, sol que tan sia cueyta e layt on beva.

Aquel suc deluy, ben premuda, e gieta l’enfant mort del cors e fa orinar ben e que a dona rent sa camiza e la porta de bona guiza.

Yssament salvia val a tota morssura verinoza sol que, pizada, sie pauzada dessus lo mal.

Salvia cruza estanqua sanch, si dessus es meza.

Beguda tol dolor del las.

Salvia cueyta en vin purga e cura la natura de la dona e la verga del home sol que·n sien aquels lox lavas tot jorn ambe lo vin ont salvia sia cueyta e que·n bevan d’aquel vin.

Yssa[me]ns lo suc de la salvia fa los pels negres e azaus so que al solhel los pels ne·n sien soven mulhas ambe lo suc.

 

La bronia.

Bronia es herba de grant vertut.

Qui beu l’ayga on bronia es cueyta, es medicina contra los ner[v]is e contra mal pieys e contra tos, avol esquina e avol estomac, empero may val beguda cruza ambe vin, car ensi fa ben orinar; e netegera la corada e val a gota d’anqua.

Si serp la sent fug e per que tot hom mordut de serp beva lo suc de la rais e guerira.

E tol tota febre si on beu lo sieu suc.

E ambe vin beguda soven aussis los lombrix.

E emplastre fait de un plen punh d’aquest’herba ambe pan blanc e ambe codols quant tot ensemps sia cueyt e pauzat per una nueyt sobre los huells doloyrozes tol la cremazon e la dolor d’aquels.

Aquest’herba picada e dessus pauzada tray tronc e espina.

E tot hom que d’aquest’herba uze non pot aver trenquazon de ventre ni enflazon davant ni apres maniar.

 

La vertut de l’yssent.

L’yssent cueyt en ayga de pluieia conforta mot lo ventre sol que d’aquest’ayga pauzada e refreiada on beva pron e enfins aussira los lombrix e amolesira lo ventre.

Urinar fa de bona guiza e rent a femna sa camiza. Yssen e nardi de Franssa per egal picat ben e ambe layt destrempat e begut rent a dona sa camiza.

Un pauc de silermenta e de nardi picat per egal, tot aysso mesclat e ben trempat, dona apenmen de maniar ad on desjanat sol que en dejun ne beva pron.

Yssen e ruda per egal, un pauc de sal e de pebre per egal; tot aysso sie picat e bolhit en bon vin; hon plen de malas humors beva en dejun o de matin, car aquest beurage purga [f. 56r] fort lo ventre e cassa las malas humors que fan grant mal a tot home.

Neguna pinze non pot maniar ni picar ome ung del suc mesclat ambe vinaygre.

Si on gruoch ambe fege escalfat beu del suc d’eyssent ambe suc d’api per egal on sie mesclat nardi de Frans tost sia guerit.

Suc d’yssent mesclat ambe fort vinaygre e begut val contra dur fege.

Enssent begut an vi sana mors de serp.

Lo suc d’yssent mesclat ambe mel bolhit e mes dedins encausa escurdat d’uelhs e los fa bels e clars.

Yssent cueyt en ayga o en vin val mot contra escurdat d’aurelhas sol que·n sien enfumadas ser e matin per dos jorns o tres, empero si brach n’yeys sie picat.

Hyssent fresc e picat fa grant ben a naffra fresca sol que·n dessus sie mes ambe un drap.

E enfins tol los floronx del cap.

Atressi tol gratigi e pruzor sol que on se banhe en ayga on sien cueytz yssens.

Hon marinier si cant va dormir de nueys beu lo suc d’yssens ambe vin pur, ja may non gitara en la mar.

Yssent pauzat e picat sobre glandolas tost las sana.

E qui la nueyt dormir non poyra flayre yssent e dormira.

Yssens fresch e frech mes en drap prin sus lo cap d’ome malaute que non pot dormir fa tost dormir e ben, empero cant li metra subre lo cap lo malaute non deu vezer.

