I.

1. Belh m’es quan l’erba reverdis
2. e·lh vergier son vestit de flors
3. e la fontaina s’esclarzis
4. e·lh ram son vermelh de colors:
5. ladoncx m’es pres novels talans
6. cum si’ amoros e prezans,
7. l’estiu e l’ivern atressi.

II.

8. Tan suy enves ma dona fis
9. quar fina la trobei, senhors;
10. mas ara falh, si·m brunezis,
11. per qu’ieu m’en vau mudan alhors,
12. e suy me partitz dels engans
13. per autr’amor cui sui comans,
14. per cuy totz mos cors chanta e ri.

III.

15. Aquest’amors m’alegrezis
16. e·m dona joy e·m tolh dolors,
17. e·m reviu e·m rejovenis,
18. e·m reconta manhtas valors:
19. sesta m’es conortz et enans,
20. e·m restaura perdas e dans
21. quant yeu la vey et elha mi.

IV.

22. Enans fuy sieus qu’eu anc la vis,
23. e·lh portey en mon cor honors;
24. mas quan la vey, totz m’esbays,
25. que·l joy m’en tolh pura paors,
26. e remanh en aital duptans,
27. quar no·lh puesc esser gen parlans
28. d’aquo que pes ni·l cor me di.

V.

29. Al comjat cugey·s repentis,
30. quar mos digz no l’ay faitz gensors:
31. mar, quar no puesc, m’en penedis,
32. e prenc lo pas e lays lo cors,
33. e vauc cum folla res pensans,
34. las vias e·ls camps traversans
35. de say en lay, tot enaissi.

VI.

36. Que·m val, pus elha no·m grazis,
37. digz o faitz, o sens o follors,
38. o qualsque res no m’esclarzis
39. per qu’ieu no fos en tals errors?
40. Lonc temps n’ay estat fadians;
41. e s’elha·s vol, fassa·s enans,
42. qu’en la soa merce m’en fi.

VII.

43. C’al plazer midons me suy mis,
44. per so quar en lieys es m’amors;
45. e pus elha m’a tot conquis
46. be·m degra far semblans melhors.
47. Pus sos pretz es ricx e grans,
48. hom non sia meravellans
49. s’ieu sui totz sieus, lay o aissi.

VIII.

50. Pus sos pretz es ricx e montans,
51. hom non sia meravellans
52. s’ieu sui totz sieus, lay o aissi.