I.

1. Can l’ivern ni la neu ni·l frey
2. vey venir ni·l glatz ni·l aurei,
3. chantarai de las traicios
4. que·m fetz Mos Sogre, ·l veill tynos;
5. c’anc no m’i valc ni dret ni fei,
6. al bran d’acier ne clam mercei
7. e al ferran Matagelos.

II.

8. E sobre tot al Glorios,
9. que sab mos dret e mas razos,
10. qu’esters autra dona no vey
11. mas Ma Sogra, a cui sopley,
12. qu’es la gençer e la plus pros
13. que sia de ça enfre nos;
14. e ment ne qui m’o desautrey.

III.

15. E ja no s’en combat’ab mei
16. un cavaler ni dui ne trei,
17. que la gençer dona c’anc fos,
18. bela Sogra, e sietz vos
19. que sia de neguna ley;
20. et venceria·m, fe qe·us dey,
21. dos catalas o tres gascos.

IV.

22. Sogra, per vos estau joios,
23. francs e fis o homelitos;
24. e can ma seynera despley,
25. en batayla ni en torney,
26. vau del ferir encoratjos,
27. que, s’era leupartz o leos,
28. no mouria tan gran esfrey.

V.

29. Arnaldo, en ton palafrey
30. t’en vay dir a mon seinhe·l rey
31. - joglar, no sies temoros,
32. enans sias del dir cocchos -
33. qu’el per fol cosseyl no·m guerrey,
34. que mais val qu’en sa cort plaidei
35. et qu’el ne sia poderos.

VI.

36. Qu’eu farai dret volenteros
37. e manament en sa mercey;
38. e qui m’apela de no-fey
39. eu non soan neire ni ros.