1 N’Aimerics de Piguignan si fo de Tolosa, fills d’un borzes q’era mercadiers, qe tenia draps a vendre. 2 Et apres chanssons e sirventes, mas mout mal cantava. 3 Et enamoret se d’una borgesa soa vezina. 4 Et aqella amors li mostret trobar. 5 E fetz de lieis maintas bonas chanssos. 6 E mesclet se ab lo marit d’ella e fetz li desonor. 7 E·N’Aimerics s’en venget en tal guisa qez el lo feri d’un espaza en la testa. 8 Per qe·l covenc issir de Tolosa e faidir. 9 E anet s’en en Catalloigna. 10 E·N Guillems de Berguedan si l’acuillic et enansset lui e son trobar, en la primeira chansson q’el avia faita, tant q’el li donet son palafre e son vestir. 11 E·l presentet al rei Amfos de Castella, lo qals lo crec d’aver e d’arnes e d’onor. 12 Et estet en aqellas encontradas lonc temps. 13 Pois s’en venc en Lombardia, on tuich li bon home li feiron grand honor. 14 Et en Lombardia fenic.