Yssent cremat ambe sero mesclat fa negres lo cabelhs sol que on los ne frete soven.

E arna non si pot far la on a yssens.

Si on a lenga enflada prenga lo suc de yssent, e cant al foch menan o aura ben mesclat, pueys tenga o caut sus la lenga: aysso mezeis gueris.

Si ualh an blau entorn e negre [mescla] lo fel de buou ambe aytant del suc d’eyssen que entre tot sie plen un huou.

Aysso gueris lo tornament e·l bon dintre de las aurelhas sol que d’aysso on y meta yssent caut en pur oli.

Dona conselh a tot mal de ventre sol que d’aysso on se·n onha lo ventre.

Rata non pot desfar letra que sie faita ni destemprada ambe vin on vyssent es bolhit.

 

La vertut de l’ortigua.

Ortiga beguda ambe vin soven sana lo mal gruoch.

La grana de la ortiga mesclada e beguda als escoloris dona color. A tot [home] que [a] mal ni dolor el budel maior ajuda si soven la mania.

Lo suc de la ortiga sana tos vielha si on en beu pron la grana d’ortiga picada e mesclada ambe mel e beguda.

Lo suc de lays begud’ambe vin soven tol lo frech de la corada e dezemfla lo ventre e·l fa mol.

Emplastre d’ortigas e de sal fa floronx bragueiar e brac de [f. 56v] nafra fa purgar. E mes sobre morssura de can rent on tost san. Aquest emplastre sana ben e leu tot cranch.

E fa prenre la carn partida de l’os.

E sequa las malas humors en tot loc on sie pauzas.

La rais d’ortiga picada ambe vinaygre tol dureza del fege si ayssi on lo met dessus e sana podraga, que es gota que ven dels pes.

Si dessus es mes lo suc d’ortiga fa lo nas sagnar; aquo mezeis fa la fuelha mezeyssa el nas.

A homme que pert mot sanc per lo nas e onh tot lo front ambe suc d’ortigas e estancar fa.

La grana d’ortiga beguda ambe mel sana tota postema dins lo cors.

E beguda ambe layt fa ben urinar.

Si on beu de l’ayga on sien cueytas ortigas fa ben yssir a cambra.

E tot on onha d’oli on son cueytas ortigas: suza[ra] demantenent.

E tot hom a qui cazo pels de son cap prenga grana d’ortiga temprada mieia semana en fort vinaygre e ben pur e cant l’an cara premuda ambe lo, las mas, pique la fort e colhe la per un prin drap e d’aquo onha soven son cap e ja nul pel non li cayra.

Tot om que cuelha la grana de la ortiga en son temps e la garde, trop de ben en pot far.

 

La vertut del alh.

Alh maniat val trop contra morssura de serp e de escorpion, ma la morssura deu esser fregada dessus ambe l’alh.

Ambe la flayror de l’alh en caussa on tot veri.

E sana morssura de cas picat ambe mel.

E dessus pauzat alhs cueytz ambe layt e ambe vinaygre e ayssi destemprat e begut fa yssir los lombrix mors del ventre.

L’oli ambe que es cueyt l’alh ambe l’escorssa en una ola nova sana tota mala morssura e cura tota macadura sol que on en onha lo loc.

E aysso mezeis tol la dolor e la enflazon de la veziga sol que on se·n onha lo pentenilh.

Quant la femna a pena d’enfant e no·s pot deslieurar, dis Ypocras que prenga mos alhs ben picas e en meta sobre los carbons e la femna aytal prenga lo fun per la natura car y val.

Una punhada d’alhs cueys ambe lait picas destrempat ambe aquel broet e pueys begut sana lo mal de la corada.

Alh e centeures per egal begut val trop contra aganos e gieta las malas humors del cors.

Alh cueyt en ayga pueys maniat soven e sus los costas confregas cura lo mal de l’enqua.

Tot om que a lo mal cruoch prenga coliandre e alhs pelhas e picas e destempras ambe vin pur e d’aysso fara sabrier lo qual beura e tantost guerra.

