I.

1. S’ieu anc per fol’entendensa
2. fuy contra·l voler del sen,
3. Amors, aras me·n repen,
4. qu’avertitz mi suy d’aitan:
5. que mais val benestansa
6. que persegre·l dan,
7. e mais qui vol trair’enan
8. son sen, que·l nesci talan,
9. qui a proat defalhensa.

II.

10. E pus vey que no l’agensa
11. qu’ieu n’aya ren mas l’afan,
12. ia no·m planh’om del enian
13. s’ieu per negun falhimen
14. trac d’autruy tort penedensa;
15. e fora·l pro e gen,
16. qu’ie·l servis a mon viven,
17. o que·l plagues d’avinen
18. o que me·n fezes parvensa.

III.

19. Ben pauc a de retenensa
20. qui son servizi despen
21. ses grat e ses iauzimen;
22. pero piegz fai, per semblan,
23. e maior desconoyssensa,
24. selh que vay trichan
25. selhuy que·l serv e que·l blan;
26. e non a vergonha gran
27. qui d’aisso non a temensa.

IV.

28. Amors, vostra mantenensa
29. partez a guiza d’enfan,
30. qu’ieu, quar fatz vostre coman,
31. n’ay l’afan e·l marrimen;
32. e·n trac midons a guirensa,
33. quar non li·m defen:
34. mas ben pauc fa d’ardimen
35. qui contra·l vencut s’empren,
36. a cuy degra far valensa.

V.

37. Chanson, vai te·n ses bistensa
38. a Monpeslier, on s’enten
39. gaugz e trobai guerimen;
40. pueys di·m al comte prezan
41. cuy es Tolzas et Argensa,
42. s’ieu en dis mal en chantan
43. de luy, ni·n menti blasman,
44. yeu·n dirai vertat lauzan
45. ab que·m luenh sa malvolensa.