Lo sece vers d’en Gr. Riquier fag en l’an MCCLXXV.

I.

1. Jhesus Cristz, filh de Dieu viu,
2. que de la Verge nasques,
3. Senher, forfaitz e repres
4. vos prec que·m detz tal cosselh,
5. qu’ieu sapcha bes adamar
6. e falhimens azirar,
7. viven al vostre plazer.

II.

8. Quar dels bes ai gran plazer,
9. si sol los sabia far
10. e·ls mals podia layssar,
11. mas ses vos no· y truep cosselh.
12. Aissi m’an li mal conques
13. qu’a penas cossir dels bes:
14. tant suy de peccat el briu!

III.

15. Mas espers me ten el briu
16. de fe que·m valha merces
17. ab vos, Senher! Quar promes
18. nos avetz valen cosselh,
19. si·ns penedem de peccar
20. ab esfortz de satisfar,
21. ez ieu ai del tot voler.

IV.

22. Senher, donc faitz me·l voler
23. ben fazen continuar,
24. que mals no·l fassa camjar;
25. e datz lo meteys cosselh
26. a totz selhs on es la fes
27. vostra, quar grans ops nos es
28. per que·us siam agradiu.

V.

29. Quar silh que·us son agradiu
30. son de totz bes far apres,
31. e dels mals lonhat e des;
32. Senher, donc datz nos cosselh
33. que·l camin sapcham triar
34. e tener que per salvar
35. nos avetz mostrat per ver.

VI.

36. Mostrat nos avetz per ver
37. camin don volgues anar
38. per peccadors restaurar;
39. qu’us non trobava cosselh
40. de salvar, tro vos vengues
41. el mon, qu’era totz sosmes
42. al fals Enemic esquiu.

VII.

43. Del cruzel poder esquiu,
44. Senher, ab pena·ns traysses
45. si·ns volem, qu’estiers non ges.
46. Mas l’Enemicx pren cosselh
47. tan tost els mals aizinar,
48. que·l mon fa tan greu layssar
49. qu’om no· y pot far son dever.

VIII.

50. La Verges al bon cosselh,
51. Senher, nos pot ajudar
52. si·us vol, si quon filh, pregar
53. per nos que·ns vulhatz valer.

IX.

54. Senher, del honrat rey car
55. n’Anfos vos prec qu’enansar
56. li·n vulhatz son bon voler.
57. E mi, Senher, faitz obrar
58. del tot al vostre plazer.