[f. 57r] A l’enfladuro de brossos pren alh e plantage enssemps e cant sia ben picat fregis o ambe oli e d’aysso ayssi fregit faysseras los aytant com poyras sofrir caut.

Si on a dolor en cap prenga alhs cueytz ambe favas e cant sian pelas onh de nueyt los polsses e sia san.

Los sayn d’als pelas mes al ray del solelh en l’aurelha malauta cura la dolor.

Alhs bulhis e pueys manias curan tos, sospirs e fa·n clara vos.

E tolon rauquegia si on los mania cueys en ayga o en braza de nueyt can on se·n va jazer.

Alh bulhit e pueys picat enfladura cura sol que dessus sie mes.

Hon caut non deu uzar als car el cors se fan malas humors don venon lebrozias o mors o autras malautias; alh val contra palazia si on l’uza e tol tota ventozitat e tot loc dur fa mol.

Si dessus es mes alhada fort beguda en deju aussis lo lombrix del cors e fa ben urinar e la fleuma dessus gitar.

L’alh sana la dolor de la dent de freia cauza si ambe la dent malauta l’alh es mesclat.

Ronha ambe alh fregada sana tost.

Lanha ayga mala o enferma on que on ane non pot nozer a dengun on sol que en dejun manie d’alh, may qui trop l’uza tol jazer ambe femna.

 

La vertut del plantage.

Plantage maior picada e mesclada ambe mel e sus plaga humoroza meza sana la humor de la plagua.

Condut fay de plantage e de sal e de lentilhas: si home que aia correnssa lo mania tost enstanca.

Plantage picada e pauzada en loc don yeys sang tantost l’estanca.

Tota taca negra del cors ambe plantage fricada torna a sa color.

Plantage ambe clara d’uou mesclada sana tota cremadura si es meza dessus tot pistat.

E contra morssura de cha si dessus es meza e ambe sal picada.

La dita plantage sana las glandolas si dessus es meza frescamen tres ves lo jorn.

Plantage cueyta com cauls e soven maniada sana tost tot aganos e rent tot estomac bon.

E val a tot homme que cas d’aquel mal.

Lo suc mezeis mes en l’aurelha tol la dolor.

Hom que escup sang beva del suc ambe vinaygre e tost guerira.

E es bon a home deffitios e estanca tota correnssa.

Alh uelhs cremas e enflas met dins del suc e sians guerit.

Plantage soven maniada e manstegada cura e sana las gingivas enfladas e plenas de sanc e qui dolor en dent aura aysso tost la li tolra.

Femna que pert lo sanc daval lana cremada an suc de plantage meta per aval e sia guerida.

La grana de la plantage ambe vin picada e beguda sana leu lo mal de las esquinas e fa la veziga ben sana.

Home que a son col portara rais de plantage non li poyra naysser glandola.

A home [f. 57v] que a la febre terssana en lo jorn que la deu aver doas horas o tres davant que lo mal li venha tres rais de plantage destempradas ambe tres culhiers d’ayga e ambe autres de vin dadas a beure ansi sia tantost guerit; e ayssi mezeis a home quartanari, e metes y catre rais e catre culhiers d’ayga e catre de vin pur.

Tota plantage es freia e seca.

 

La vertut de lensolada.

Lensolada es menor plantage.

Lo suc d’aquesta sana tota floronx que·s fa costa l’uelh ou costa lo nas sol que on la meta ambe mota lena sobre lo mal, mays deu esser mudas e renovelas aquest emplastre de nou en nou jorns.

Lo suc d’esta erba tebe tol dolor e cremazon de ventre sol que l’on frete ambe un prin drap mulhat el suc.

Aquel suc begut aussis los lombrix.

Emplastre fayt d’aquest’herba ambe sayn vielh tol tota enfladura sol que dessus lo mal sie pauzada.

E aquest emplastre es bon a plaga fresqua e torna a mezura las venas que son prop del cul si per la natura yeysson trop.

