I.

1. Ges non sui forzaç q’eu chan,
2. q’amars non m’a em poder
3. e ren [als], al meu parer,
4. no·m pot far força de chan;
5. mas per tan
6. non taing, segon ma semblança,
7. laisar ioi ni allegranza
8. ni solaz;
9. anz m’agrada mais e·m plaz
10. q’eu chan, pos forçatz non sui,
11. per ioi de me ni d’autrui.

II.

12. Dreiz es q’eu d’amor non chan,
13. tant pauc vol al seu valer,
14. car midonz a fin prez ver,
15. don eu daurava mon chan
16. ben estan,
17. laiset morir, don pesanza
18. ai tal cum laus sa condanza.
19. ma solaz
20. retenc e ioi, car mi plaz,
21. car qui ioi ni solaz fui
22. a peich de mort se condui.

III.

23. Mas eu, car volh viure, chan
24. e n’ai sivals mon plaçer,
25. . . . . . . . . . . . . . . . . . . . .
26. d’aisso prez eu mais mon chan;
27. ed on an
28. li croi mais de malenança
29. e·lh nuaillios, mais s’ennança
30. mos solaz;
31. e dic vos qe fort me plaz,
32. can lor es greu ni fan brui
33. de mi, cant eu mi desdui.

IV.

34. Pero eu sai ben, s’eu chan,
35. pauc m’en volran grad saber,
36. eç eu de pauc lo n’esper,
37. tant pauc so cil c’amon chan;
38. mas, chantan,
39. dic eu qe non es onrança
40. ses ioi, ni gran beninança,
41. ses solaz.
42. S’uns totz sols, cui iois non plaz,
43. tot lo mon cargha d’enui,
44. gardaz qe podem far dui!

V.

45. E qar am ioi, de ioi chan,
46. e ab ioi voilh remaner,
47. e ioios mon cor aver,
48. e de ioi daurar mon chan.
49. E s’aman
50. estei anc en greu balança
51. ni·m failhit lonc’esperança
52. de solaz,
53. ar ai ioi de qe mi plaz,
54. q’eu eis, ses amor, m’adui,
55. e sui plus rics c’anc non fui.

VI.

56. Qi solaz
57. ama, ni cui fis iois plaz,
58. chant mon chantar, qe s’adui
59. als pros e dals avols fui.