I.

1. Companho, per companhia
2. de folor,
3. soi d’amor en gran error:
4. laidament romp e deslia
5. e·l jovens qu’en leis se fia
6. vai marritz
7. pels amadors apostitz.

II.

8. Ma part ai en la folia,
9. chantador,
10. quar anc fui proatz d’Amor,
11. c’al comensar me fon pia
12. mas era·m torn’en bauzia
13. tot quan ditz,
14. per que·m tenc per avelitz.

III.

15. Mas ab bel mentir prendia
16. ses clamor,
17. no tem mais escarnidor,
18. qu’ela ditz ver quan mentia
19. et ieu ment can ver dizia.
20. A envitz
21. rema lo drutz esbaitz.

IV.

22. Pos a trichamen s’aillia
23. trichador,
24. trichem tug, dompnejador,
25. que·l trichars abaisaria
26. mas lo trichament: ceria
27. feblezitz
28. lo trics de la trichairitz.

V.

29. Mas a enguan se vezia
30. ses paor
31. .  .  . .  .  .  .  .  .  .  .
32. enguanat enguanaria,
33. enguanatz de felonia
34. vai garnitz
35. com enguan enguanairitz.

VI.

36. Pero per conseill faria
37. la leujor
38. Bernart Martin lo Pintor
39. que ditz e trai guirentia:
40. «Greu er amor ses putia
41. camjairitz,
42. tro que·l mons sia fenitz».

VII.

43. Uzatges es, c’om en ria
44. o qu’en plor,
45. anc nuils hom a dezonor
46. non fes plag en drudaria,
47. per qu’ieu penrai de la mia,
48. totz aunitz,
49. lo be que·m n’es escaritz.

VIII.

50. Eu n’aurai la senhoria
51. en pascor
52. quan so·l ram carguat de flor,
53. tals pot esser l’escaria,
54. qu’encaras reverdiria
55. la raitz
56. e·l verguans estes floritz.