I.

1. Quan vei far bon fag plazentier,
2. mi platz far chantaret plazen;
3. non ies de las chiflas del ven,
4. car ieu no voill tan vil mestier
5. qu’en faitz menutz mos sabers si dechaia;
6. mas los cabals es razos q’ie·us retraia,
7. sivals per dir als avols zo que·il pes,
8. e per plazer dels gais e dels cortes,
9. e per onrar cels qui fan faitz onratz:
10. quar qui ben fai taing q’en sia lauzaz.

II.

11. Per que·m platz dir laus vertadier,
12. chantan de tot home valen;
13. pero no·m cal gaire soven
14. d’aital chant aver consirier,
15. tan trob’om paucs de cels cui valors plaia;
16. mas d’aquels paucs non es razos qu’om taia
17. sos onratz faitz, per qu’ieu non tairei ges
18. zo quez a faig l’onratz reis dels Frances,
19. car s’es primers per far secors crozatz
20. al saint regne, on Dieus fu mortz e natz.

III.

21. Lau e pres et honor en mier
22. lo reis del bon començamen;
23. pero dels meillors si n’aten,
24. q’om li fara lau plus entier.
25. Doncs so c’a gent començat a cap traia,
26. car en la fin chant’om lauzor veraia;
27. e pas de cors la mar, qe granz ops es,
28. que de lai son crestian mort e pres
29. e·l sepulcres fondutz e derocatz,
30. on Dieus pauzet can fon de crotz levatz.

IV.

31. E sai son crestian guerrier
32. entr’els et aqo mortalmen,
33. e non an dol ni marrimen
34. d’est’anta ni d’est emcombrier.
35. Pero si sai la guerra no s’apaia,
36. crestiantatz greu sera qe non chaia.
37. Sabes per que? Car el mon non es res
38. miels puosc’aucir autrui con el metes.
39. Pero, si chai, dir puosc eu que·m desplatz;
40. mas no·n puosc mais, car poders no·m n’es datz.

V.

41. Eu non teing ies per cavallier
42. qui non socor de bon talen
43. o de son poder francamen
44. Dieu, pos el n’a tan gran mestier.
45. Lo rei frances lau qui par que cor n’aia;
46. e los malvatz baros, cui qe desplaia,
47. repren qu’a Dieu faillon zo q’an promes.
48. Mas ies per nom no·ls voill aver repres;
49. quar s’ieu degues blasmar totz los malvatz,
50. tart finera lo chantaretz qu’eu fatz.

VI.

51. Hom demanda tot iorn e quier
52. a Dieu conseill e garrimen
53. et el voluntiers nos enten;
54. mas ara, cant el nos requier,
55. non es auzitz, de qe mos cors s’esmaia.
56. Malvatz baron, cuidatz c’aiso s’eschaia
57. que Dieus vos vaill’e vos non l’aiudes?
58. Ja sabetz vos q’en crotz fon per vos mes:
59. no·us sai plus dir; mas s’ara no·us crozatz,
60. pos pretz perdretz, qe la vida perdatz!

VII.

61. Si no·us valetz, Seingnor Deu, vos metes,
62. dels crois barons secors non esperes.
63. Pero si mortz pren los barons malvatz,
64. secors n’aurez, car pois regnara patz.