I.

1. Pus s’enfulleysson li verjan,
2. e·l glaiols delonc lo riu blan,
3. qui qe paus, ieu pens e conssir
4. de moutas causas a sobriers,
5. segon natura et estiers,
6. de q’auzem lo poble bruir.

II.

7. Puois la cogossia s’espan
8. e l’us cogotz l’autre non blan,
9. laissem los anar e venir:
10. cui cal cals que caps an primiers?
11. Q’ieu non daria dos deniers
12. per lor mesclaignas devezir.

III.

13. C’aissi·s vai lo pretz menuzan
14. e·l follatges hieis de garan.
15. No·n puosc sols lo fuoc escantir
16. dels segleiadors ufaniers
17. qe fant los criminaus dobliers,
18. peiors q’eu no·us sai descobrir.

IV.

19. Las baratairitz, baratan,
20. frienz del barat c’obraran –
21. que fant pretz e joven delir –
22. baratan ab los baratiers,
23. fondens q’issortz lor desiriers:
24. no·n pot eras cessar de frir!

V.

25. E s’ieu cuich anar chastian
26. la lor follia, ieu qier mon dan,
27. pois s’es pauc prezat si·m n’azir;
28. semenan vau mos chastïers
29. de sobre naturaus rochiers,
30. c’u no·n vei granar ni florir.

VI.

31. S’anc fui de la musa en afan,
32. lo musatge ai rendut musan,
33. tro per aillor no·n puosc issir.
34. Tans n’i vei d’els contraclaviers,
35. greu sai remanra conz entiers
36. a crebar ni a mieich partir!

VII.

37. A Dieu m’autrey – quo·s pot si s’an
38. lo segle cazen e levan,
39. mas a tart mi vuelh penedir;
40. per o si·n suy plus viansiers
41. que chatz o mostre·l re[proviers]
42. c .  .  .  . lo savis fetz lon . .  .  .  .  . [ir].

VIII.

43. Qu’aissi va [.  .  .] Marcabrus [.  .  .] del tot vol r [.  .  .]
44. elhas els fal [.  .  .] no sia coaze [.  .  .] del aculhir.

IX.

45. Si no foss[on] .  .  .  .  .  .  .  .[an]
46. ricx fora pre[nd]en e [d]onan,
47. mas de luenh m’an fayt magrezir.
48.  .  .  .  .  .  .  .  .  .  .  .  .  .  . [iers]
49. ja mai no·n lur serai guerriers,
50. que nom puesc la guerra sofrir.