Lo X vers d’en Gr. Riquier, l’an MCCXXVI, en setembre.

I.

1. Qui·m disses, non a dos ans,
2. que·l laus me fos desgrazitz
3. del rey n’Anfos, de pretz guitz,
4. mot me fora greus afans;
5. qu’er es tant vil tengutz sa
6. e blasmatz, que sol parlar
7. non aus de luy ad honor,
8. don ai al cor tal dolor,
9. qu’ab pauc chant non desampar.

II.

10. A moutz homes l’aug blasmar
11. que li foran valedor,
12. si guerra l’agues sabor
13. tant quon a cor de donar.
14. Mas ieu, las, suy en esmay,
15. qu’om me sol lauzar mos chans
16. per elh que m’es abelhitz
17. tant, qu’ieu serai sebelhitz,
18. ans que dreg alhors los lans.

III.

19. Mala veyra sos efans,
20. si·l pus de la gent ver ditz
21. que vius n’er despostaditz!
22. E Dieus don me mort enans,
23. quar ja gran joy non aurai
24. tro per ver auia comtar
25. que·l sieu enemic maior
26. aian ab luy tal amor,
27. que d’elhs no·l calha gardar.

IV.

28. Ab dreg a volgut renhar
29. ez ab pretz ez ab valor,
30. creyssen de terr’ab lauzor
31. le reys n’Anfos, que Dieus gar;
32. ez aras deu mielhs e may
33. voler dreg e patz dos tans,
34. sol que non si’escarnitz,
35. per que de Dieu si’aizitz,
36. e sos pretz no·s desenans.

V.

37. Mos ditz sera pro bastans,
38. sol que per luy si’auzitz;
39. qu’ieu parli tot esferzitz
40. e si m’enten non l’er dans.
41. Pero aitant li diray
42. que reys deu amicx amar,
43. mas de l’als dir ai temor:
44. elh chauzisca son melhor,
45. per son dreg dever a far.

VI.

46. Jamais no m’esforsarai
47. del rey castellan lauzar,
48. ni d’autre, si en error
49. ven sos pretz, qu’a deshonor
50. me pogues ab dan tornar.

VII.

51. No suy astrucx de senhor
52. que·m vuelha de cor amar.