Folquet de Marselha

Greu fera nuls hom falhensa,

si tan tempses som bo sen

quom lo blasme de la gen

qui jutg’, ab desconoissensa,

5

qu’ieu falh car lais, per temensa

del blasme desconoissen,

qu’encontr’Amor no m’enpren:

qu’eissamens notz trop sufrensa

quom leus cor sens retenensa.

10

Quar en vostra mantenensa

me mis, Amors, franchamen,

e fora.i mortz veramen

si no fos ma conoissensa!

don, non aiatz mais crezensa

15

qu’ieu m’an, si quom suelh, planhen

ni moir’oimais tan soven

e mas chansos, qu’en parvensa

n’aurion meins de valensa.

E ja Merces no vos vensa

20

per mi, qu’ieu no la.i aten,

ans m’estarai planamen

ses vos, pos tan vos agensa,

francx, de bella captenensa,

s’ieu puosc, qu’en aisso m’enten!

25

E cylh suefran lo turmen

qui fan, per fol’atendensa,

ans del peccat penedensa.

Mas ieu avia plivensa,

tant quant amiei follamen,

30

en aisso qu’om vai dizen:

be fenis qui mal comensa!

Don ieu avi’entendensa

que, per proar mon talen,

m’acsetz mal comensamen!

35

mas ar conosc a prezensa

que tostems m’agr’atenensa.

E si.m degratz dar guirensa

quar miels gazanh’e plus gen

qui dona qu’aicel qui pren,

40

si pretz n’a ni benvolensa!

Mas voutz es en viltenensa

vostr’afars et en nien,

qu’om vos sol dar, ar vos ven!

Mas lais m’en, qu’ieu ai sabensa

45

de mal dir et estenensa.

N’Azimans, al vostre sen,

e d’en Tostemps eissamen,

mi teign d’amor, que parvensa

ne faitz mas pauc vos agensa.