I.

1. Pos entremes me suy de far chansos
2. ben dey guardar que fals motz no·i s’entenda,
3. e s’ieu dic re que midons en grat prenda
4. be m’en sera rendutz bos guazardos.
5. Et agra·n tort si mos chans non l’es bos.
6. Per que? Quar ylh m’a donat l’art e·l genh
7. e so qu’ieu fatz non dei metr’en desdenh.

II.

8. E sitot m’es de semblant orgulhos
9. non ai poder que ves autra m’entenda,,
10. que·l cor e·ill huoill me mostron que·il me renda
11. tant m’agradi de sas bellas faissos;
12. e quan m’en cug partir no m’es nulhs pros,
13. que·l sieu’amors m’es denan qui m’atenh,
14. que·m fai tornar vas lieys, tan mi destrenh.

III.

15. Luenh m’es dels huelhs mas del cor m’es tan pres
16. selha per cui soven plaing e sospire
17. que, on plus n’ai d’afan e de martire,
18. dobla l’amors e nays e creys ades,
19. e quar suy sieus no cug que m’enguanes,
20. e fi me tant e·l sieu ensenhamen
21. per qu’ai respeyt que n’aura chauzimen.

IV.

22. Ben fora sens si de lieys me lunhes
23. ans que·m laisses a la dolor aucire,
24. mas Amors vol qu’ieu sia francs suffrire
25. e ja per ren non aia·l cor engres:
26. anc Dieus no fetz nulh hom qui ben ames
27. que non crezes mieils Amor que son sen,
28. per que m’aven a far son mandamen.

V.

29. Anc nuls amans per sidons no sufri
30. tan greu dolor ni tan gran malanansa;
31. per merce·l prec que·m digu’a tal pessansa
32. si·l cor non a que·s melhur enves mi,
33. per que vengues plus viatz a la fi,
34. qu’assatz val mais morir al mieu semblan
35. que totstemps viur’ab pen’ez ab afan.

VI.

36. Chansoneta, vai t’en tot dreyt cami
37. lay a midons en cuy ai m’esperansa
38. e diguas li qu’aya qualque membransa
39. de me quar l’am ses enjan ab cor fi,
40. qu’anc per ma fe des l’ora qu’ieu la vi
41. non ai mudat ni camjat mon talan,
42. ans l’am ades e la dupt e la blan.

VII.

43. Seign’En Heralh de Polinac, montan
44. vai vostre prez a chascun jor del an.

VIII.

45. Bella-Guarda, de vos dauri mon chan
46. que negus hom no pot mentir lausan.