Lo suc per home quartanari, doas horas am que·l mal lo prenga si·l beu lo jorn que·l deu aver, aqui mezeis sia gueris.

Femna que beu lo suc o lo met daval [a] son temps leu e suau.

Lensolada picada ambe vinaygre sana los pes malautes de caminar sol qu’on la meta dessus.

Lo suc begut ambe bon vin sana e cura tota maladia que sie en la veziga, e aquest suc aussis tot cranch on que sie el cors sol que·l mal ne sie onh.

 

La vertut de la ruda.

Ruda es cauda e seca el ters gra.

E es bona al ventre si on la uza soven, e tol luxuria e a femna l’acreys.

E val contra tos.

Ayga o vinaygre en que es cueyta val contra cremazon de ventre.

E ansi beguda val al pieys e a la corada e gueris ben la postema si ven en alcun dels costas.

E val contra la gota aretiqua e contra gota que sol venir en l’anqua.

Lo suc begut sana febre, may lo malaut deu esser, ans que aia lo mal, lo jorn que·l deu aver, onh al foc caut de ruda cueyta en pur oli.

Aquest mezeys enguent val a dezenfladura de budel sol quan per la natura daval lo meta ambe lo cresteri; e aysso mezeis aprofieyta la ruda vert beguda ambe bon vin clar.

Beurage d’oli on fort ruda cueyta e sus lo ventre dada enfayssada aussis los lombrix vi.

E que ruda ambe figas blancas es trissada e cueyta tot aganos aussis sol que lo malaut tot jorn ne beva e que s’en faysse son ventre tota nueyt d’aquo que es en lo vin cueyt.

Ruda fresca e cruza maniada fa clara vista, may plus y val lo suc d’aquella ambe lo suc del fenolh per egal on sie mesclat un fel de gal e tot aysso mesclat ensemps e mes en bel vayssel on lunha lageza non puesca cazer [f. 58r] deu aqui pauzar dos jors o plus, e apres que lo malaute se meta als huelhs cada nueyt, e sia guerit.

Suc de ruda e oli rozat ambe vin per egal tol tota dolor de cap sol que sia onh.

Suc de ruda restanqua tot sanc que yeys del nas sol que dins sie mes.

Del suc e colat e tebezat en rusca de milgrana, tol dolor d’aurelha sol que aysi on ne meta dins.

Enguent fait de blanqua e de vinaygre e d’oli rozat e de suc de ruda per egal sana foch salvage e berbeza e fa morir la maladie.

Aquest enguent sana los floronx del cap que son humors e bragos sol que on los ne onha e sana los flayronx que venon dins lo nas.

Ruda en dejun maniada tol que de tot aquel jorn on non pot esser evernias ni empoyzonat e, si on era, manies en pron car mot y val.

Yssament vint fuelhas de ruda ambe un pauc de sal e catre nozes e doas avelanas e catre figas secas, aysso enssemps tot mesclat e en dejun maniat gueris tot home de poyzons e de totas faytilhas de mort e ansy on mostra las mostelas que cant se volon combatre ambe las serps manian primierament de la ruda e pueys son seguras de tot verin.

E val a tota maladie que venha ne sie dins los budels.

Emplastre de ruda vert e de fuelhas de baguier tot enssemps ben picat e pauzat sobre los colhons enflas, aquels dezenfla.

Emplastre de ruda picada e mesclada ambe polvera de caroyn e de comi e ambe un borol d’uou sana tota dolor de ventre sol que dessus sien pauzas suc de ruda e de menta per egal.

E val mot contra morbum caducum sol que sie al pacient mes per las narras.

E aquo mezeis val una ponhada de ruda temprada nou jorns e nou nueys sol que lo malaut d’ela manie tot jorn: en breu temps sia guerit.

Lo suc de la ruda mes en las narras purga lo cervel e·n gieta tota fleuma.

Tot home cartanari lo jorn que deu aver lo mal ans que li venga si beva una bona opiada destemprada ambe suc de ruda; tost sia guerit, may avant deu esser son cors purgat.

