I.

1. Pax in nomine Domini!
2. Fetz Marcabru lo vers e·l so.
3. Auiatz, que di
4. quom nos a fait per sa doussor
5. lo senhor reys celestiaus
6. probet de nos ·i· lavador
7. qu’anc sa d’outra mar non fo taus,
8. o de sai en vas Jozafatz;
9. e d’aquest de say vos conort.

II.

10. Lavar de ser e de mati
11. nos deuriam, segon razo,
12. so vos afi.
13. Quascus a del anar legor:
14. dementre que es sas e saus
15. deuri’anar al lavador,
16. que·ns es verays medicinaus;
17. e si ans anam a la mort,
18. d’aut desus aurem alberc bas.

III.

19. Mas escassedatz e non-fes
20. part jovent de son companho.
21. A, quel dols es
22. que trastug volon li pluzor
23. don lo guazanhs es yfernaus!
24. S’ans no correm al salvador
25. que la boca sia·n ni·lhs huelhs claus,
26. no·n hi a un d’erguelh tan gras
27. qu’al murir no·n truep contrafort.

IV.

28. Que·l senhers que sap tot quant es
29. e sap tot quant er ni anc fo
30. nos hi promes
31. honor en nom d’emperador.
32. E·l beutatz sera - sabetz caus? -
33. de selhs qu’iran al lavador
34. pus que l’estela gauzinaus,
35. ab sol que vengem Dieus del tort
36. que·l fan payas lai vas Domas.

V.

37. Probet del linhatge cani
38. del primairan home felo
39. a tans ayssi
40. q’us a Dieu non porta honor.
41. Veyrem qui l’er amicx coraus,
42. qu’ab la vertut del salvador
43. nos sera Jhesus cominaus;
44. e tornem los guarsos atras
45. qu’en augurs crezon et en sort!

VI.

46. Sil luxurios corno-vi,
47. coytat del disnar al tuzo
48. cum el cami,
49. remanran en fera pudor.
50. Dieus vol los arditz e·ls suaus
51. assajar al sieu lavador,
52. e silh guararan los ostaus
53. e trobaran fort contra fort:
54. per dreyt venran ad aital cas.

VII.

55. En Espanha sai lo Marques
56. e selh del temple Salamo
57. sofron lo pes
58. e·l fays de l’erguelh payanor,
59. per que jovens cuelh avol laus;
60. e Crist per aquest lavador
61. venra sobre·lhs pus ricx chaptaus:
62. quals falhitz de proeza las,
63. que non amon joy ni deport!

VIII.

64. Desnaturatz son li Frances,
65. si al fag de Dieu dizon de no;
66. q’ieu say cum es
67. d’Antiocha: pretz e valor
68. sai plora Vian’e Peytaus!
69. Dieus senher, al tieu lavador
70. l’arma del comte met em paus,
71. et ab grat li valha la mort
72. del senhor que ressors del vas.