I.

1. Si com sel qu’es tan greujatz
2. del mal que non sen dolor,
3. non sent ira ni tristor,
4. de guiza·m sui oblidatz;
5. car tan sobrepueja·l danz
6. que mos cors no·l pot pensar
7. ni nuls hom tro al proar
8. non pot saber com s’es granz
9. d’En Baral, lo meu bon seingnor;
10. per que, s’er chan o ri o plor,
11. no m’o pres plus, que fer’enanz.

II.

12. Qu’ie·m pes si sui enchantatz
13. o son cazutz en error
14. quan non trop sa gran valor;
15. c’aissi nos teni’honratz
16. qu’eisamenz com l’azimanz
17. tira·l fer e·l fai levar,
18. fazi’el manz cors dressar
19. vas pretz, forsatz e pesanz;
20. e qui pretz e gaug et honor,
21. sen, largueza, astr’e ricor
22. nos a tot, pauc vol nostr’enanz.

III.

23. A! canz n’a deseretatz
24. qu’eron tuit ric en s’amor,
25. e quant en moriro·l jor
26. qu’el fo mortz e soteraz!
27. qu’en un sol non vist mortz tanz;
28. neus qui l’auzion nomar
29. n’entendion achaptar
30. tan era sos prez presanz;
31. c’aissi saup so nom far ausor,
32. de pauc gran e de gran major,
33. tro no·l puoc enclaure garanz.

IV.

34. A! seigner dolz e privaz,
35. com posc dir vostra lausor?
36. c’a lei de riu sorzedor
37. qu’ieis mais on plus es voiatz
38. creis vostre laus en pensanz
39. e·i trob ades mais que far
40. e sembla·l vostre donar
41. don vos cressia·l talanz
42. on mais venion queridor;
43. mas Deus com a bon donador,
44. vos donav’ades mil aitanz.

V.

45. Et ar, can foz plus pujatz,
46. faillitz a guisa de flor
47. que, quant hom la ve gensor,
48. adoncs il chai plus viatz;
49. mas Dieus nos mostr’ab semblanz
50. que sol lui devem amar
51. e·l caitiu segl’azirar
52. on passam com viananz,
53. c’autre pretz torn’en desonor
54. e toz autre sens en follor
55. mas de cels que fan sos comanz.

VI.

56. Bel Seingner Dieus, cui non platz
57. mortz de negun peccador,
58. anz per ausire la lor
59. soffrist vos la vostr’, em-patz
60. fatz lo lai viur’ab los sanz,
61. pos sai no·l volguest laissar!
62. E deignatz l’en vos pregar,
63. Verges, que pregas per manz
64. vostre Fil, per qu’el los socor,
65. qu’esperans’an tuit li meillor
66. els vostres cars precs merceianz.

VII.

67. Seingner, meravillas granz
68. es, car de vos puosc chantar
69. ar can mielz degra plorar;
70. pero tan plor en pensanz
71. per que ben leu man trobador
72. diran de vos mais de lauzor
73. quez ieu qu’en degra dir mil tanz.