I.

1. En tal hai mess mo cor e mo conssir
2. qi·m fai scemblant orguoillos e salvage,
3. e fai pechat, q’ieu l’hai fach homenage
4. e son en lei assis tot mei deszir,
5. e no l’er gen, si aissi·m vol loignar
6. del sieu bel cors complit, honrad e car,
7. cui soi aclis tant q’a la mia fei
8. jeu no sai qal am plus, ma domna o mei.

II.

9. A lei soplei e vas autra no·m vir,
10. ne no entend en autre seignorage,
11. mas sol el sieu qi·m ten en son ostage.
12. Be fora dreich q’ela·m degnhes auçir
13. e sol d’aitan degra me be onrar
14. d’acuillimen e de gen acoindar;
15. qant ieu li soi denant ni·l qer mercei,
16. tot mo conort adoncx de mos oillz vei.

III.

17. Be sai q’Amors m’ha fach a dreich chausir
18. en la genchor q’anc fos de nul lignage,
19. e coind’e gai’ e de tot bon estage,
20. e sa valor vei totz jorns enantir.
21. Al mieu scemblan no ha egal ne par,
22. ab tot aicho jeu no m’en puosc lauszar;
23. mais, qal qe·m facha, a lei·m don e m’autrei
24. qe ja per re no·m partira de sei.

IV.

25. Be·m dei, si·ll plasz, ma domna retenir
26. e dei laissar alqes de son oltrage
27. vas me, a cui anc no fe clar visage.
28. Dies, per qe·l fai? Ja no·m degr’avenir!
29. Be leu o fai qar il me vol provar
30. s’ieu soi leials ou faill vas lei amar;
31. e non penria q’ieu fos en luoch de rei,
32. q’ieu no hagues s’amor e son domnei.

V.

33. Per cho·n fui pres, qar fai a totz graszir
34. ma domna, en cui truob’hom tot bel usage,
35. e tut sei faich son avinen e sage
36. e·n fa Jovent pojar e reverdir;
37. q’anc no fo res q’hom li pogues blasmar,
38. sol pietat pogues ab lei trobar;
39. aicel qi fesz son gent cors en sa lei,
40. me don sa joia en chambra o·m seiornei.

VI.

41. Domna, en vos truob’hom trop bel estar
42. qe no·i pod hom nuilla ren esmendar,
43. per q’ieu soi mess en la vostra mercei:
44. qan vos plaira, vos membrara de mei!