Lo terz vers d’en Gr. Riquier, l’an MCCLXX.

I.

1. Quar dreytz ni fes
2. ni sens ni leyaltatz
3. ni bon’amors
4. no son entre las gens,
5. ni caritatz
6. no·y renha ni merces,
7. qu’enjans los vens
8. qu’es ab cobetat sors,
9. es mals tant montatz
10. e bes tant bayssatz,
11. que·ls bos faitz vey escarnitz
12. e·ls vils prezatz e grazitz.

II.

13. Per que pretz es
14. del pus dezamparatz,
15. tant es ricors
16. al pus creysser plazens;
17. quar apellatz
18. es savis e cortes
19. qui es creyssens
20. del sieu ab qualque cors,
21. e selh fols clamatz
22. a cuy valors platz;
23. don sembla mielhs pervertitz
24. aquest mon[s], que covertitz.

III.

25. Quant yeu me pes
26. quals es la fermetatz
27. e la sabors
28. qu’en aver es prezens,
29. meravilhatz
30. cossir de pretz los bes,
31. e truep que sens
32. es pretz e l’als folhors;
33. quar nulhs hom assatz
34. non a de rictatz,
35. de que·l brius l’es tost falhitz,
36. e pretz a sim e razitz.

IV.

37. Bos pretz a tres
38. noblas proprïetatz:
39. l’un’es honors,
40. qu’es sos comensamens,
41. e l’autra gratz;
42. l’autra que, pus mortz pres
43. a los valens,
44. lurs pretz viu ab lauzors.
45. E par que desplatz
46. a Dieu, quar amatz
47. non es pretz, don es aizitz
48. le mons d’esser tost delitz.

V.

49. Reys ben apres
50. n’Anfos castellas, natz
51. fos per socors
52. far al mon d’onramens,
53. quar tot l’onratz
54. e·l pus vo·n es sotzmes
55. decoralmens,
56. don aug mantas clamors
57. quar no·l vizitatz.
58. Que dic? Esvarratz
59. suy en vos lauzar, quar guitz
60. no·m n’es sabers ni arditz.

VI.

61. Bos reys, gent servatz
62. pretz e Dieu amatz,
63. e·l comensamens grazitz
64. vostres sia gent complitz.

VII.

65. Reys grazitz, honratz,
66. ben crey m’entendatz,
67. donc faitz que gent n’es aizitz,
68. e Dieus per dreg que·us n’er guitz.