Ruda, qui la uza, fa ben urinar, tol ventozitat.

Diapiganos: un lectuari fait dintre de pebre e de comi per egal, tot aysso longamen destrempas ambe fort vinaygre e pueys secat e ben picat e pueys auras de ruda ben mundada aytant com de savanssa; e cant sia picada mescla y mel e totas las autras causas dessus ditas e tot aysso garda enssemps car qui d’aysso soven maniara non aura dolor en pieys ni en costas ni greuge ni escalfament al fege ni dolor en esquinas. Lo ventre mol aprima e tol tota grugueza e fa tostemps lo ventre mol e conforta e li dona aiuda a corre tost e leu tot lo conduch o prin o greu.

 

La vertut de l’api.

Api es caut e sec en lo ters gra.

Mezola de pan blanc ben esbeguda en suc d’api e pueys picada, val a tota [f. 58v] enflazon e a bossas enflada sol que dessus sie pauzada.

Api maniat tol tota cremazon e enflazon de ventre e·n gieta tota la auleza dedins.

La fuelha d’api o lo suc on sie cueyta la rais d’api beguda fort fa urinar.

Api maniat val contra morssura verinoza e la grana may e l’ayga trop mays on sia cueyt sol que ne bevas.

E val a la tos api maniat e cueyt en ayga ambe vinaygre: constuba fort.

E maniat en dejun rent color a home que l’a perduda per malautia.

Api picat e mesclat ambe ayga en dejun tol febre cotidiana sol que lo febros la prenga lo jorn que la deu aver ans que li venga.

Api picat e ambe suc de fenolh destemprat e ambe sal e pueys begut val contra aganos e contra fege escalfat endursit e enflat.

Api picat tol lageza de cara e la cara lentilhoza o picotoza rent clara sol que l’api un pauc picat sie de nueys dessus enfayssas, empero tota hora que on en leva aquest emplastre deu lavar sa cara ambe ayga ont bren sie mesclat.

Ambe bren e ambe clara d’uou purga nafra ben e gent sol que on meta soven dessus.

E aysso purga ben floronx.

Nul hom que ca de gota non deu maniar ni tocar ni femna prenh en luna ma[n]yeyra api car a cascun fara grant mal.

E tota femna que alayte non deu maniar ni beure api ni lunh enfant.

Api maniat en dejun soven tol mal alen e pudent et rent lo bon flayrant.

A festolas aussir fay polvera en ola nova e met y merda d’ome e arta ben e pauza o sus; e a cranch aussir pren copaross e grays de veyre e aurpunient e mel en guiza d’enguent e pauza o sus e guerra.

 

Amalvi.

Amalvi es herba bona e la flor cozeras ambe layt e pueys lia y las sus la nafra e fara purgar la nafra.

Aquo mezeis fa la flor picada ambe vin e sus pauzada e tol tota cassadura.

Rais de malvi cueyta en ayga e pueys picada ben ambe sayn vielh e ambe goma terebenga que ven d’outramar sana e abayssa tota enfladura sol que·n loc d’emplastre sie dessus meza e amolezis los nervis e fa madurar e abragar postema dura.

E l’ayga ont rays de amalvi es cueyta sana los locs de la maladie sol que sien soven banhas.

E si on a correnssa met lo vin en que sia cueyta la rais de la amalvi e guerira tost.

Aquesta bevenda val a tota femna que a enfantat e non es ben purgada.

E qui lo sanc escupira d’aysso beva: guerit sia.

E qui a peyra beva en pron e soven e valra li.

E per mos mals de la veziga es bo car ansi los desraziga.

La semenssa de l’amalvi ben picada ambe oli e ambe vinaygre destrempada purga tota taca sol que sie onha ben e fa la cara bella e clara.

Qui beu la semen ambe vin temprat non sia leu entoyssegat.

Si on vol leu guerir nafra que fort se cava e vol aver ben bona carn coza la rays de l’amalvi e trisse la ambe mel ben e gent [f. 59r] e pueys tot aysso enfaysse sobre la nafra e sobre tot mal dur, may aquest emplastre deu esser doas ves lo jorn mudas e renovelas.

