Guiraut Riquier

L’octau vers d’en Gr. Riquier, l’an MCCLXXVI, en jenier.

Karitatz ez amors e fes

e drechura e lialtatz

e chauzimens e pïetatz

4

e conoyssensa e merces

son ab pauc del tot abatut,

quar le muns es perpres d’enjan,

tant que·l pus l’obran a saubut,

qu’a penas n’esdic pauc ni gran.

Quar baratz a lo pus perpres,

per que·l mais ne va galiatz,

que·l mals es plazens e privatz,

tant que per paucx es faitz le bes;

pero amduy son conogut,

e crezem que merit seran:

mort per mal, e per ben salut

per Dieu a, qui·s fa tot denan.

Le malvatz mons fals, d’enjan ples,

deslials, fons de malvestatz,

fa cobezejar los peccatz,

e perdo·l tost tug sey conques,

e qui pus l’a privat avut

mais a multiplicat son dan,

quar si pert ez a elh perdut,

per qu’es pus folhs qui mais lo blan.

Mas gardatz quon es Dieus cortes

qu’el nos esta apparellatz;

ja tant no·ns trobara tacatz,

sol gardem qui em e qui es;

quar elh nos ten son bras tendut

per gandir del mortal afan,

ab que·l nostr’estamens se mut

fort peneden e ben obran.

Dieus vol patz, mas guerra promes

als sieus; doncx qui er guerreiatz

per luy, guanditz er e salvatz,

sol no·s recreza, quon que·l pes.

E qual son aquist combatut?

Sylh que·l mon desamparat an

e de bona fe fan escut,

Dieu serven e lur crotz portan.

Recobratz fora, qui·s volgues,

lo luecx on Jhesus Cristz fon natz

e visc e fon en crotz levatz,

e·l sans sepulcres, on fon mes.

Mas en mercat o an tengut

li ric, em prenden que n’auran,

per que Dieus non lur a valgut

quar petit per s’amor hi fan.

Si prelatz, reys, comtes, marques

e totas autras pozestatz

pogues hom trobar acordat,

que plag ni guerra no·y agues,

e fosson tot li tort rendut,

e passesson de bon talan,

tost foran Sarrazin vencut

o combaten o prezican.

La fe e l’obra de salut

yssause Dieus, com que l’als an,

e la Verges que·ns y ajut,

pregan son filh ab Sant Johan.

Reys n’Anfos, Dieus per sa vertut,

vos cresca poder e talan

del pretz que avetz mantengut

luy serven, enemicx sobran.

E·m don qu’ie·l fassa selh traut

que·l veray peneden li fan.