I.

1. Auias de chan com enans’e meillura
2. e Marcabru, segon s’entensa pura,
3. sap la razo    del vers lasar e faire
4. si que autre no l’en pot un mot raire.

II.

5. Pero sospir quar tota gens aüra
6. de malvestat que descreis e peiura;
7. c’aquist baro    an comensat estraire,
8. e passat per un pertus de taraire.

III.

9. Li sordeior    aun de dar l’aventura
10. e li meillor    badon ves la penchura.
11. La retrazo    ·n fas trist e sospiraire,
12. c’a rebuzos faun li ric lur veiaire.

IV.

13. Non a conort    en joven mas trefura,
14. ni contra mort    resort ni cobertura,
15. qu’ist acrupit l’an gitat de son aire
16. e de cami, per colpa de la maire

V.

17. qui per argen pert vergonh’e mezura
18. e giet’onor    e valor a non-cura.
19. Pretz ni valor    no vezem tener gaire
20. quan per aver es uns gartz emperaire.

VI.

21. Proeza franh et avoleza mura
22. e no vol joi tener dins sa clauzura.
23. De la faiso    es en semblan confraire
24. al eriso,    et al gozet del braire.

VII.

25. Coms de Peiteus, vostre pretz ameillura
26. e de N’Anfos de sa, si gaire·ill dura;
27. lai Avinhon,    Proensa e Belcaire
28. te meils per sieu no fes Tolzan son paire.

VIII.

29. S’aquest N’Anfos fai contenensa pura,
30. ni envas mi fai semblan de frachura,
31. sai vas Leo    en sai un de bon aire,
32. franc, de sazo,    cortes e larc donaire.

IX.

33. De malvestat los gart Sanct’Escriptura
34. que no lur fassa cuf, floquet ni peintura.
35. Sel qu’es e fo    regom recx e salvaire,
36. la sospeiso    del rei N’Anfos m’esclaire.