Folquet de Marselha (155.9)

		Folquet de Marselha
		Fin’amors a cuy me suy datz
		e·l gens terminis amoros
		quascus d’aquestz m’es ochaizos
		don dey esser enamoratz;
5		per qu’es dreitz qu’ab lo lur aon
		fassa conoysser en chantan
		cum ieu suy faitz a lur coman.

		Quar mielhs sai suffertar em patz
		si que mos volers no·s descos;
10		e par be ja per als no fos
		mas quar am e no suy amatz;
		e ja silh don chan no m’aon
		s’a totz jorns no vau melhuran
		de lieys ben amar ses enguan.

15		Per que·us prec que merce n’aiatz
		ses tort qu’ieu anc non aic vas vos;
		e si·l dreitz, qu’es tan cabalos,
		no·m pot valer, humilitatz
		mi valh’ab vos, dompn’, e m’aon
20		quar nuls dreitz non a valor gran
		lai on forsa fai son talan.

		Qu’aissi m’es e·l cor sagelhatz
		vostre rics pretz verays e bos
		per qu’ieu no suy ges poderos
25		que·m biaysse ves autre latz,
		ni no vuel ja qu’autra m’aon
		mas vos, domna, per cuy ieu chan
		et am e dezir e reblan.