I.

1. Tan mou de corteza razo
2. mos chantars qu’ieu no·i puesc faillir;
3. enans hi dei miels avenir
4. qu’anc mais no fis; e sabetz quo?
5. que l’emperairitz m’en somo;
6. e plagra·m fort qu’ieu m’en gequis,
7. s’il m’o sofris;
8. mas, car ylh es sim’e razis
9. d’enssenhamen,
10. no s’eschai qu’al sieu mandamen
11. sia mos sabers flax ni lens,
12. anz tanh que·s doble mos engens.

II.

13. E s’anc parliei e ma chanso
14. de lauzengiers, cui Dieus azir,
15. aissi los vuelh del tot maldir,
16. e ja Dieus noqua lor perdo
17. quar an dig so qu’anc vers no fo,
18. per que sella cui obedis
19. me relinquis
20. e cuja qu’aillors ai’assis
21. mon pessamen;
22. be muer doncx per gran fallimen
23. s’ieu pert so qu’ieu am finamens
24. per so qu’il dizo qu’es niens.

III.

25. Mas ges per tal no m’abando,
26. qu’ieu ai anc sempres auzit dir
27. que messonja no·s pot cobrir
28. que no mueira qualque sazo;
29. e pos dregz vens fals’ocaizo,
30. encar er proat e devis
31. com ie·l sui fis;
32. qu’aissi·l sui subjetz et aclis
33. de bon talen
34. qu’en lieis amar an pres conten
35. mos ferms Coratges e mos Sens,
36. c’usquecx cuj’amar plus fortmens.

IV.

37. E si Merces no m’i ten pro
38. que farai? poirai m’en partir?
39. ieu no, qu’apres ai a murir,
40. de guisa que m’er sobrebo:
41. qu’ins e·l cor remir sa faisso,
42. e remiran – et ieu languis,
43. quar ela·m dis
44. que no·m dara so qu’ieu l’ai quis
45. tan lonjamen –
46. e ges per aisso no m’alen,
47. ans dobl’ades mos pessamens –
48. e muer aissi mescladamens.

V.

49. Amarai la doncs a lairo,
50. pos vei que no·m denha sofrir?
51. oc ieu, qu’ins e·l cor la remir
52. e sai qu’a far m’er, vuelh’o no;
53. que·l Cor ten lo Cors em preiso
54. et a·l si destreg e conquis
55. que no m’es vis
56. que·lh des poder que s’en partis;
57. enans aten
58. quom la puesca vencer suffren,
59. car loncx sufrirs e merces vens
60. lai on no val forsa ni giens.

VI.

61. N’Aziman, mout m’estara gen
62. s’ieu muer per midons doussamens,
63. pos a murir m’er eissamens.