Cavalier Lunel de Monteg (alias Peire de Lunel)

Totz hom que vol en si guovernamen,

aishi deu far com li pasible fan,

que, si pren tort ho damnatge mot gran,

4

esperar deu loc e temps covenen;

car mot de leu s’enta doblar poiria,

per qu’esperar hom deu sa bona via,

qu’om miels venjar se pot en be suffrir

8

que no fay cel que son cor vol complir.

Totz hom que vay sa volontat seguen

sera caytieus, si vieu per temps avan;

car volontatz vay tot lo cen guastan

12

e fay voler so que razos repren.

Per que si fay so que vol a ssa guia,

laysha per fort so que be far deuria,

es enaishi fa ssi mot escarnir,

16

car a razo no·s laisha corregir.

Home parlier degus hom no l’enten

son cor, canh l’a, car tot jorn vay parlan.

E li bon fag van home demostran

20

e li fat dig van cascun jorn menten.

Per qu’om voler no deu ponch sa paria,

car messongier lo fay la parlaria

e poys layro, car hom que sap mentir

24

vol leu panar, car sap s’en gen cubrir.

Los homes fals pot hom demes la gen

conoycer leu, solamen al semlan,

car trastot so qu’om fara lauzaran

28

e poys detras home van escarnen.

As aitals platz, qui so mal dan fazia,

car so trachor e ple de gran falcia;

mas hom trob be pot as aytals guandir,

32

que fassa be, qui los vol far languir.

Ades pot hom conoycer a prezen

amic, qui l’a, can falh ni tan ni can;

car fis amicx vol castiar celan,

36

e l’enemicx ditz ho publicamen.

L’amicx ha dol, qui ditz una folia,

e l’enemicx ri de la musardia;

per qu’om no deu d’autr’ a son amic dir,

40

si no·l repren, can lo veyra falhir.

Mos Bels Cristalhs, a vos no platz bauzia,

car vos etz fons hon totz bes multiplia;

per que mon vers prec vulhatz retenir,

44

que si re·y falh que·l vulhatz corregir.