I.

1. Crezens, fis, verays et entiers
2. fui vas midons tostemps, senhor,
3. et ylh portava·m tan d’onor
4. qu’anc un jorn son joy no m’estrays.
5. Desaventur’ – ailas! – lo·m trays,
6. que sap tot lo mon escarnir:
7. falsa mortz que·ns a faitz partir
8. mi e midons! Dieus lieys ampar!

II.

9. Mielhs fora qu’ieu muris premiers
10. que ses joy visques ab dolor;
11. que perdud’ay la bellazor
12. dona qu’anc fos ni er jamais:
13. per qu’ay ira, dols e pantays.
14. Mortz, cum pogues midons aussir,
15. que totz lo mons degra jauzir
16. sas beutatz e·l joys remirar?

III.

17. Dona, per vos mos deziriers
18. m’aportava de joy sabor;
19. aras no·m val joys ni·m socor,
20. qu’ira·m met al cor tan gran fays,
21. quan suy em pes, cazer mi lays
22. e no·m puesc nafrar ni delir.
23. Dona, mais volgr’ab vos murir
24. ab joy qu’ab ira forsenar!

IV.

25. Tant estranhs es mos cossiriers,
26. nuech e jorn planc, sospir e plor,
27. caytius, desheretatz d’amor,
28. ses joy, dolens, que d’ira·m pays,
29. e par ben al fron et al cays:
30. jov’e saur, vielh encanezir,
31. cazer, levar e trassalhir
32. me fay ira, viu mort anar.

V.

33. Jamais no seray prezentiers
34. que perdut ey pretz e valor;
35. estar ses joy a deshonor,
36. ja Dombredieus viure no·m lays!
37. Quec jorn afenisc et abays,
38. qu’ira no·m pot del cor yssir;
39. quan pes de joy per esbaudir,
40. tot lo sen perc e·m dezampar.

VI.

41. Totz autres joys m’es encombriers,
42. tant ay lo cor plen de tristor;
43. perdud’ay vergonha e paor:
44. ybres, auras vau, ybriays.
45. Ja Dieus no·m do per qu’ieu engrays,
46. ni·m lays mais ad amor servir;
47. mais vuelh mon cor pessan blezir:
48. tostemps serei tortre ses par.

VII.

49. Dompna, grans joys, grans alegriers,
50. vos met’el renc del cel aussor
51. ab los angils que fan lauzor,
52. aissi cum Sans Johans retrays,
53. qu’anc fals lauzengiers, brus ni says,
54. non poc un sol de vos mal dir;
55. n’ieu no sabria yssernir
56. los vostres bos ayps ni comtar.

VIII.

57. Jhesus vos fass’al sieu servir
58. el clar paradis resplandir
59. entre las verjes coronar.

IX.

60. Quar Gavaudan no pot fenir
61. lo planch ni·l dol que·l fa martir,
62. jamais res no·l pot conortar.