1 Bertrans de Born si fo uns castellans de l’evescat de Peiregos, seigner d’un castel que avia nom Autafort. 2 Totz tems ac gerra ab totz los sieus vezins, ab lo comte de Peiregos, et ab lo vescomte de Lemotgas, et ab son fraire Constantin, et ab En Richart, tant qant fo coms de Peiteus. 3 Bons cavalliers fo e bons gerriers e bons dompneiaire, e bons trobaire e savis e ben parlans; e saup tractar mals e bens. 4 Et era seigner totas vez qan se volia del rei Henric d’Englaterra e del fill de lui, mas totz temps volia qu’ill aguesson gerra ensems, lo paire e·l fills e·ill fraire l’uns ab l’autre. 5 E totz temps volc qe·l reis de Franssa e·l reis d’Englaterra agessen gerra ensems. 6 E s’il avian patz ni treva, ades se penava, e·is percassava ab sos sirventes de desfar la patz. E demostrava cum chascuns era desonratz en la patz. 7 E si n’ac de grans bens e de grans mals d’aisso q’el mesclet entre lor; e si en fetz mains bons sirventes, dels cals en a aissi plusors escritz.