Lo XXIIII vers d’en Gr. Riquier, l’an MCCLXXXVIII, en novembre. (23)

I.

1. Vertatz es atras tirada
2. e messonja enantida,
3. e lialtatz encaussada
4. e falsetatz aculhida,
5. qu’om ten per dreg son voler
6. ez obra de son poder,
7. don tortz es tan poderos,
8. que dreitz es a non chaler
9. vengutz, que no·y val sermos.

II.

10. Sancta fes es sermonada
11. mot, e pauc l’obra seguida,
12. tant es plazens e privada
13. selha de mundana vida,
14. qu’om per complir son plazer,
15. desconoys dreg e dever,
16. e d’aver es tant curos
17. hom, e pro non pot aver,
18. que no sap que s’es razos.

III.

19. E crey qu’a Dieu non agrada
20. quar amors no·ns es aizida,
21. ni merces non es trobada;
22. per que patz nos es falhida
23. qu’om no la vol enquerer,
24. don deu lo mons dechazer;
25. quar Dieus totz savis, totz bos
26. no vol en loc remaner,
27. on baratz renh e tensos.

IV.

28. Mas si patz fos essercada
29. tant quon es guerr’afortida,
30. erguelhs non agra cassada
31. merce, qu’al mon fort oblida,
32. per qu’amors no·y pot caber,
33. ni sens no·y pot res valer,
34. qu’erguelhs e baratz ginhos
35. tolhon auzir e vezer
36. ad home totas sazos.

V.

37. Jhesus Cristz nos a mostrada
38. via, qu’es del ver gaug guida,
39. mas tant es pauc ademprada,
40. per que petit es polida
41. quar mot es greus per tener,
42. qu’om manjar be ni jazer
43. no· y pot, ans viu sofrachos
44. del mon que deu fort temer
45. quar tot l’es contrarïos.

VI.

46. Lo mons no dona lezer
47. de be, e fa mal plazer,
48. e qui pus l’es amoros,
49. mens a de ben far poder:
50. tant es le mals saboros!

VII.

51. Sanctz paires, Dieus glorïos,
52. senher, datz nos tal saber
53. que·l mon azirem per vos.