Lo XXI [= 20°] vers d’en Gr. Riquier, l’an MCCLXXXVI, en novembre.

I.

1. Jamais non er hom en est mon grazitz
2. per ben trobar belhs digz e plazens sos
3. ni per esser de bon grat enveyos,
4. tant es le muns avengutz deschauzitz,
5. quar so que sol dar pretz, grat e lauzor
6. aug repenre per folhia maior,
7. e so qu’om sol repenre e blasmar,
8. vey mantener ez aug per tot lauzar.

II.

9. De tolre vey los poderos arditz
10. e·ls vey volpilhs de condutz e de dos,
11. e de dir ver tardius e vergonhos,
12. e de mentir frontiers ez yssernitz,
13. e lialtat no servan ni amor,
14. ans ab enjan s’aziran entre lhor,
15. ez a merce no·s volon regardar
16. e son cobe d’aizina de peccar.

III.

17. Ab tot ditz hom que·l mun[s] es corregitz
18. e pus que mais no fo es valoros,
19. e pareys be de conoyssensa blos
20. qui so pessa, e trop pus qui o ditz,
21. qu’anc el mon mais tant no foron trachor,
22. ni falsari sufert, que·l gran senhor
23. fan de gran tort, ab elh[s], bon dreg semblar,
24. ez es volgutz mais qui·n sap pus obrar.

IV.

25. Perparan dreg, es tortz tant enantiz,
26. que·l mons es ples de platz e de tensos,
27. qu’om sec apelhs, assizas volontos,
28. meten lo sieu tro n’es empaubrezitz;
29. e caritatz no troba valedor,
30. don vey camjar totz jorns mal per peior,
31. e pot quascus en si meteys trobar
32. que vertatz es, si so sap cossirar.

V.

33. Ab aquelh mal qu’es dels autres razitz
34. ez ab erguelh, em tug contrarïos
35. a tot dever, qu’entre mil non a dos
36. que·s conoscan, car bos sens no·ns es guitz
37. ni temem mort ni pena ni dolor
38. ni vergonha, ez auiatz gran folhor:
39. qu’apres la mort mandam so acabar
40. per nos, que viu no sabem comensar.

VI.

41. E tuch avem los mandaments auzitz
42. que nos a faitz Dieus, qu’es totz poderos
43. e totz savis, drechuriers e totz bos,
44. ples de merce; mas pauc n’es obezitz
45. e sol qu’aman, luy honran ab temor,
46. e l’us l’autre visquessem ses rancor,
47. fazen lo ben que pogram, ses mal far,
48. crey certamen qu’elh nos volgra salvar.

VII.

49. Sanctz paires Dieus, sanctz filhs, sanctz esperitz,
50. qu’etz caritatz, misericordïos,
51. e tot quant es, es nïens senes vos,
52. Senher, tot so de que vos etz servitz
53. nos faitz obrar a la vostra honor,
54. e de tot l’als, per la vostra doussor,
55. faitz nos partir e·ns o faitz azirar,
56. e·ns datz guida que ·ns sapcha dreg guidar.

VIII.

57. De far l’obra son trop li dictador
58. de drechura e pauc li fazedor:
59. l’un trop escur e li autre pro clar,
60. mas tant sofre Dieus que·ns deu temor far.

IX. 

61. Anc pus perdei l’onrat rey plen d’onor
62. de Castella n’Anfos, non ayc senhor
63. que·m conogues, ni·m saubes tant honrar,
64. que me ·n pogues de vergonha sessar.

X.

65. Greu me sera si ·m coven ablasmar
66. un senhor mieu que solia lauzar.