Peire d’Alvernhe (323.20)

		Peire d’Alvernhe
		L’airs clars e·l chans dels auzelhs,
		la flors fresca e·l fuelha
		que s’espan per los brondelhs
4		e·l vertz herb’a bruelha
		mi mostra d’esser ysnelhs
		q’un vers non-clus cuelha,
		tal que·l sos sia novelhs,
8		que·l chant qui ia·s vuella,
		per qu’ara chanten cavallier:
		que chans aporta alegrier,
		e pert de son segle lo mays
12		qui seguon sazo non es guays.

		Qu’ira ni grans cossiriers
		non obra boneza,
		qu’ans es dans e destorbiers;
16		non obra proeza,
		que, cum totz mals encombriers
		mou de cobezeza,
		atressi sortz totz faitz niers
20		d’embronquar, qui·l veza.
		Doncx qui de gaug a dezirier
		tengua a dreyt so semdier
		e l’ira e l’avol parven lays
24		als malvatz ni als sers savays.

		Mas dels dos ioys es ops sens
		e reconoyssensa,
		e l’us es abaissamens
28		e l’autre creyssensa.
		E s’oms es lo mon seguens,
		vir se on mais l’agensa,
		qu’ayselh sos faitz es grazens
32		qu’es ses repentensa;
		qu’aital es de gaug ufanier,
		qui·lh sec e defug l’autr’entier,
		cum del can cui cazec del cays
36		la carns, quan l’ombra el’aigua·l trays.

		Per que qui del ioy munda
		s’apropch’e ss’aferma
		si: «era·l terras», non l’a,
40		que, quan creys mais, merma.
		Quar s’amors fon bona ia
		qui no·m pliu ni·m ferma
		que no m’o menta dema?
44		Don l’amars s’azerma,
		fors cum volv’a descordier,
		ieu no sai, e sent e quier
		l’amor on non a ren biays,
48		on ma bon’esperansa·m pays.

		Que·l sieus ioys gensetz esiau
		selhuy qui·l s’autreya
		senes fenh’e ssemblant brau
52		e ses vair’enveya,
		qu’ades a quasqun iornau
		sai viu e verdeya
		sa valors ab ver lonc lau,
56		cui totz pretz sopleya;
		que, cum resplan roz’en rozier
		gensetz d’autra flor de vergier,
		sobra sobre totz ioys sos iays
60		del maior gaug qu’anc nasc ni nays.

		Lo vers chant, qui·l sabra ses brays,
		on mot mi platz de qui mas bays.