Marcabru

Qan l’aura doussana bufa

e·l gais de sotz lo brondel

fai d’orguoill cogot e bufa,

e son ombriu li ramel,

5

ladoncs deuria hom chausir

verai’ amor, ses mentir,

c’ab son amic non barailla.

Jovens triatz non a vida,

que ferit l’an d’un cairel

10

malvestatz e cobeïda

laïnz dentre·l cor e·l fel:

et es ne greus ad issir,

que no s’en laissa garir

d’avoleza e de nuailla.

15

E·l jelos luita e musa,

e fai badiu badarel,

car qui l’autrui con capusa,

lo sieu tramet al mazel:

e qui l’estaing vol sentir

20

lo sieu fai enleconir

e·l met en la comunailla.

Ges non viu de manna dreicha,

cum fetz lo trips d'Israël,

Flaira-Fum, qui no·n s’abreicha,

25

e·l torn’ es en bufarel:

ni·l plus ric no·n volon dir

vertat, tant volon mentir

per conseill de garsonailla.

Laig torn’ en ufanaria

30

dompneiar [q]i ’st cornudel

manten en la drudaria,

e·il tol e·il vest a[o]l capel.

Pois no m’en aus esclarzir,

ni mon talan ademplir,

35

an pur co·is pot, Dieus m'en vailla.