Lo VI vers d’en Gr. Riquier, l’an MCCLXXIIII.

I.

1. Grans afans es ad home vergonhos
2. sercar las cortz entre las ricas gens,
3. tans dels sercans trob’om desconoyssens,
4. ses vergonha, frontiers ez enujos,
5. e de querre abrivatz ez arditz,
6. per qu’als bes faitz vey derriers los chauzitz,
7. e·l donador an part en la fallensa.

II.

8. Qu’er non es hom de saber sofrachos,
9. sol que sia prezentiers e querens;
10. mas comensat fon per homes sabens
11. e per azautz, de bon grat enveyos,
12. cortes e francx, conoyssens, gent noyritz,
13. viur’entre·ls pros ab belhs sabers grazitz,
14. e·l bon, ab grat, fazian lur valensa.

III.

15. Mas eras vey los folhs e·ls ergulhos
16. otracujatz, ricx forssan los manens
17. que lur queron desvergonhadamens,
18. e·ls ricx lauzatz e blasmatz per un dos.
19. Quar negus dos non es d’onor complitz,
20. s’al donador ez al prenden aizitz
21. non es bos gratz, e devers no·l comensa.

IV.

22. Pero estiers fa hom lo pus dels dos,
23. que·l queredor prendon mans dos valens
24. qu’als donadors negus non es plazens,
25. ni·ls farian si non eran somos.
26. E si laus n’an, non lur n’es valors guitz
27. qu’esta en cor on es bes abellitz,
28. e de falhir vergonhos ab temensa.

V.

29. E pot esser greu nulhs faitz cabalos,
30. pus selh que·l fa non es de cor fazens,
31. quar le faitz es greus e·l ditz e·l parvens
32. ses tot bon grat, per qu’es aventuros
33. si n’a bon laus que sia luenh auzitz
34. per lauzadors crezutz: quar faitz marritz
35. no pot dar grat ni laus qu’aya tenensa.

VI.

36. Per que totz hom, que vuella esser pros,
37. deu gent parlar e far faitz avinens,
38. e quar es dars honors dels conoyssens,
39. deu esgardar a cuy totas sazos
40. e cum, e que, e per que, yssernitz
41. de son poder atemprar, ses braus ditz,
42. ab son dever e segra conoyssensa.

VII.

43. Reys sobronratz de Castella n’Anfos,
44. no·m pot esser totz l’autre mons guirens
45. de greu afan, si doncx vos, on bos sens
46. es ab totz bes, no·m voletz far joyos.
47. Quar mon temps perc vergonhos ez aunitz,
48. non conogutz, sal per vos, on guanditz
49. es mos espers, apres Dieu, de guyrensa.

VIII.

50. Bos reys, tant m’es vostres lau[s] abelhitz
51. quar m’es honratz, qu’ab elh viuray ayzitz
52. d’esser manens o paubres, ses fallensa.

IX.

53. Si per mon Belh Deport me fos grazitz
54. mos chans, tot l’als meyra en nonchalensa.