Folquet de Marselha · Tostemps (155.24)

		Folquet de Marselha · Tostemps
		Tostemps, si vos sabetz d’amor,
		triatz de doas cal val mays:
		s’es drutz de tal que no·s biays
		vas vos ni sofr’autr’amador,
5		empero no·us fay veiayre
		que·us am ni qe s’azaut de vos,
		o d’autra que·us am atrestan
		e a d’autres drutz un o dos
		e que·us fassa de plazers tan
10		com fin’amia deu fayre.

		Folquet[z], mes m’avetz en error,
		que trop m’avetz partit greus plays,
		qu’en cascun a trebalh et fays;
		pero si·n penray la melhor:
15		be·us dic qu[e] ieu non pretz gaire
		dona pois hi a[y] companhos,
		sitot mi fay d’amor semblan;
		mays vuelh que m’o tenh’a rescos
		leys que non aya cor truan
20		c’ab bels plazers me cug trayre.

		Tostemps, pauc avetz de valor
		si per aital amor es gays
		que, pus dona·us fay col e cais,
		par qe s’o tengua a deshonor:
25		be·us dic, s’era·l reys seus paire,
		no·us es sos plaitz onratz ni bos;
		mays val sela que·us tem e·us blan
		e·us mostra semblan amoros,
		sitot se vay pueys percassan,
30		cant vos non es el repayre.

		Folqet[z], vos razonatz folor,
		que anc dona pus son drut trays
		sos pretz no fon fis ni verays,
		ni·l sieu semblan gualiador
35		no·l podon per ren refayre
		l’anta qu’ilh fay totas sazos;
		mas de bona dona prezan
		say qu’en es pus ondratz sos dos:
		sitot no·m fay d’amar semblan
40		no·m cal, sol m’am ses cor vaire.

		Tostems, li nessi donador
		fan tornar los bos dos savays
		e par a lor semblan malvays
		que·l dar non lor aia sabor;
45		doncx, co·m pot dona ben fayre
		qe·m mostre semblan ergulhos?
		Mielhs es c’om suefra·l bel enjan,
		c’aisso ja es be trassios
		que aven a motz, sofrir l’an:
50		yeu cug que vos n’es cofraire.

		Folqet[z], tals m’ac a servidor
		qes anc companhon no m’atrais;
		ara·m par que ad autre·s lays,
		per q’ieu m’en part e·m vir alhor;
55		mays vos qi es fis amayre
		cug qe, si a estas razos
		cuiatz aisi cobrir lo dan
		e s’aisi perdes las chansos
		que autre vos parta l’afan,
60		no say per que·us es chantayre.

		Tostemps, de tort say dreg fayre,
		per c’a mi platz esta razos;
		e s’ie·us en vens, joi n’ayatz gran,
		car vos sofretz los companhos,
65		mays eu n’am tal que·m fay semblan
		d’amor, e no·y ay cofraire.

		Folquetz, tostemps fos gabayre!
		jutjada sia esta razos:
		a Na Gaucelma vuelh que·s n’an,
70		e si ieu am ab companhos,
		ja per so no·y ira duptan,
		que ben crey n’er fis jutjaire.