Folquet de Marselha

Greu feira nuills hom faillenssa,

si tant temses son bon sen

cum lo blasme de la gen,

qui jutg’ab desconoissenssa;

5

qu’ieu faill car lais, per temenssa

del blasme desconoissen,

qu’encontr’Amor no m’enpren:

qu’eissamen notz trop sofrenssa

cum leus cors ses retenenssa.

10

Car en vostra mantenenssa

me mis, Amors, franchamen,

e fora·i mortz veramen

si no fos ma conoissenssa;

don, non aiatz mais crezenssa

15

qu’eu m’an, si cum suoill, plaignen 

ni moira oimais tant soven

en mas chansos, qu’en parvenssa

n’avian meins de valenssa.

E ja Merces no vos venssa

20

per mi, qu’ieu no la·i aten,

anz m’estarai planamen

ses vos, pois tant vos agenssa,

francs, de bella captenenssa,

s’ieu puosc, qu’en aisso m’enten;

25

e cill sofran lo tormen

que fan, per folla atendenssa,

anz del pechat penedenssa.

Mas eu avia plivenssa,

tant quant amei follamen,

30

en aisso c’om vai dizen:

ben fenis qui mal comenssa;

don eu avia entendenssa

que, per proar mon talen,

m’acsetz mal comenssamen;

35

mas er conosc a presenssa

que totz temps m’agra tenenssa.

E si·m degratz dar guirenssa!

car mieills gazaigna e plus gen

qui dona qu’aicel qui pren,

40

si pretz n’a ni benvolenssa;

mas voutz es en viltenenssa

vostr’afars et en nien,

c’om vos sol dar, er vos ven;

mas lais m’en, qu’ieu ai sabenssa

45

de mal dir et estenenssa.

N’Aziman, al vostre sen,

e d’En Totztemps eissamen,

mi teing d’Amor, que parvenssa

ne fatz mas pauc vos agenssa..