I.

1. En chantanz ieu plaing e sospir
2. lo gran dan q’a Proenza pres,
3. qe mortz es lo meiller dels tres
4. q’el mond poguez nuls hom chauzir.
5. Ailas! Qant ai sovinenza
6. del pro comte de Provenza
7. qon era francs e fis e debonaire,
8. lo cor mi part, per q’ieu no·m puesc estraire
9. non plagna·l mal, qi qe n’estia mutz,
10. q’a mantener Dieu s’era faits escutz.

II.

11. Bel segnor Dieus, per mantenir
12. los vostres s’er’encontra mes
13. cels qi s’eran per forç’empres
14. del vostre dreg a retenir.
15. Mas era sai, ses faillenza,
16. pos lo pros coms de Proenza
17. es mortz, que vos en seretz demandaire:
18. pero ben sai que si·l coms visques gaire,
19. q’en breu fora us chascus recrezutz,
20. ab que, segnor, no·l faillis vostr’aiutz.

III.

21. E doncs qe poiran devenir
22. cavaller, donnas e borges,
23. pos mortz es lo pros coms marques?
24. Ni l’autre com poiran garir?
25. C’ab la soa mantenenza
26. eran tuit cil de Proenza
27. onratamen en patz e ses mal faire;
28. pos li meillor vei qe tornan tuit vaire,
29. qu’esser degran contra los malvolgutz,
30. e mantener los meias e·ls menutz.

IV.

31. Segner Papa, a vos me gir,
32. car es caps de trestotz los bes,
33. que fassatz pregar e preges
34. cel qu’en la crois volc mort suffrir,
35. per nostre tortz a garenza,
36. qu’al pro conte de Proenza
37. fassa perdo e·l met’el seu repaire;
38. pos nos l’a tout, cui er’en luec de paire.
39. Ensembre vos con era entenduz
40. contra·ls tirans per gleiza malvolgutz!

V.

41. Gloriosa, plassa·us d’auzir
42. mos prex, per las vostras merces,
43. si·us platz que·l vostre Fill degnes
44. pregar c’ab si deign’acuillir
45. lo pro comte ses bistenza
46. e que nos don en Proenza
47. segnor leial, franc e de paz amaire
48. e qi am Dieu e gleiza, ses cor vaire,
49. c’aissi sera onratz e car tengutz
50. e per los seus e pels autres tenzutz.

VI.

51. Aiatz bona sovinenza,
52. pros contessa de Proenza,
53. d’amar, d’onrar los bos e de ben faire,
54. e membre vos del comte vostre paire,
55. e castiatz los granz faitz e·ls menutz
56. quan los aures per veritat saubutz.

VII.

57. Ben fai cel qi ben comenza,
58. mas ieu aug dir en Proenza
59. que bos comenz non pot profechar gaire
60. ses bona fin, qu’eu aug a totz retraire
61. que bos fagz es per avol fin perdutz
62. e per bona lauzatz e car tengutz.