1 Pons de Capduoill si fo de l’evescat don fon Guillems de Sain Leidier. 2 Rics hom fo mout e gentils bar; e sabia ben trobar e viular e cantar. 3 E fo bons cavalliers d’armas e gen parlans e gen dompneians, e grans e bels e ben enseignatz, e fort escars d’aver; mas si s’en cobria ab gen acoillir et ab honor de sa persona. 4 Et amet per amor ma dompna N’Alazaiz de Mercuer, moiller d’En Ozill de Mercuer, que fo filla d’En Bernart d’Andusa, d’un honrat baron q’era de la marca de Proenssa. 5 Mout l’amava e lauzava, e fetz maintas bonas cansons d’ella. 6 E tant qant ella visqet non amet autra dompna; e qand ella fo morta, el se crozet e passet houtra mar, e lai moric.