Peire Guillem de Luzerna

Ai, Vergena, en cui ai m’entendenza,

e s’a vos plaz los mieus cars precs auzir,

jamais de joi entier no∙m cal marrir,

car vius e morz aurai joi ses faillenza

5

de vos, Dompna, que das joi per jasse,

que∙us ven de Sel c’a en poder e te

los bes e∙ls mals e∙ls jois e∙ls conseriers:

per qu’er en vos servir toz mos mestiers;

c’autre servirs endreg vos non ja venza!

10

Valenz Dompna sobre tota valenza,

vos pot hom ben lauzar ses contradir:

en vos lauzar non pot nuls hom mentir,

car vos es flors de vera conoissenza,

flors de beutat, flors de vera merce,

15

.  .  .  .  .  .  .  .  .  .  .  .  .  .  .  .  . -e

flors a cui∙l mons fon donatz, jois entiers:

can venc en vos lo rics reis drethuriers,

romaçest verges apres la naissenza.

Vos aguest frug, Dompn’, ab menz de semenza,

20

que toz bos frutz fai foillar e florir

e∙ls fai granar et a lor temps venir,

frugs c’om conqer ab vera penedenza,

ab dejunar et ab orar ganre,

ab caritat que taing c’om ai’en se;

25

car caritaz es via e sendiers

c’aduj home a Dieu, qu’es fruz pleniers

e no∙s conqer menz de ferma creçenza.

Ben sai, Dompna, qui∙us a en sovinenza

e de bon cor si don’a vos servir,

30

si mezeis serv, car sertz es del jauzir

e ges non l’er tornaz e nonchalenza

so servizis: vos en sovenra be

lai on chascus aura paor de se,

aissi lo just co∙l laires, l’estradiers,

35

can si fara lo Jujamenz Derriers,

on nuls plaides non trobara guirenza.

Bona Dompna, tant es granz la temenza

qu’eu ai can pes c’aissi m’an fag faillir

miei fol voler, ab pensar et ab dir,

40

ab nesis fatz et ab folla parvenza,

c’a penas puesc ni aus clamar merce

vostre car Fil; pero cant me∙n sove

com a Longi fon de perdon leugiers

e al lairon, son de prejar frontiers,

45

e non per tan c’ades temors no∙m venza.

A, Reina complida de tot be,

prejatz, si∙us plaz, vostre car Fil de me,

que m’aleuge mos mals e∙ls conseriers

qu’eu trairai lai, tan greus e tan sobriers,

50

qu’endreg lo cors la morz no∙m fai temenza.