Emplastre de las fuelhas d’amalvi cueytas fort en oli e picadas es bon e val contra morsura verinoza e contra tota cremadura.

 

La vertut de la bretonega.

Bretonega fa urinar e las peyras el cors pesseiar.

Temprada ambe vin e beguda sana tot home que escup sanc.

E beguda ambe vin gueris aganos.

Ben tost las fuelhas trissadas en loc d’emplastre pauzadas tol cop d’uelh e la dolor e la negror sol que dessus sie pauzat.

Lo suc d’aquest’herba colat e puey mes en l’aurelha.

Polvera de bretonega ambe mel cueyt e mesclat sana tot escupiment de sanc e sospirs doloyrozes sol que lo pacient en beva soven.

Sana dolor de ventre empero qui febre aura ambe ayga cauda aysso beura e si non a febre ben la li pos donar ambe vin pur roge o clar.

Qui beu la pols ambe layt pur yssir fa ambe grant mezura.

Fuelhas de bretonega ambe sal tressada e sus nafra fresqua pauzada tantost la gueris.

Bretonega ben picada colp e cassadura de cap gueris e madura sol que sie aysso sus lo cap meza e liada.

Bretonega e ruda per egal ben picada e soven ensin beguda e maniada fa que on non ha huelhs lagremozes e encaussa escurdat de huelhs. E ensy beguda ambe ayga cauda fa los clars e bels e sens tot mal e·l mal sanc gieta per aval.

Ont que aquesta herba bega ambe ayga cauda es escors: aquo li fara grant pron al pieys.

Qui beu ayga on amalvy es cueys jamais non aura mal al fege.

Catre onz de bretonega e vint e set grans de pebre tot aysso trissat e mesclat ambe tres enaps de vin e begut purga la esquinantia e·n gieta la dolor; aprofayta mot als ronhons.

E una onz de bretonega picada e ambe ayga cauda destrempada ambe mel tol tos e beguda amolega lo ventre.

Home que a febre cotidiana beva una onz de suc de plantage mesclat ambe doas onz de suc de bretonega destemprat ambe ayga cauda ans que·l mal lo tenga lo jorn que li deu venir e sia guerit.

Una onz d’esta herba picada e ambe ayga cauda destemprada sana aganos.

E la escorssa de la rais picada e beguda ambe ayga mesclada purga malas humors.

Mays lo malade en deu penre doas dracmas ambe vin cueyt e que ansi la prenga: la fleuma gieta e purga.

De las fuelhas la polvera dada ambe ayga que sie mesclada val a home crebat.

Si beu per bretonega e la semenssa val e aiuda a tot verin.

Tot home que a lo mal gruoch beva una onz de bretonega ambe vin caut destemprada e guerra tantost.

La polvera subtil mesclada ambe mel e pueys maniada cos la vianda al ventre e conforta.

[.....] e si onhes lo loc non yran avant may se batran tant ambe las cohas tro que morran.

Qui aquest’herba portara ja non sia lus temps affaytat per encantament ni per [f. 59v] faytilhes.

 

La vertut del morvent.

Morven es herba cauda e seca.

Aquest’herba mesclada ambe mel seca e purga floronx e nafras bragozas.

Morvent bolhit en ayga o en vin gueris verm de cap sol que ambe aquo ne sia lavat.

A qui dol lo cap o lo front o autra cauza fassa liar lo morvent cueyt sobre la dolor e tenga lo y tota nueyt.

 

La vertut del por.

Por maniat o begut val trop a home que escup sanc.

May mesclat ambe galas val mays o ambe farina de esses sol que sie begut.

Qui escup sanc aia grana de pors e mira per egal e tot aysso picat e anbe bon vin destrempat e soven begut gueris tost.

Aysso mezeis estanca lo sanc que cas del nas si dins lo nas es mes un pors picat ambe mel e sus pauzat: y val mot.